Баяртай, бурхны хүү

 

 

Түүний
бөмбөг эзэмшилт, тоглолт удирдан чиглүүлэх, манлайлах, сул орон зайг харах,
эцсийн мөчид зөв шийдвэр гаргах энэ бүх авьяас бол гайхамшиг. Бүр байж болох
хамгийн дээд түвшинд тоглодог хөлбөмбөгчин гэж мэргэжилтнүүд нэгэн дуугаар
хүлээн зөвшөөрч байсан.Гэвч Кака өөрийн авьяас чадварыг хэзээ дөвийлгөж, гаргасан
амжилтаараа аархаж омогшиж байсангүй. Тийм ч учраас түүнийг хөлбөмбөгийн
ертөнцөд үлгэр дуурайлал болох нэгэн хэмээн өргөмжилдөг байв.

Би
бурхны хүүг АЦ Милан багт тоглож байхад нь танилцаж билээ. Үнэндээ зурагтны
цаанаас, эсвэл интернетээс л түүний тухай олж үзсэн мэдээллээ танилцсан гэж бичиж
байгаа минь энэ. Тэр намайг хөлбөмбөгт дурлуулж, италийн багийг дэмжихэд
хүргэсэн. Андрей Перлогоос Пато хүртэл милан дайчин цэргүүдийг таних хэдий ч
энэ эгэл даруу залуу яагаад хөлбөмбөгчин болсон юм бол гэх бодолд эзлэгдэж
байснаа одоо ч тодхон санаж байна. Тэр хөлбөмбөгчдөөс тэс өөр нэгэн. Яах вэ,
тэр бусдыг бодвол чинээлэг айлын ууган хүү. Тэр хэзээ ч өлсөж, даарч, аливаа
зүйлсээр дутагдаж байгаагүй. Мөн шавар, шавхайтай гудманд халтар бөмбөг өшиглөж
яваагүй. Тэр сэхээтэн айл хүү шиг сурч боловсорч, хажуугаар нь залбирна. Хэр
баргийн хүнд баймгүй тэсвэр хатуужил, ухаалаг, зарчимч байдал, зорьсондоо
хүрэхийн төлөө бүхний дайчилдаг шаргуу зан сэхээтэн залууд байв. 

 

Рикардо
долоон настай байхдаа Сан-Паулугийн Альфавилль гэх орон нутгийн өсвөрийн
хөлбөмбөгийн багт тоглож эхэлснээр замнал нь эхэлсэн юм. Энэ үед Сан-Паулу
багийнхан түүнийг анзаарч, гэрээ хүртэл байгуулж байв. Гэвч 18 насандаа усанд
сэлж байгаад нугасандаа хүнд гэмтэл авч, хөгжлийн бэрхшээлтэй болох магадлалтай
байдалд хүрсэн юм. Хэрвээ тийм зүйл тохиолдсон бол өнөөдөр би энэ дурсамжийг
бичиж, бурхны хүүгээр хэрхэн бахархаж явдгаа хуваалцахгүй л байлаа. Магадгүй
хөлбөмбөг гэгч спортыг сонирхох ч үгүй байсан биз. Одоо ч тийм айхтар үзэж,
хорхойсдоггүй л дээ. Гэхдээ улаан хар өмсгөл харагдвал түр азнаж үзэх нь бий. Намайг ийм зүйлд
уруу татсан хүн бол нугасаа гэмтээсэн ч гайхамшигаар эдгэрсэн Кака юм. Тэр одоо
ч өөрийнхөө эдгэсэн явдлыг гайхамшиг хэмээн тайлбарлаж, бурхантай холбон
ярьсаар байгаа. 

Мөн хаалганд гоолдох бүртээ залбирч, олсон
орлого бүрийнхээ арван хувийг сүмд хандивласаар уламжлал болжээ. Ухаалаг
залуугийн сонголт ч ухаалаг байж хүүхэд насны хайр болох Каролайне Келикотой
2005 оны 12 дугаар сарын 23-нд Сан-Паулу хотын сүмд гэрлэсэн юм.

 

Кака Испанийн эзэн хааны Реал мадридад Кристиано
Рональдотой нэг багт хүчин зүтгэж байлаа. Зидан, Пиго, Раул нар шиг нэг цаг
үеийн өнгийг тодорхойлж байсан хоёр залуу нэг багт ирсэн нь тухайн үеийн
хамгийн том шуугиануудын нэг байсан юм. Энэ үед л хоёр царайлаг залууг
харьцуулан бичигчид олширч байв. Рональдо элдэв асуудалд нэр холбогдсоор. Харин
Кака нам гүмхэн амьдарсаар. Гэвч Кака бид хоёр дахин хөлбөмбөгөөр уулзалдаж
чадахгүй болчихлоо.

Тэрээр Орландо Сити багаар хөлбөмбөгчний карьераа дуусгаж,
зодог тайллаа. Надад тийм ч муухай санагдсангүй. Түүнийг зодог тайлахад уйлж байгаа олон сая
хөлбөмбөгийн фенүүдийнх нь хажууд би хэн ч биш. Гэхдээ Кака гэх нэрийг сонссон цагаасаа өдийг хүртэл тамирчных нь хувьд, эгэл хүнийх нь хувьд үргэлж
дэмжсээр, үргэлж бахархсаар ирсэн. Цаашид ч тийм л байх болно. Харин одоо хөлбөмбөгчин, бурхны хүүд баяртай гэж хэлэх цаг
болжээ. Эсрэгээрээ бизнесмэн, хоёр хүүхдийн эцэг, бурхны хүү Рикардо Изексон дос Сантос Лейти/Кака/-д
сайн байна уу гэж хэлье.