Л.Баянбат: Ц.Баатарсайхан татгалзвал дуудлага худалдааг дахин зарлана

\”Улаанбаатар таймс” сонины хэвлэх үйлдвэрийн барилгыг дуудлага худалдаанаас 24 тэрбум төгрөгөөр худалдаж авах санал өгсөн Абдул Карим гэрээгээ цуцлах болсон талаараа мэдэгдсэн. Энэ талаар нийслэлийн Өмчийн харилцааны газрын хэвлэл мэдээллийн ажилтан Л.Баянбатаас тодрууллаа.

 

-Хэвлэх үйлдвэрийн барилгыг худалдаж авсан Абдул Карим тус газрыг авахаа болилоо гэх мэдээлэл байна. Яагаад гэрээгээ цуцлах болов?

 

-Хэвлэх үйлдвэрийн газрын дуудлага худалдаанд ялалт байгуулсан Абдул Карим гэх хүн өчигдөр албан ёсоор тус газрыг авахаа больсон талаарх өргөдлөө бие төлөөлөгчөөрөө дамжуулан нийслэлийн Өмчийн харилцааны газарт өглөө. Хувьчлалын асуудлаасаа татгалзаж байгаа гол шалтгаан нь хэвлэл, мэдээллээр өөрийнх нь тухай буруу, ташаа мэдээлэл гарч, мөн маш их дарамтад орсноос болсон гэсэн. Хамгийн гол нь гэр бүлийнхэн, дотны хүмүүстэйгээ ярилцсаны үндсэнд татгалзах шийдвэр гаргаж байгаа юм байна. Ер нь хэвлэх үйлдвэрийн газрын дуудлага худалдаа нийслэлд зохион байгуулсан өмч хувьчлалын томоохон ажил. 24 тэрбум гэдэг бага мөнгө биш. Энэ бол гаднын хөрөнгийг татах маш том боломж. Энэ хүн хувьчлалаас татгалзна гэдэг бол нийслэлийн хувьд харамсмаар зүйл.

 

-Дараагийн үнийн санал хэлсэн хүн уг газрыг авах боломжтой юу. Эсвэл дахин дуудлага худалдааг зохион байгуулах уу?

 

-Дуудлага худалдааг дахин зарлалгүйгээр дараагийн үнийн санал тавьсан хүнд нийслэлийн Өмчийн харилцааны газраас албан ёсоор санал тавина. Тодруулбал, \”Таван богд” группийн захирал Ц.Баатарсайхан 23 тэрбум 850 сая төгрөгийн санал тавьсан байгаа. Энэ хүн худалдаж авахыг зөвшөөрвөл дуудлага худалдаа өндөрлөнө. Хэрэв саналыг хүлээж авахгүй татгалзвал дуудлага худалдааг зохион байгуулах дараагийн арга хэмжээнд орно. Дуудлага худалдаа зарлах асуудлыг ажлын 15 хоногт явуулах боломжтой байдаг.

 

-Абдул Каримын дуудлага худалдааны дэнчинд өгсөн 710 сая төгрөгийг буцаан өгөх үү?

 

-Дуудлага худалдаа явуулах журамд дэнчингийн мөнгийг буцаан олгохгүй гэж заасан байдаг. Энэхүү том обьектыг дуудлага худалдаагаар зарж байна гэдэг бол өдөр болгон зохион байгуулдаг ажил биш. Энэ бол томоохон хэмжээний хөрөнгө мөнгө яригдаж байгаа том обьект. Тиймээс өмч хувьчилж авахаас татгалзсан Абдул Каримын дэнчинд тавьсан 710 сая төгрөгийг улсын орлого болгож авна.

 

М.Энх

unen.mn