Монголын үндэсний бөхийн холбооны хууль бус шийдвэрийн талаар тус холбооны удирдах зөвлөлийн гишүүд өнөөдөр мэдээлэл хийлээ.Шинээр байгуулагдсан Үндэсний бөхийн холбооны цэцдийн зөвлөлийн дарга Ү.Хүрэлбаатар ярихдаа “Нямдоржийн тэргүүлсэн Үндэсний бөхийн холбоо энэ сарын 24-нд ээлжит их эе хуралдуулна гэж байна. Яг үнэндээ энэ бөхийн холбоо ямар ч хурал хийх эрхзүйн чадамжгүйг гурван шатны шүүхээс тогтоосон. Шүүхийн шийдвэр гүйцэтгэх ажиллагаа явагдаж, тамга тэмдгийг нь хурааж авах үйл ажиллагаа явагдаж байгаа энэ үед тэд хууль бус хурал зарлаж, бөхчүүдийн барилдах эрхийг хасч байна гэх зэргээр олон нийтийг төөрөгдүүлж байгаа нь хууль бус юм. Монголын үндэсний бөхийн холбоо нэг л тэргүүнтэй. Тэр нь Л.Чинбат гэдгийг хэлмээр байна. Бид Нямдоржид хүндэтгэлтэй хандаж байгаа учраас тамга тэмдгээ хүчээр авч чадахгүй өдийг хүрсэн. Шүүхийн шийдвэр гүйцэтгэх ажиллагааг хүлээж өдийг хүрсэн. 2011 оны Дээд шүүхийн шийдвэрээр яг одоо хуралдаж байгаа тэргүүлэгчид, цэцдийн зөвлөл хүчингүй болчихсон. Тэгэхээр хүчингүй болсон хугацаанд гаргасан бүх шийдвэрүүд хүчингүй гэсэн үг. Өөрөөр хэлбэл дөрвөн бөхийн эрхийг хоёр жилээр хасах хууль зүйн үндэслэл Р.Нямдоржийн тэргүүлж байгаа Монголын үндэсний бөхийн холбоонд байхгүй.” гэв.
М.Хүдэрбаатар: Шүүхийн шийдвэрийг ураад сууж байгаа хүн зөвхөн Р. Нямдорж
Мөн Хэнтий аймгийн бөхийн холбооны тэргүүн М.Хүдэрбаатар “Бид зөвхөн бөхийн холбооны удирдлагыг нь гартаа авч, бөхийн өргөөг эзэмших гээд тэмцээд байгаа юм биш. Үндэсний бөх цаашид мэргэжлийн спорт болоод Японы сумо шиг өөрөө өөрсдийгөө санхүүжүүлдэг байх боломжийг хаагаад байгаа удирдлагуудын талаар яриад байгаа юм. Өнгөрсөн наадмын асуудлыг та бүхэн мэдэж байгаа. Гэтэл өнөөдөр XXI зуунд XIX зууны үеийн юм яриад зогсож байна. Техник технологи хөгжсөн энэ үед бичлэг дээр хэн нь түрүүлж унаж байгааг наад заах нь хараад барилдааныг шийдчихэж болно. Иймхэн юмыг шийдчихэж чадахгүй байна. Өнөөдөр иргэдийг оочирлуулаад билет зардаг газар бөхийн өргөөнөөс өөр Монголд байхгүй. Тиймээс л тэднийг халаагаа өгөө гэж шаардаад байгаа юм. Монголын үндэсний бөхийн холбоо зайлшгүй шинэчлэгдэх ёстой. Түүнээс биш бид албан тушаалын төлөө ингэж тэмцээд байгаа юм биш. Гуравдугаар сарын 24-нд болох хурал албан ёсных биш. Тиймээс энэ хуралд очиж болохгүй гэж бөхчүүддээ уриалмаар байна. Бөхчүүд Үндэсний бөхийн холбооны шинэчлэлтэй хөл нийлүүлж алхах хэрэгтэй гэж үзэж байна. Шүүхийн шийдвэрийг ураад сууж байгаа хүн зөвхөн Нямдорж. Энэ хүн яагаад Монголын Дээд шүүхээс илүү том толгойтой хүн болчхоод байгааг гайхаад байна” гэлээ.
Х.Баянмөнх: Муудалцсан бөхчүүдээсээ допинг илэрлээ гэдэг
Түүнчлэн хурлын үеэр Х.Баянмөнх аварга ярихдаа “Монгол үндэсний бөхийн холбооноос бөхчүүдийн нийгмийн асуудал, эрх, нэр төрийг хамгаалах талаар зохион байгуулж байгаа асуудал байхгүй. Харин ч нэр төрийг нь гутааж байна. Олимпын хөтөлбөрт багтсан спортын төрөлд допингийн шинжилгээ авдаг. Үндэсний спортдоо допингийн шинжилгээ авдаг улс байхгүй. Хоёрдугаарт шээсний шинжилгээ авлаа гэхэд тусгай хяналтын комисс авах ёстой. Гэтэл өдий арван хэдэн жил нэг эмч сувилагч хоёр л шээсний шинжилгээ авч байна. Бөхчүүд тэр хоёр эмчийн хажууд нолийн өрөө ороод хэний ч байж болох шээсийг саванд хийгээд өгчихөж байна. Тэрийг хэн ч мэдэхгүй. Хяналт байхгүй. Тэр шинжилгээг төрийн байгууллага аваад байна уу, хувийн байгууллага аваад байгаа юм уу бүү мэд. Тодорхой биш. Муудалцсан бөхчүүдээсээ допинг илэрлээ гэдэг. Нэг өрсөлдөгчийг гаргаж ирэхийн тулд нөгөө өрсөлдөгчөөс нь допинг гаргачихдаг. Өөрсдөд нь ая талтай хүмүүсээс допинг илэрвэл түүнийг нь нуудаг. Ингэж хүний эрхэнд халдаж балмад үйл ажиллагаа явуулж эхэллээ. Бөх хүн бие нь өвдвөл эмнэлэгт үзүүлж, эм ууж болохгүй, өвчнөө анагааж болохгүй нь байна шүү дээ. Энэ бол хууль зөрчсөн, хүний эрх зөрчсөн үйлдэл. Бөхчүүдийн нийгмийн асуудалд огт анхаардаггүй. Бөхчүүдэд урилга өгдөггүй, сайн дураараа ирж барилдахгүй бол хохь нь гэж ханддаг. Бөхчүүдийн төлөө, Монгол үндэсний бөхийн төлөө хийж байгаа ажил байхгүй. Харин ашиг хонжоо хайж, мөнгөний төлөө явж байгаа улсууд” гэлээ.
