МАХН-аас цаг үеийн асуудлаар мэдээлэл хийхээр өнөөдөр хэвлэлийн бага хурал зарласан юм. Хэвлэлийн хуралд МАХН-ын дэд дарга С.Ганбаатар, Ц.Оюунбаатар тэргүүтэй төлөөллүүд оролцлоо.
Улс төрийн дөрвөн нам Монгол оронд байгаа бэрхшээлтэй, хүнд нөхцөл байдлыг өөрчлөхийн төлөө хамтран ажиллахаар болж, хамтын ажиллагааны Тунхаг бичгийг үзэглэх үйл ажиллагааг маргааш Хөх тэнгэр цогцолборт зохион байгуулах болсон тухай энэ үеэр албан ёсоор мэдэгдлээ.
Энэ талаар Ц.Оюунбаатар хэлсэн үгэндээ “Монгол хүн бүр намын харьяалалгүйгээр эх орондоо аз жаргалтай амьдрах гарц үүдийг нээх, эрдэмтэн судлаачдын боловсруулсан Бүгд Найрамдах Монгол Улсын шинэ дээд Үндсэн хуулийг дэмжих тунхаг гаргах арга хэмжээ болох юм. Монголчууд нэг зүгт харж, эв нэгдэлтэй, хөгжлийн эрчимтэй бодлоготой явахгүй бол дэлхийн улс орнуудаас, түүний дотор хоёр хөрш улсаас хол хоцорч, үндэсний аюулгүй байдал, ирээдүй маань маш бүрхэг болж байгаа. Бид энэ аюултай нөхцөл байдлаас гарах гарцыг олж, улс төрийн бүх намуудад хандаж байгаа. Үүний эхний ээлжинд Монголын Ногоон Нам, Монголын Үндэсний Ардчилсан Нам, Монголын Иргэний Зориг-Ногоон Нам хамтран тунхаг бичигт гарын үсэг зурна. Цаашдаа МАН, АН, бусад иргэний байгууллагууд, төрийн бус байгууллагууд энэ асуудал дээр биднийг дэмжиж, нэгэн зүгт нэгэн бодлогоор ажиллана гэдэгт итгэж, уриалж байгаа. ” гэлээ.
Энэхүү Шинэ дээд үндсэн хуулийн үзэл баримтлалд “Уул уурхайн баялаг ард түмний дундын өмч байна” гэсэн зүйл заалт орсон аж. Энэ тухай С.Ганбаатар тайлбарлахдаа “Ард түмнээ ядууруулан, цөхрүүлэн, зовоон байж Оюутолгойн дулааны гэрээг ярьж байна. Гэхдээ дулаан гэрээг байгуулж байхад 4,2 тэрбум доллар Монголд орж ирнэ гэж байсан. Хаа байна? Оюутолгойн гэрээг байгуулж байхад Монгол оронд ямар ч эрсдэлгүй гэрээ байгуулж байна гэж ярьж байсан. Хаа байна? Одоо Монголын эдийн засаг, өрийн байдал дэлхийн улс орнуудын хамгийн эрсдэлтэйд тооцогдоод явж байгаа. Энэ болгоныг Шинэ дээд үндсэн хуулийн “Уул уурхайн баялгаа ард түмэн мэдье” гэсэн үзэл санаан дээр тусгаж, үүнд улс төрийн хүчнүүд нэгдэж байгаагаа маргааш тунхаглахаар зорьж байна.” гэв.
Үүний дараа тэд сэтгүүлчдийн асуултад хариуллаа.
-Өчигдөр Дээд шүүх МАХН-ын мөрийн хөтөлбөрийн өөрчлөлтийг бүртгэхээс татгалзсан. Шалтгаан нь мөрийн хөтөлбөртөө Шинэ дээд үндсэн хуулийг батална гэж оруулсан нь Үндсэн хууль зөрчсөн гэсэн тайлбар бий. Энэ талаар тайлбар өгөөч.
-Үндсэн хуулийн төслийг ямар ч хувь хүн, ямар ч байгууллага, нам, улс төрийн хүчин ярьж, төслийн талаар ард иргэдээсээ санал авч ярилцах эрхтэй, ямар ч хуулинд хориглоогүй. Мөн МАХН 21-р зууны II их хурлаа ард түмнийхээ өмнө нээлттэйгээр, ардчилсан байдлаар нийт гишүүдтэйгээ хамтарч хийсэн. Ингээд их хурлаар баталсан манай мөрийн хөтөлбөр, дүрмийн өөрчлөлтийн талаар Дээд шүүхэд бүртгэлийн үйл ажиллагаа явж байгаа. Дээд шүүх бүртгэлийн үйл ажиллагаа явуулах болохоос намын дотоод асуудал руу орохгүй. Намыг шүүх гэж Дээд шүүх байгаа юм биш. Ойрын үед бүртгэлийн үйл ажиллагаа амжилттай болно гэж бодож байгаа. Аж ахуйн нэгж байгууллага бүртгэл хийлгэдэг шиг баримт бичиг дутуу байна, бүрэн бус байнаа гэвэл нөхөөд өгдөг бүртгэлийн л ажил. Тиймээс сүр бадруулах асуудал байхгүй.
-Намын шинэ дүрмээр О.Баасанхүүг хөөх үү? Танай намын гишүүн Г.Шийлэгдамбын араас та бүхэн явах уу?
-О.Баасанхүү гэдэг хувь хүний асуудал манай намын их чуулган дээр нэг ч газар яригдаагүй. Ач холбогдол өгөөд байгаа юм бидэнд байхгүй. Хэрэв тийм асуудал сонссон бол тэр хүнээсээ асуугаарай. Зарим нэг өндөр албан тушаалд байсан хүмүүсийг хэрэгт холбогдуулж шалгасан, шийтгэл оногдуулсан асуудал дээр мэргэжлийн хүмүүс, хуульчид л ажиллана. Улс төрийн нам бол өмгөөллийн байгууллага биш. Мэдээж хүндээ анхаарал тавих нь байдаг зүйл.
-2017 оны аравдугаар сарын үед МАХН-ын дүрэмдээ өөрчлөлт оруулахаар Дээд шүүхэд хандаж байсан. Тэнд аливаа сонгуулийн үеэр намын эсрэг ажилласан бол гэсэн заалт байсан. Энэ удаагийн дүрэмд иймэрхүү заалтууд орсон уу? Хэрэв орсон бол О.Баасанхүү гишүүн намаас хасагдах юм биш үү?
-Энэ дүрэмд МАН, АН-ын мөрдөж байгаа дүрэмд заагдсан улс төрийн эсрэг үйл ажиллагаа явуулсан, намын дүрэм, журам зөрчсөн нөхцөлд хариуцлага хүлээлгэнэ, үүний дотор намаас хөөх ямар ч асуудал яриагүй. Шинэчилсэн энэ дүрэмд ямар нэгэн Үндсэн хууль, улс төрийн намын хууль зөрчсөн тухай асуудал яригдаагүй.
