МАХН-ын их чуулганыг О.Баасанхүүгийн эсрэг цуглаан болно гэв

 

МАХН-ын
дарга асан Н.Энхбаяр тэргүүтэй хүмүүс тус намын II Их Чуулганд оролцсон
хүмүүсийн эрүүл мэнд, амь насанд заналхийлсэн талаар МАХН-ын гишүүд хэвлэлийн
бага хурал хийлээ.

 

УИХ-ын гишүүн О.Баасанхүү
тэргүүтэй МАХН-ын гишүүд өнгөрсөн арванхоёрдугаар сард МАХН-ын II их хурлыг
зохион байгуулж, намын даргаа сонгосон. Гэвч энэ хурлыг МАХН-ын дарга Н.Энхбаяр
тэргүүтэй гишүүд хууль бус гэж үзэж байгаагаа илэрхийлсэн бөгөөд Дээд шүүхээс О.Баасанхүүг намын даргаар
бүртгэхээс татгалзаад буй. Н.Энхбаяр тэргүүтнүүд хуулийн байгууллагад нөлөөлж, түүнчлэн тус хуралд оролцсон МАХН-ын жирийн гишүүдийг
зодох, дарамтлах зэргээр хууль бус үйлдэл хийж байна гэж хэвлэлийн хурлын үеэр мэдээллээ.

МАХН-ын их чуулганыг маргаашнаас хийнэ гэсэн яриа байгаа
аж. Харин энэ чуулганыг О.Баасанхүүгийн эсрэг цуглаан болно гэж үзэж байгаагаа
илэрхийлж байлаа. Түүнчлэн их хуралд МАХН-ын анхан шатны байгууллагын
гишүүдээс сонголт хийгээгүй, намын бус хүмүүст мөнгө төлж, оролцуулах гэж
байна. Тиймээс хууль бус II их хурлыг зохион байгуулж байгааг нь холбогдох
хуулийн байгууллагад өгнө гэдгээ МАХН-ын гишүүд мэдэгдсэн юм. Өнгөрсөн сарын 19-нд болсон шүүх хурлаас
хойш болон үүнээс өмнө их чуулганы үед удаа дараа гишүүдээ дарамталсан,
доромжилсон, УИХ-ын ганц гишүүнээ зодсон, дайрч давшилсан ийм байдалд байгаа
гэлээ. Ганц гишүүнээ намаас хөөсөн гэдэг яриа гаргаад УИХ-ын гишүүнд жилд нэг
удаа олгодог 10 сая төгрөгийг өөрсдөө авч идсэн, ашигласан байгаа хэмээн ярьж
байв. Хэрэв намаас хассан бол энэ мөнгийг нь өгөх ёстой гэв.

Мөн МАХН-ын хоёрдугаар их хурал
намын дүрэм баримталдаг, хууль журмын дагуу хурал зохион байгуулсан УИХ-ын
гишүүн О.Баасанхүү болон бусад гишүүдийг оролцуулахгүйгээр хурлаа зохион
байгуулж байгаад харамсаж байгаагаа
илэрхийлсэн юм. МАХН-ын дарга Н.Энхбаяр бол шударга бус үйлдлийг хийж, намын
дүрмийн дагуу нэг ч удаа хариуцлага тооцож үзээгүй, өөрийнхөө эрх ашгийн төлөө
намын жирийн гишүүдийн эрх ашиг, цаашлаад ард түмний төлөө ажиллаж чадахгүй хэмээн тодотгож байлаа.