Автомашин борлуулагчдын газар эзэмших эрхийг цуцлахаар болжээ

Нийслэлийн мэргэжлийн хяналтын газар /НМХГ/-аас Улаанбаатар хотод эзэмшил газраа зориулалтын дагуу ашиглаагүй, зөвшөөрөлгүй ил задгайгаар автомашин худалдан борлуулж байгаа иргэн, ААН-үүдэд хяналт шалгалт явуулжээ. Шалгалтын хүрээнд 19 иргэн, ААН газраа чөлөөлсөн байна. Үлдсэн газруудыг цуцлах саналыг Нийслэлийн засаг даргад хүргүүлэхээр бэлдсэн байна.Тодруулбал, Баянзүрх дүүрэгт 47 газар шалгалтад хамрагдсанаас зургаан газар нь зөрчлөө арилгажээ. Үлдсэн 41 газрын зөвшөөрлийг цуцлах саналтай, Баянгол дүүрэгт таван газар шалгалтад хамрагдаж, гурван газар зөрчлөө арилган, хоёр газрыг цуцлах саналтай, Сүхбаатар дүүрэгт хоёр газар цуцлах саналтай, Чингэлтэй дүүрэгт гурван газар шалгалт хийснээс хоёр нь зөрчлөө арилгасан, нэг газрыг цуцлццлах саналтай, Сонгинохайрхан дүүргийн арван газрын ес нь зөрчлөө арилгасан учир нэг газрыг цуцлуулах саналтай Нийслэлийн засаг даргад хүргүүлэхээр бэлджээ.

Нийслэлийн мэргэжлийн хяналтын газрын Байгаль орчин, геологи, уул уурхайн хяналтын хэлтсийн дарга Д.Бат-Өлзий хэлэхдээ \”Эзэмшил газраа зориулалтын дагуу ашиглаагүй, газар эзэмших гэрээнд заасан нөхцөл болзлыг биелүүлээгүй гэсэн хоёр үндэслэлээр дээрх арга хэмжээг авахаар болсон. Өмнө нь энэ тухай мэдэгдлийг 2015 оноос шаардлага болон мэдэгдэх хуудсаар хүргүүлж байсан.

Биелэлтийг шалгаж үзэхэд зөрчлөө арилгаагүй байсан тул Нийслэлийн засаг даргаар газар эзэмших эрхийг цуцлуулах хүсэлтийг НМХГ-аас хүргүүлж байна. Иргэд аж ахуй нэгжүүдийн дунд авто худалдааны цогцолбор руу албадан гаргах гэж байна гэсэн яриа гарч байгаа ч үүнтэй ямар ч холбоогүй. Ердөө л газрыг зориулалтаар нь ашиглах ёстой гэсэн шаардлагыг эдгээр үйлчилгээ эрхэлж буй хүмүүсээс шаардсан” гэв.