![\"\"](http://undesten.mn/uploads/posts/2015-12/1449594281_nambur-one.jpg "\\"\\"")
Ойрын үед хэвлэл мэдээллээр МАХН-ын дарга Н.Энхбаяр Монгол улсын Шадар сайд болох гэж байгаа тухай мэдээлэл чих дэлслээ. Магадгүй та энэхүү мэдээллийг сонсоод худал биз, ташаа мэдээлэл байх гэж эргэлзэж байна уу.
Гэхдээ энэ мэдээлэл үнэн ажээ. Н.Энхбаяр гэдэг хүн засагт орж ажиллахын тулд байж болох хамгийн сүүлчийн хөзрөө дэлгэсэн нь энэ.
Н.Энхбаяр хийж чадах \”ажил” гэж байдаг. Тэрээр яг үнэндээ одоо бол Ерөнхийлөгчийн уучлалтаар суллагдсан \”ялтан”. Түүнд Монголын төр хараахан өршөөл үзүүлээгүй. Засагт хамтран ажиллаж байгаа МАХН-ынхан бараг л Н.Энхбаяр гэдэг хүнд зориулан \”Өршөөлийн хууль” санаачилсан нь золтой л батлагдчихсангүй. Иймдээ өршөөлд хамрагдаж чадаагүй \”уучлуулсан гэмт хэрэгтэн” Н.Энхбаяр ууртай байна.
Эрүүгийн рецитив гэмт хэрэгтнүүд гэмт хэргээ дахин үйлдэхдээ нарийн зохион байгуулалттай үйлддэг бол Н.Энхбаяр төрийг өөрийн өшөө авах гэмт хэргийнхээ \”төлөвлөгөөний хэсэг” болгож байна.
Түүнийг авлигын гэмт хэрэгт холбоотойг шүүхээс тогтоосон, дараа нь хоригдсон, ялаа эдэлсэн, төд удалгүй Монгол улсын Ерөнхийлөгч Ц.Элбэгдоржийн уучлалаар суллагдсан. Суллагдсан даруйдаа Солонгос улсад эмчлүүлэх нэрээр жил гаруй удсан. Дараа нь эх орондоо \”салхилах” гэж ирсэн.
Н.Энхбаяр гэдэг хүн нэгэн цагт бараг л Монголын \”хаан” байлаа. Тэрбээр төрийн 3 том албан тушаал болох УИХ-ын дарга, Ерөнхий сайд, Ерөнхийлөгчийн үүрэгт ажлыг хашиж байсан Монголын цорын ганц хүн. Түүнд Монгол төр байж болох, хийж болох, хэрэгжүүлж болох бүхий л эрх мэдлийг өгсөн.
Гэвч түүнд энэ хангалттгүй бололтой. Яг л алтан загасны үлгэрт гардаг шунал ихт эмгэн шиг Н.Энхбаяр одоо Монгол улсын Шадар сайдын албан тушаалыг \”авна” гэнээ. Авах авахдаа гуйж биш, гуядаж авах юм байна.
Ч.Сайханбилэгийн тэргүүлсэн \”Шийдлийн” гэх сүржин нэртэй ч яг улс орны өмнө тулгадсан асуудлыгг шийдээд байсан юмгүй Засгийн газар танхим дотроо шийдэхэд хүндрэлтэй асуудалд уначихаад байна. Н.Энхбаяр шадар сайд болно гэжээ.
Хэрвээ Засгийн газар, АН Н.Энхбаярын дээрх \”хүсэлтийг” биелүүлэхгүй бол өөрсдийн нь ирээдүй хүндхэн нөхцөлд орчихоод байгаа юм.
Н.Энхбаярын захиа зааврөөр МАХН өнгөрсөн намраас эхлэн Өршөөлийн хуулийг УИХ-аар батлуулахаар зүтгүүлсэн ч Ерөнхийлөгч Ц.Элбэгдоржийн хоригоос улбаатайгаар парламент унагасан. Үүнд хонзогносон Н.Энхбаяр Эрүүл мэнд, спортын сайд Г.Шийлэгдамбаараа \”туг тахин” байж, Шадар сайд болно гэж зүтгэжээ. Зүтгэжээ ч гэж дээ аль эртнээс өөрөө төлөвлөн зохион байгуулжээ. Ийм нарийн зохион байгуулалтыг Н.Энхбаяраас өөр хэн ч хийж чадахгүй гэдгийг МАХН-ын Ерөнхий нарийн бичгийн Б.Тулга тэргүүтэй залуусын хэн нь ч гадарлахгүй, гадарлаад нь ухаан нь хүрэхгүй. Н.Энхбаяр өөрт нь хэрэгтэй бол энэ мэт залуусыг \”дагуулж тонгороод” хэн ч биш болгоно гэдгийг \”даргаа шүтсэн, албан тушаалд хүлэгдсэн” хөөрсөн залуус олж харах сөхөөгүй явна.
АН, Ч.Сайханбилэгийн Засгийн газар Н.Энхбаярын өмнө \”арчаагаа” алдажбайна. Ингэх нь ч зүйн хэрэг. Хэрэв Н.Энхбаяр МАХН-аас авч Засгаас гарвал АН-ын Засгийн газар огцорно. Ингэсэн тохиолдолд АН засаг дахин байгуулахдаа МАН-д хандахаас өөр аргаагүйд хүрнэ. Гэвч тэд МАН-д дахин засагт хамтрах санал хүргэх \”нүүргүй” болсон. Тэгээд ч МАН-ын зүгээс АН-тай дахин хамтрахгүй гэдгээ нэгэнт \”зарлачихсан”. Ийм нөхцөлд АН-ын ганц аврал нь хүссэн хүсээгүй МАХН, товчхондоо бол Н.Энхбаяр.
МАХН-д намын дотоод ардчилал, Удирдах зөвлөлийн шийдвэр, энгийн гишүүдийн олонхийн санал, залуусын үзэл бодол энэ тэрээ гэсэн ойлголт байхгүй. МАХН бол үндсэндээ Н.Энхбаяр гэдэг хүний \”хувийн” нам. МАХН дотор дээр дооргүй Н.Энхбаярыг бурхан мэт шүтээстэй, түүний үгийг хаан мэт дагаастай. Гэвч үнэндээ Н.Энхбаяр бол бурхан биш, сайн удирдан манлайлагч ч биш, тэр бол зүгээр л хор найруулагч. Н.Энхбаяр. АН-ыг одоо хэрхэн боомлихоо Н.Энхбаяр хэнээр ч заалгахгүй сайн мэдэж байгаа.
Монголын төр Н.Энхбаяр гэдэг хүнд ямар өртэй болохоороо түүнийг дахин улс төрд найр тавин оруулж, Шадар сайд болгохдоо хүрнэ вэ?
Нэгэн цагт мандаж, нэгэн цагт гундаж явсан Н.Энхбаяр манайхаас өөр улс оронд бол хэдээнэ улс төрчийн хувьд \”тэтгэвэртээ” гарсан байх ёстой хүн. Харин бид түүнд дахин төрийн эрх мэдэл олгож, сэлэм эргүүлэх боломж өгөх гээд сууж байдаг. Харамсалтай нь одоогийн Засаг төрд Н.Энхбаяр шиг \”үнэ хүндтэй” хүн алга. Тэр энэ зангарагаа олйгож, төрийг эзэрхийлж , шадар сайд болохоор \”зүтгэж” байна.
Их эзэн Чингис хаан тэртээх 13-р зууны үед \”эрх мэдэлд шунасан хүнд төрийн жолоог бүү атгуул” хэмээн хэлж байсан гэдэг. Наанаа ард түмний төлөө, шударга ёсны төлөө, нийгмийн сайн сайхны төлөө гэж ярьж байгаа ч цаанаа МАН, АН-аас их өшөө авах сэтгэл нь хатгаж байгаа Н.Энхбаярт болдогсон бол төрийн \”жолоог” атгуулмааргүй байгаа юм.
Даанч тэрээр гуйж биш, гуядаад ороод ирлээ дээ…
Ц.Мөнх
![\"\"](http://undesten.mn/uploads/posts/2015-12/1449594242_11908190_978714392149702_1293824176_n.jpg "\\"\\"")
