С.Амарсайхан: Хөгжлийг хурдасгах аливаа шийдвэрт тууштай тулгуур нь бөгөөд хөдөлгөх хүч нь байна

Иргэд сонгогчид оо

Эрхэм төлөөлөгчид өө, та бүхэндээ энэ өдрийн мэндийг хүргэе.

 

Юуны түрүүнд нэр дэвшиж, өрсөлдсөн Д.Баярсайхан төлөөлөгчийнхөө цаашдын
ажил, амьдралд амжилт хүсч байна. Надад итгэл үзүүлж, нийслэлийн эрх барих дээд
байгууллага буюу НИТХ-ын даргад нэр дэвшүүлж, сонгосон та бүхэндээ талархалаа
илэрхийлье. 

Өнөөдөр та бид олон сарын туршид зогсонг явж ирсэн НИТХ-ын үйл ажиллагааг
гацаанаас гаргаж, цаашид хэвийн үйл ажиллагаа явуулах боломжийг нээлээ. Эх орны
минь нийгэм эдийн засгийн цөм улс орны минь хөгжил дэвшлийн толь болсон
Улаанбаатар хотын урт хугацааны тогтвортой хөгжлийн бодлогыг тодорхойлох
хэрэгжүүлэх, гүйцэтгэлд нь хяналт тавих эрх үүргийг энд суугаа 45 төлөөлөгч та
бидэнд нийслэлчүүд минь олгосон. Харамсалтай нь өнгөрсөн хугацаанд НИТХ,
гүйцэтгэх удирдлагын баг харьяа хэлтэс, газар, агентлагуудын үйл ажиллагааны
уялдаа холбоо хангалтгүй ажлын гүйцэтгэл сул, төлөвлөсөн төсөл хөтөлбөр болон
өдөр тутмын ажил ч удаашралтай явагдаж нийслэлчүүдийн хүсэн хүлээсэн хэмжээнд
хэрэгжээгүй тул бид цаг алдалгүй асуудлыг хөндөж, засаж, залруулах шаардлагатай
байсан. Тиймээс МАН-ын бүлгийн гишүүд бид нам нэрээр нүдээ боож, чихээ бөглөж,
аливаад олонх нэрээр түрэх ёсгүй гэж үзсэн. Бид цаг ямагт төрт ёсоо дээдлэн,
нутгийн өөрөө удирдах ёсныг төрийн удирдлагатай хослуулж, нийслэлийн төр
захиргааны байгууллагын үйл ажиллагааны чадамжийг үргэлж дээшлүүлж байх
үүрэгтэй. Аль ч төрийн, ямарч цаг үед олонх, цөөнх нь хэн байхаас үл хамаарч
бүх төвшинд өндөр ёс зүйтэй, ил тод бөгөөд нээлттэй илүү бүтээлч явуулах
хандлагыг бэхжүүлж, Монгол төр Монгол хүний ирээдүйн үнэ цэнийг баталгаажуулж
байх нь бидний үүрэг гэж би ойлгодог. Иймд төрийн албаны ёс зүй, хариуцлага,
сахилга батыг хэн нэгэн гуйж, гуйлгаж, асууж, аргадаж, хэлж хүлээх бус харин
шат шатандаа хэрэгжүүлж, хэвшүүлж, хянаж, шаардаж ажиллах ёстой.

 

Та бид албан тушаал эрх мэдлийг хувийн сонирхлоо гүйцэлдүүлэх өөрт оногдсон
ховорхон боломж, эсвэл цаг нөхцөөх талбар гэж хандах бус харин өөрчлөлт
шинэчлэлтийг хийх өндөр үүрэг хариуцлага гэдгийг ухамсарлан урд өмнөхөөсөө илүү
хурдтай, эрс шийдвэртэй, зоригтой, зорилготой ажиллах цаг үе бидний өмнө байна. 

Би цаашид НИТХ-ын үйл ажиллагааг удирдах зохион байгуулахдаа зөв
санаачлага, бүтээлч сэтгэлгээг дэмжиж, асуудлыг оновчтой шийдвэрлэх хөгжлийг
хурдасгах аливаа шийдвэрт тууштай тулгуур нь бөгөөд хөдөлгөх хүч нь байна.
Харин ажил гацаасан хариуцлагагүй байдал, аминчхан үзэл, явцуу байдал, хөгжлийн
тушаа болсон хэт намширхал, туйлшралд эрс шийдвэртэй эсэргүүцэгч нь байх
зарчмыг хатуу баримталж ажиллана. Бидний амьсгалж байгаа агаар нэг. Амьдарч буй
хот нэг. Амьдралд тулгамдаж буй асуудал ч бас
нэг. Хотынхоо утаа, хог, бохирдлыг шийдээгүй хэрнээ хоосон намчирхаж,
хоорондоо тэмцэлдээд хол явахгүй гэдгийг хатуу сургаж, сануулсаар байна. 

Эдийн засгийн өсөлтөөрөө, хүний хөгжил, оюуны чадавхаараа, хот төлөвлөлтийн
дэвшилтэд бодлого шийдлээрээ, хүн амьдрахад таатай эрүүл аюулгүй нөхцлөөрөө
дэлхийд тэргүүлэх, Монгол хүн бүрийн бахархал болсон их хотыг хамтдаа цогцлоож,
хамтдаа хөгжүүлэх эрх үүрэг нь энэ танхимд суугаа төлөөлөгч та бидний төдийгүй,
нийслэлчүүдийн маань туйлын хүсэл, мөрөөдөл, хол зорих зам байх учиртай.
Хэдийгээр бид өөр нам, эсвэл, нийслэлийн есөн дүүрэг, 45 өөр тойргоос сонгогдсон
ч, иргэн бүр ажилтай, өрх бүр орлоготой, хүүхэд бүр инээд хөөртэй байгаасай
гэсэн нэгдмэл тэмүүлэлтэй нэг улсын, нэг хотын оршин суугчид. Цаашид аль ч
төвшинд олонх, цөөнхийнхөө оролцоог хангаж, аливааг зөвшилцөж, харилцан
ойлголцож, бодлого зорилгоо нэгтгэж, нэг хот нийтийн эрх ашиг, бодитой үр дүн
хамтын хөгжил гэсэн нийтлэг хэм хэмжээг баримтлан ажиллах нь бидний ирээдүйн
хөгжлийн гарц байх болно.

Зөв хандлага, хөдөлмөр зүтгэл, хөгжил гурав хүйн холбоотой байдаг. Ийм
нийслэлийн иргэн та ч зөвхөн хөгжлийг хүлээдэг, шаарддаг оршин суугч төдий бус
орц, гудамж, хороо, дүүрэг, хот тосгоныхоо хариуцлагатай иргэн нь байж сайн
сайхан амьдрах орчноо бүтээхэд гар, сэтгэл оролцдог их хотын иргэн хүнийхээ
үүргийг биелүүлэхийг энэ цаг, ирээдүй хойч үе минь биднээс шаардаж байна. Мөн
НИТХ-ын төлөөлөгчид иргэд сонгогчидтойгоо хамтран эрх үүргээ хэрэгжүүлэн
ажиллах боломжийг бүрдүүлж, оролцоог нь нэмэгдүүлэх шаардлага байна. 

Бид цаашид нийгмийн захиалга болсон нэн чухал ач холбогдолтой дараах
асуудлуудыг цаг алдалгүй шийдвэрлэх ёстой. 

Үүнд:

-Нийслэлийн төр захиргааны байгууллагын бүтэц зохион байгуулалтыг шинэчилж,
оновчтой зохион байгуулах, албан тушаалтны эрх үүрэг, хариуцлагыг тодорхой
болгож, хүний нөөц, боловсон хүчний мэргэжлийн ур чадвар, ажлын гүйцэтгэл
бүтээмжийг нэмэгдүүлж, хариуцлага, ёс зүй, сахилга батыг дээшлүүлж, хүнд
суртал, авлига, хээл хахууль, тендерийн цавчааг шат шатанд таслан зогсоох явдал юм.

-Цаашлаад хот төлөвлөлтийн хоцрогдсон сэтгэлгээ, хуучирсан арга барилыг
халж, хөгжлийн шинэ шийдэл бүхий хотын нэгдсэн стандартыг нийслэлд бий болгох,
орчин үеийн хот, дүүргийн хөгжлийн дараагийн үе шат болох ухаалаг хотын
шийдлийг зөвхөн интернетийн сүлжээ төдийхнөөр төсөөлөх бус интернет, холбоо
мэдээллийн шилдэг технологийг уялдуулан нэвтрүүлэх,

-Гэр хорооллын хөгжил, орон сууцжуулах хөтөлбөрийн шийдлүүдийг оновчтой
тодорхойлж эрчимтэй хэрэгжүүлэх, утаа агаарын бохирдлыг бууруулах ажлыг эрчимжүүлж,
цэвэрлэх байгууламжуудыг шинэчлэх ажлыг яаралтай эхлүүлэх,

-Зам дэд бүтэц, нийтийн тээврийн томоохон төслүүдийг урагшлуулж, замын
ачааллыг бууруулж, нэвтрэх чадамжийг
сайжруулах,

-Жишиг хот дүүргүүдийг бий болгох,

-Гадаад дотоодын хөрөнгө оруулалт, төр, хувийн хэвшлийн түншлэлүүдийг үгээр
биш үйлдлээр дэмжиж бодитой хэрэгжүүлэх, нийслэлийн төсөв санхүүгийн эх
үүсвэрийг нэмэгдүүлж, үргүй зардлыг багасгаж, санхүү хөрөнгө оруулалтын
чадавхийг бэхжүүлэх,

-УИХ, Засгийн газартайгаа хамтран ажиллаж, нийслэлийн хууль эрхзүйн орчныг
сайжруулах зэрэг хийж гүйцэтгэх томоохон ажлууд байна.

Үүнээс гадна аль эрт шийдвэрлэгдсэн байх ёстой боловч өнөөдрийг хүртэл
бидний өдөр тутмын амьдралд байнга эрсдэл дагуулж, орчин үеийн хотын наад захын
ахуйн хэрэглээ, шаардлага болох худаг ус, дулаан цахилгаан, зам гэрэлтүүлэгтэй
холбоотой олон арван асуудлыг яаралтайгаа шийдвэрлэх шаардлага байна. Энэ
бүхний үндэс суурь нь нийслэлийн засаглалыг чадавхжуулж, эдийн засаг нийгмийн
бодлого төлөвлөгөөгөө дотоодын нөөц бололцоо, давуу болон сул талууд, эерэг,
сөрөг нөхцөл байдлууд, гадаад дотоод хүчин зүйлүүд, ирээдүйд хүрэх зорилттойгоо
уялдуулсан цогц шийдэл юм. 

Энэ хүрээнд НИТХ-аас баталсан төлөвлөгөөнд хөгжлийн гэх тодотголтой
хөтөлбөрүүдээ дахин сайтар нягталж, хэрэгцээ шаардлага, ач холбогдол, өнөөгийн
хөрөнгө мөнгө, санхүүгийн боломж, эх үүсвэр, ирээдүйн үр өгөөж зэргийг тооцож,
эргэн харж, хэлэлцэн шийдвэрлэх ажил ч бас байна. Ингэхдээ зөв зүйтэйг нь хүний
өөрийн нам, манайх, танайх эхлүүлэх гэж өмчилж, эсвэл үгүйсгэхгүйгээр,
гацаахгүйгээр үргэлжлүүлэхэд хүчээ нэгтгэж хамтдаа зүтгэх, тулгамдаад буй олон
асуудлаа хамтдаа шийдвэрлэж, ажил, амьдралаа цэгцэлж, хөгжин дэвжих нь
нийслэлчүүдийн чин хүсэл, хүлээлт гэдгийг та бид мартах ёсгүй. 

Эрхэм хүндэт төлөөлөгчид өө,

Та бидний эх орноо, эгэл түмнээ, эх хотоо гэсэн уужим сэтгэл, улс төрийн
холч ухаан улсын нийслэл Улаанбаатарын минь ирээдүйн хөгжил, өнгө төрхөд асар
их үүргийг гүйцэтгэнэ. Монгол Улсын минь нийслэл мандан бадрах болтугай. Та
бүхэндээ аз жаргал сайн сайхан бүхнийг хүсэн ерөөе. Баярлалаа.