Авлигатай тэмцэх газрын Мөрдөн шалгах хэлтэс С.Баярцогтын 9.2 сая ам.доллартай холбогдох эрүүгийн хэргийг Швейцарь улсын холбооны прокурорын газартай хамтран мөрдөн шалгах ажиллагааг явуулж байгааг бид урьд нь мэдээлж байсан билээ. Одоогоор тус байгууллага уг хэргийг прокурорын хяналт дор шалгаж байгаа юм. Тэгвэл С.Баярцогт өнөөдөр энэ асуудалтай холбогдуулан сэтгүүлчдэд мэдээлэл хийлээ.
Тэрээр хэлэхдээ “Оюутолгой төсөл бол Монголын олон хүнд ажил олгож, татварын дийлэнхийг бүрдүүлж, маш олон ноу-хау-г үлдээж байгаа төсөл. Мөнгөн дүнгээр үнэлж болохгүй маш олон зүйл бий. Тиймээс Оюутолгойн гэрээг хийсэн хүмүүсийг харддаг. Өнгөрсөн даваа гарагт олон улсын Ройтерс агентлагаар гарсан мэдээг манай хэвлэл мэдээллийн байгууллагууд хэсэгчлэн болон бүтнээр орчуулан хүргэсэн байсан. Мөн энэ асуудалтай холбогдуулан манай намын шийдвэр гарч, намайг намын гишүүнчлэлээс хассан талаар мэдээлэл өгсөн.
Энэ дагуу миний бие өнөөдөр та бүхэнтэй уулзаж байна.Маш олон хүнд эргэлзээ, хардлага байна. Энэ бүгдэд хариулт тайлбар өгөх ёстой. Манай хууль хүчний байгууллагууд энэ хэрэгт эрүүгийн хэрэг үүсгээд шалгаад явж байгаа. Би өдгөө АНУ-д оюутан болсон байгаа. Гэхдээ би энэ асуудалтай холбогдуулан сургуулиа хойшлуулаад энэ хэргийг эцэслэтэл Монголдоо байна. Оюутолгойн төсөл бол 70-100 жилийн настай том төсөл. Тиймээс олон хүн энэ төсөлтэй холбогдуулан тэр гэрээг байгуулхад оролцсон хүмүүсийг авлига, хээл хахууль авах магадлалтай гэж үзэж байгаа. Хардах эрх хүн бүхэнд бий. Би олон жилийн турш Монголд нэр хүндтэй, хариуцлагатай албан тушаал хашсан. Хүнд хэцүү шийдвэрүүдийг гаргаж байсан. Би өөрийгөө болон гэр бүлээ аваад явах оюун ухаан болон бизнесийн чадвартай.
Гэхдээ нэг зүйлд би их баяртай байгаа. Монголын Авлигатай тэмцэх газар, Швейцарын ерөнхий прокурорын газартай хамтраад энэ асуудал дээр эрүүгийн хэрэг үүсгээд шалгаж байгаа. Үүнийг би үнэн мөнийг нэг талд нь гаргаад шийдэх боломж гэж харж байна. Яагаад гэвэл манайхан өөрсөддөө итгэдэггүй. Данс Швейцарьт байсан учраас эргэлзээг тайлах боломж гарч байна.
Оюутолгой төслийг хэрэгжүүлэхээр “Рио Тинто”-той хэлэлцээрийг удирдаж байсан, хийсэн хүмүүсийг хардаж сэрдэх, муу сайнаар ярих зүйл ихээр гардаг.
Гэхдээ 2009 онд энэ төсөл дээр Засгийн газрыг төлөөлөн ажилласан хүмүүс Монгол улсынхаа төлөө чин сэтгэлээсээ чөмгөө дундартал зүтгэж ажиллаж хийсэн. Сайн гэрээ хийсэн. Төгс төгөлдөр зүйл гэж байхгүй. Сайжруулахын төлөө байнга ажиллаж ирсэн.
Би энэ төслийг удирдаж байхдаа Монголын үр өгөөжийг 3 тэрбум ам.доллараар сайжруулсан. 2011 онд хийсэн өөрчлөлтөөр 1 тэрбум ам.доллараар сайжруулсан. Би маш олон ажлыг өөрийнхөө нэр төр, улстөрийн карьераар дэнчин тавьж байж хийсэн. Миний хажууд нэг ч сайд байгаагүй.
Ройтер бол нэр хүндтэй агентлаг. Би тэр мэдээг уншсан. Маш их субьектив мэдээлэлтэй байсан.
Тэнд бичигдсэн хоёр тоо үнэн байна. Би энэ зүйлийг ялгаж, салгаж ярих хэрэгтэй байна.
2006 онд намайг таягтай явж байхыг олон хүн харсан байх. Би хөлөө хугалаад, 6 сар орчим хэвтэрт байсан. 2007 он хүртэл би тэгж явсан.
1996 онд би Германд сургууль төгсөөд ирэхдээ 20,000 дойч маркийн төсөлтэй ирж байсан анхны Монгол оюутан. Тухайн үед 20,000 дойч марк гэдэг бол маш их мөнгө байсан.
Дараа нь 2001 онд би Колумбийн их сургуульд сурахдаа 70,000 гаруй долларын тэтгэлэг авсан.
Ингээд өөрийн хийж байсан бизнесээ найзуудтайгаа нийлээд, дээрээс нь Монголын нэртэй бизнесмэнээс зээл аваад 8.2 сая еврог Швейцарт 5 сард нээлгэсэн байсан дансандаа хийлгэсэн.
Тэрний нэг данс нь офшортой холбоотой данс. Харамсалтай нь 2008 онд хямрал болсон учраас зээл өгсөн бизнесмэн маань өгсөн зээлээ бүгдийг нь эргүүлж авсан. Үлдэгдэл мөнгө нь 2013 онд компани хаагдах үед бүгд дууссан. Одоо надад Швейцарт ямар нэгэн данс байхгүй.
Тэр царцаагдсан гэж буй данс бол харамсалтай нь, 10 жилийн өмнө надад тус болж өөрийнхөө данснаас миний мөнгийг шилжүүлж өгч байсан Монгол бизнесмэний дансыг царцаасан байна. Тийм учраас одоо үүссэн байгаа энэ хэргийг эцэслэсний дараа тэр хүний мөнгийг гаргаж өгөх байх. Ийм л зүйл болсон.
Тэгэхээр Оюутолгойн гэрээнээс жилийн өмнө хувь хүнийхээ зүгээс хийгдсэн ажлыг Оюутолгойтой шууд уялдуулсан. Ийм мэдээлэл болсоноороо Ройтерийн мэдээ маш учир дутагдалтай мэдээ.
Тэр мэдээ гарсны дараа Нью-Йоркийн хөрөнгийн бирж дээр Рио Тинтойгийн хувьцааны үнэ унасан. Энэ хэний ашиг сонирхол вэ? Энэ бүгдийг ялгаж, салгаж ойлгох хэрэгтэй.
Ардчилсан намын гаргасан шийдвэр бол эмэгнэлтэй. Надаас хэн ч юу ч асуугаагүй. Шүүхээр асуудлыг шийдэж дуустал хүнийг гэм буруутай гэж үздэггүй. Манай намын удирдлагууд ийм дуулиан шуугианыг далимдуулан маш богино хугацаанд намайг намаас хөөж байна.
Оюутолгойн гэрээ үнэхээр зөв, ямар ч авлигагүй сайн гэрээ болсон гэдгийг би харуулна. Үүнийг би харуулахгүй. Монгол, Швейцарийн хамтарсан шалгалтын баг харуулна. Энэ төсөл 100 жилийн настай. Одоо 9 жил үргэлжилж байна. Өнөөдрийг хүртэл асуудал нь үргэлжилсээр байна. Тиймээс энэ асуудлыг цэгцлэх ёстой.
Би хууль хүчний байгууллагад хүндэтгэлтэй ханддаг.
Ардчилсан нийгэмд алдаж оноод, хөгжиж дэвшээд явж байна. Гэхдээ бид үндсэн суурь зарчмаа хамгаалах ёстой” гэлээ.
