Орон сууцжуулах хөтөлбөрийн хүрээнд \”Буянт-Ухаа-1”, \”Буянт-Ухаа-2” орон сууцны хорооллыг босгон хэл ам дагуулж байсан нь саяхан. Төслийг хэрэгжүүлэгч нь Н.Алтанхуягийн Засгийн газар, гүйцэтгэгчээр \”Үндэсний бүтээн байгуулалтын корпораци” ажилласан ч хэрэглэгчдийн зүгээс бухимдал үүсгэх нь цөөнгүй байсан. Энэ ч дүүрсэн хэрэг, хамгийн гол нь тус хорооллын оронсууцыг зорилтот бүлэгт олгож байгаа нэрийн дор олон тооны орон сууц зувчуулсан байдлыг хянан үзээд хууль тогтоомж зөрчсөн болохыг илрүүлжээ. Ямартай ч ТОСК-ийн захирал асан А.Гантулгыг шалгаад гэм буруутайг нь тогтоогоод байна. Баримт дурдвал, ТОСК-ийн ерөнхий захирал А.Гантулгын 2016 оны А/49, А/70 дугаартай тушаалын дагуу 32 айлын 1,480,3 метр квадрат талбайтай 1,9 тэрбум төгрөгийн үнэ бүхий орон сууцыг Нийслэлийн орон сууцны фондод үнэ төлбөргүй шилжүүлж, үйл ажиллагааны зардлаар бүртгэжээ. Энэ бол тухайн үед засгийн эрх барьж байсан намын хууль журам мөрддөггүй, хувийн эрх ашгийг дээгүүрт тавьж байсны нэгээхэн илрэл. Уг нь энэ орон сууц бол нийгмийн тодорхой зорилтот бүлэгт олгох, тэднийг орон сууцжуулах хүрээнд баригдсан. Гэтэл нийслэлийн эрх мэдэлтнүүд чухам ямар замаар 32 айлын орон сууцыг Нийслэлийн орон сууцны фонд нэрээр авчихсан хэрэг вэ. Яг үнэндээ ТОСК-ийн нэрээр борлуулагдаж буй орон сууцыг Засгийн газрын үнэт цаасыг арилжаалсан мөнгөөр барьсан юм. Тодруулж хэлбэл ТОСК өр тавьж барилга бариулсан гэсэн үг. Энэ ч үүднээс барьсан орон сууцаа борлуулж үндсэн зээл болон хүүгийн төлбөрийг төлөх ёстой юм. Үндэсний аудитын газрын тайлан мэдээнд үүнээс гадна санхүүгийн хэд хэдэн зөрчил илэрчээ. 2015 онд 3.2 тэрбум төгрөгийн алдагдалтай ажилласан ТОСК, 2016 онд 20 орчим албан тушаалтандаа орон сууцны дэмжлэг хэмээн 242 сая төгрөгийг хуваарлисан байх юм. Хамгийн хачирхалтай нь орон сууцны дэмжлэг авсан ажилчдын дийлэнхи хувь нь ажлаасаа гарчээ. Үр ашиггүй зардал гэж үүнийг л хэлэх байх. Төсвийн мөнгө \”Ёо\” хэмээн дуугарахгүй нь сайхан гэж нэгэн цагт Нийтлэлч Баабар бичиж байсан. Тэгвэл үүнийг батлах мэт Төрийн орон сууцны корпорацийн дэд захирал Л.Оюунжаргал хадагтай хүүгийнхээ сургалтын төлбөрийг татвар төлөгчдийн мөнгөнөөс гаргуулжээ. АНУ-д суралцаж буй дэд захирлынхаа хүүгийн төлбөрт 65 сая төгрөгийн дэмжлэг үзүүлсэн Төрийн орон сууцны корпораци өнөөдөр ажилчдынхаа цалинг ч тавьж чадахгүй хэмжээнд хүрч данс нь \”улайжээ\”.
Энд ганцхан А.Гантулгын тухай ярих ч хэрэг биш. Тухайн үеийн Засгийн газрын эрх мэдэлтнүүд, нийслэлийн Засаг даргаар ажиллаж байсан Э.Бат-Үүл нар ч холбоотой гэхээр сүлжээ үүссэн нь тодорхой харагдана. Түүнээс биш хэн нэгний ил далд тушаалгүйгээр ТОСК-ийн захирал дур мэдэн олон тооны орон сууц хууль зөрчсөн хүмүүст олгохгүй шүү дээ. А.Гантулгын хувьд Л.Оюунжаргалд хүүхдийн сургалтын төлбөрт 65,0 сая төгрөгийг үйл ажиллагааны зардлаар гаргуулж авсан нь 100 хувь өөрөө буруутай. Зөвхөн энэ үйлдэлдээ тэр ял авах ёстой. Харин орон сууцны хувьд бол авсан өгсөн аль аль нь шийтгүүлэх ёстой. Э.Бат-Үүл сонгуулийн санал хураахаас тавхан хоногийн өмнө буюу 2016 оны зургадугаар сарын 24-ний өдөр нэгэн захирамж гаргасан байдаг юм. Нийслэлийн Засаг даргын Тамгын газар, ТОСК хооронд байгуулсан \”Үүрэг гүйцэтгэх тухай” гэрээг үндэслэн \”Буянт-Ухаа-2” хороололд нэр бүхий ахмад настан болон хөгжлийн бэрхшээлтэй иргэдийн амьдралын гачигдалтай байдлыг харгалзан орон сууц олгох тухай захирамж юм. Үнэхээр энэ гэрээнд дурьдсан зорилтот бүлгийнхэн энэ байранд орсон уу ?Орсон бол үнэ төлбөргүй нийслэлд шилжиж ирсэн байр үнэ төлбөргүйгээр эзэддээ хүрэх учиртай. Магадгүй 1.9 тэрбум төгрөг сонгуулийн зардлын нэгээхэн хэсэг болсон уу гэдгийг ч сэтгүүлч би хардах эрхтэй. Нийслэлийн орон сууцны фондоор дамжуулсан олон тооны орон сууц ченжийн гарт очсон болохыг ч үгүйсгэх аргагүй юм.
Гэхдээ \”биш ээ бүр цаад эзнийг нь” гэдэг шиг А.Гантулгын цаана ямар хүмүүс байв гэдгийг ч шүүх хяналтынхан тогтоох биз ээ.
Ардчилагчид бол ийм л замаар төр барьж, ийм л замаар зувчуулдаг гэдгийг хоёрхон удаагийн Төрийн эрх барьсан үйлдэл нотлон харуулна. 1996-2000 онд төрийн эрх барихдаа хувьчлал нэрийн дор улсын аль үнэ цэнэтэй үйлдвэр объектыг зүгээр шахам авчихсан. Өдгөөгийн УИХ-ын гишүүн Д.Эрдэнэбатын \”Залуучууд” зочид буудлаас эхлээд Х.Баттулгын \”Мах-Импекс”, \”Баянгол” зочид буудал, \”Талх чихэр” гэх мэт олон үйлдвэр байгууламж, УИХ-ын гишүүн асан Г.Батхүүгийн \”АПУ” гээд дурдаад барахгүй. Төрийн нэрээр хөлжиж өрөөр наадсан Эрхэмүүд өнөөдөр юунд Матрын нулимс унагана вэ.
Эх сурвалж: \”Монголын Үнэн\” сонин
