Олон улсын эмэгтэйчүүдийн эрхийг хамгаалах өдрийн хүрээнд дэлхийн 70 гаруй оронд зохион байгуулагддаг “Join Me on the Bridge” олон улсын хөдөлгөөнийг Монголын Залуучуудын Холбоо 4 дэх жилдээ “Хүчирхэг эмэгтэйчүүд амар тайвны гүүр болдог” нэрийн дор зохион байгуулах гэж байна.
Энэхүү арга хэмжээний үр нөлөө нь эмэгтэйчүүдийн оролцоог нийгэмд нэмэгдүүлэх, эмэгтэйчүүдэд тулгамдаад байгаа асуудлын талаар ярилцаж дуу хоолойг нь нийтэд хүргэх нөлөөллийн томоохон арга хэмжээ болдог билээ. Энэ жилийн эмэгтэйчүүдийн эрхийг хамгаалах тайван жагсаалыг МЗХ-ноос Монгол улсад амьдарч, хөдөлмөрлөж, сурч байгаа гадаадын оюутан залуусыг хамруулж “Нэг дэлхий–Нэг хүсэл” уриан дор өөр өөрсдийн үндэсний хувцасаар жигдэрч, тулгамдаж байгаа асуудлаа нэгтгэн хүргэхээр болжээ.
Тайван жагсаал 3 сарын 8-ны өдөр 11:00 цагаас МЗХ-ны төв байрнаас эхэлж Энхтайвны гүүр- Сүхбаатарын талбай-МЗХ-ны төв байр гэсэн маршрутаар жагсаал өрнөх бөгөөд оролцогчид “Үндэсний хувцастай” оролцох, эмэгтэйчүүдийн эрхийг хамгаалах, нийгэмд хэлэхийг хүссэн үгээ пайз болон даавуун дээр бичиж ирэхийг зохион байгуулагчдын зүгээс хүсч байна. Та өөрийнхөө болон бусдыг эрхийг хүндэтгэж тайван жагсаалд оролцоорой, жагсаалд оролцохыг хүссэн хүн бүрт нээлттэй.
