ОХУ АНУ-аас тус улсад суугаа ЭСЯ-ны 60 дипломатчийг эх орноосоо албадан гаргах болсноо мэдэгджээ. Тус улс Москва хот дах АНУ-ын ЭСЯ-ны 58 ажилтан болон Екатеринбург хот дах Ерөнхий консулын газрын хоёр ажилтныг тааламжгүй этгээдээр зарласан бөгөөд тэднийг ирэх сарын 5-ны дотор тус улсаас гарч явахыг шаарджээ. Түүнээс гадна ОХУ Санкт-Петербург хот дах АНУ-ын Ерөнхий консулын газрыг хаах шийдвэрийг гаргаж, Америкийн дипломат ажилтнуудад хоёр хоногийн дотор консулын газрын байрыг орхин явах хугацаа өгсөн байна. Түүнчлэн ОХУ АНУ-аас ОХУ-д суугаа элчин сайд Жон Хантсманаас тус улсад байгаа Оросын төрийн мэдлийн хөрөнгийг царцааж болзошгүй байгаа талаарх мэдээлийн талаар тайлбар шаардаж, өдгөө ид өрнөж буй эдгээр шуугианаас үүдэн хоёр улсын харилцаанд ноцтой хор хохирол үүсэж болохыг анхааруулаад энэ нь дэлхий дахиныг хамарсан шинжтэй болж болохыг хатуу сануулжээ.
Үүнээс өмнө энэ сарын 26-нд АНУ Оросын экс тагнуулч Сергей Скрипаль болон түүний охиныг хордуулсан хэрэгт буруутган ОХУ-ын 60 дипломатчийг нутаг буцаах шийдвэр гарган Сиэтл хот дах тус улсын Ерөнхий консулын газрыг хаах шийдвэрийг гаргасан бөгөөд түүнчлэн Австрали, Украин, Канад болон Европын холбооны олон улс орон Оросын дипломатчдыг тааламжгүй этгээдээр зарласан юм. Өнгөрсөн гуравдугаар сарын 4-нд Оросын экс тагнуулч Сергей Скрипаль болон түүний охин Юля нар Их Британы Солсбери хотноо ухаангүй байхад нь олсон бөгөөд тэднийг мэдрэл оюун ухаанд хүчтэй нөлөөлөх химийн хороор хордуулсан байх магадлалтай хэмээн Их Британи улс үзсээр байгаа билээ. Энэ асуудлаас үүдэн Их Британи улс ОХУ-ыг уг хэрэгт буруутган тус улсаас албан ёсоор тайлбар шаардсан боловч Москва үүнд ямар холбоогүй хэмээн мэдэгдсээр байгаа юм.
