Төв аймгийн Баянчандмань суманд сумын удирдлагууд нь ажилтан эмэгтэйгээ хүчирхийлсэн ноцтой хэрэг гарсан талаар манай сайт хамгийн түрүүнд мэдээлсэн. Тодруулбал, тус сумын Засаг даргын орлогч Б.Ханбаатар, Тамгын газрын дарга Г.Ариунболд нар малын эмч хийдэг Б гэх 26 настай бүсгүйг халдварт өвчин гарсан гэх нэрийдлээр хууран авчирсанаас хэрэг мандсан байдаг.
Тэгвэл уг хэргийн талаар хохирогч Б-ийн ээж В.Бадамсүрэн \”Адгууснаас ч дор ухамсаргүй юмнууд төрийн удирдах албанд байж байна. Бас болоогүй хүний сайхан охин үрийг жолоочоороо худлаа ярин байж авахуулчихаад харилаа гэхэд нь зодож ухаан алдуулаад, дараа нь хүчирхийлж, үхчихлээ гэж бодоод хаяад явсан байгаа юм. ЭНэ Б.Ханбаатар, Г.Ариунболд нар охины минь амьдралаар тоголчихлоо. Миний охин чинь гурван настай охинтой өрх толгойлсон эмэгтэй. Охиныхоо төлөө ариун шударга хөдөлмөрөөр, эзэмшсэн мэргэжлээрээ ажиллаад явж байсан” гэв.
Түүнчлэн хэргийн гол эхлэлийг тавьсан Тамгын газрын дарга Г.Ариунболд, түүний жолооч нарт ч хэрэг үүсгүүлэх хүсэлтэй байгаагаа дурдаад яах гэж байгааг нь мэдсэн хэрнээ нуун дарагдуулсан гэдэг үндэслэлээр прокурорт хандаад байгаагаа дуулгав. Энэ талаар \”Прокурорт шилжсэн байсан хэргийг бид дахин мөрдөн байцаалтад буцаах хүсэлт тавьсан. Учир нь миний охиныг дуудаж, Б.Ханбаатарт хүчирхийлүүлэх тэр нөхцөлийг эхлүүлсэн хүн бол Тамгын газрын дарга Г.Ариунболд.
Гэтэл тэр хүн өнөөг хүртэл ямар ч буруугүй гэрч гэх нэр зүүн эрх чөлөөтэй явж байгаад туйлын их гайхаж байгаагаа хэлэх ёстой. Тэр л миний охиныг зүгээр ажлаа хийж байхад нь дахин дахин дуудаж, гэмт этгээдийн гарт аваачиж өгсөн. Хэрэв тэгээгүй байсан бол ийм хэрэг явдал гарах байсан гэж үү. Үүнд эх хүний хувьд маш их гомдолтой байна. Ямар нэгэн санаа зорилго өвөрлөн худлаа хэлж дуудсан нь илт. Г.Ариунболд миний охиныг нэгдүгээр эмнэлэгт авчирч өгөхдөө \”Зам дээрээс оллоо, танихгүй ийм нэг хүн хэвтэж байсан” гэж хэлснийг нь бодохоор хэлэх үг ч олдохгүй сууна. Тиймдээ ч зохих шийтгэлээ амсана гэдэгт итгэж байна. Энэ хүн бол хариуцлага хүлээх ёстой хүн мөнөөс мөн. Гэм буруугүй хүн лав биш шүү гэдгийг хэлэхийг хүсч байна” гэлээ.
Харин албаны эх сурвалжаас тодруулахад \”Б.Ханбаатарыг ШШГЕГ-ын харьяа 461 дүгээр хорих ангид саатуулсан байгаа. Харин хэргийг Сонгинохайрхан дүүргийн цагдаагийн нэгдүгээр хэлтэс дээр шалгаж байна” гэв.
Эх сурвалж: Today.mn
