Дорнод аймаг дахь цагдаагийн газрын жижүүрийн шуурхай албанд Хэрлэн сумын 4 дүгээр багт оршин суух иргэн Т 2018 оны гуравдугаар сарын 17-ны шөнө 03:05 цагийн орчимд Цагдаагийн газарт өөрийн биеэр ирж “9 настай миний зээ охин Ж нь 2018 оны гуравдугаар сарын 16-ны орой 17 цагийн орчимд хичээлээ тараад одоог хүртэл гэртээ ирэхгүй, хаана байгаа нь мэдэгдэхгүй байна” гэсэн дуудлага мэдээлэл ирүүлсний дагуу жижүүрийн бүрэлдэхүүн хүлээн авч хойшлуулашгүй ажиллагаа хийж, Эрүүгийн цагдаа, Мөрдөн байцаах тасгийн алба хаагч нар эрэн сурвалжлах ажлыг 07:00 цаг хүртэл зохион байгуулж ажиллажээ.
2018 оны гуравдугаар сарын 17–ны 07:00 цагт Цагдаагийн газрын нийт бие бүрэлдэхүүн Ц-111 дохиогоор түргэн цугларалт зарлан охины талаарх мэдээллийг Цагдаагийн газрын нийт алба хаагчид болон аймгийн Онцгой байдлын 20 албан хаагчдад зарлан мэдээлж, Цагдаагийн газрын даргаар удирдуулсан нийт 120 алба хаагч эрэн сурвалжилж, жижүүрийн бүрэлдэхүүн 2018 оны гуравдугаар сарын 17-ны өглөө 09:00 цагийн үед найзынх нь гэрээс гараад явж байхад олж тогтоон ар гэрийнхэнд нь хүлээлгэн өгчээ.
Охин Ж тайлбарласнаар 2018 оны гуравдугаар сарын 16-ны өдөр сургууль дээр хичээлтэй байж байгаад 17 цагийн орчимд тараад гэр лүүгээ ганцаараа явсан байна. Өөрийн гэрт нь хүн байхгүй, гэрийнхээ түлхүүрийг хайсан боловч олдохгүй, мөн нагац эгчийндээ ирэхэд гэр нь цоожтой байсан тул ангийн найз Э-ийн гэрт 18 цагийн үед очоод тэндээ хоносон аж. Найз Э болон түүний ахын гар утсаар эмээгийнхээ гар утас руу залгахад утсаа авахгүй байсан учраас охин тэндээ хоносон гэжээ.
Эцэг эхчүүд та бүхэн насанд хүрээгүй хүмүүст тавих анхаарлаа сайжруулж, хүүхдүүд гэртээ хонохгүй тохиолдолд заавал эцэг эхдээ мэдэгдэж байхыг цагдаагийн байгууллагаас анхааруулан сэрэмжлүүлж байна.
9 настай охиныг найзынхаас нь олжээ
}
Шинэ мэдээ
