\”Дэлхийн хамгийн
их агаарын бохирдолтой 10 хот”-ын жагсаалтад тогтмол багтаж, эхний байрын төлөө
Хятадын Бээжин, Энэтхэгийн Дели хоттой өрсөлдөж
байсан Улаанбаатар хот ялалт байгуулж, анти амжилтын эзэн болохын зэрэгцээ
ардах хотуудаасаа тасрах дүр зураг ажиглагдав. Учир нь, энэ жил улсын төсвөөс
агаарын бохирдолд анх удаагаа хөрөнгө төсөвлөөгүй бөгөөд хувааж иддэг ч гэсэн
агаарын бохирдолтойгоо тэмцэж байсан бол одоо зүгээр сул тавиж орхилоо.

Сүүлийн
үед дэлхий дахинаа ихээхэн моодонд ороод буй \”аpocalypse” /ертөнцийн төгсгөл/
гэдэг үгийг гаднынхан агаарын бохирдлын улмаас мөхөж болзошгүй Монгол Улсад \”аirpocalypse”
хэмээн ашиглах болжээ. Баттай эх сурвалжийн мэдээллээр нэгэн үе дэлхийн хамгийн их агаарын
бохирдолтой хот байсан Бээжин гуравдугаар байр уруу ухарсан бол Улаанбаатар
тэргүүн байр луу дэвшсэн байна. Улаанбаатар хот өнгөрөгч 11 дүгээр сарын
байдлаар агаарын бохирдлын түвшингээр Бээжинг түрүүлж, гамшгийн хэмжээнд
хүрчээ. Ингэхдээ Дэлхийн эрүүл мэндийн байгууллага /ДЭМБ/-аас тогтоосон агаарын
бохирдлын түвшингээс 25 дахин өндөр байсан байна. Харин энэ үед Бээжин хотын
агаарын бохирдол ДЭМБ-аас тогтоосон хэмжээнээс 21, Дели 24 дахин их байжээ. Тэгвэл
Монгол Улсын Засгийн газрын \”Agaar.mn” сайтад энэ сарын 5-нд Улаанбаатар хотын агаарын чанарын индекс өнгөрөгч
11 дүгээр сард 500 гарантай байсныг дурджээ.

Олон улсад агаарын чанарын
индексийн хэвийн хэмжээг 50 байдаг гэж үзвэл Монгол Улс ДЭМБ-ийн судалгаанаас
хол зөрж 25 дахин бус ердөө 10 дахин их байгаа аж. Тэгвэл зарим үед өглөөний
09:00, оройн 21:00 цагийн үед агаарын чанарын индекс нь хотын төв хэсэгт 2685 хүрдэг
Улаанбаатарыг яах вэ. Агаарын чанарын индекс буюу агаар дахь хатуу биетийн
хэмжээ нэг шоо метрт 622 микрограмм хүрэхэд л тухайн улсад уушигны хавдар,
зүрхний өвчин зэрэг амьсгалын дээд зам, тархи, судас зэрэг хүчилтөрөгчөөр тэжээгддэг хүний бүхий л эд эрхтний өвчлөл тэргүүлээд эхэлдэг байна.