Ерөнхийлөгчийн Тамгын Газраас цаазын ялын талаар мэдээлэл хийлээ. Ерөнхийлөгчийн зөвлөх Г.Уянга “Монгол Улсын Ерөнхийлөгч 2017 онд Хууль зүй, дотоод хэргийн яаманд хүсэлт гаргасан. Бага насны хүүхдийг хүчирхийлсэн хэрэгт цаазын ял оноох, эсвэл хөнгөлөх зэрэг өөр арга хэмжээг авч, судлах үүрэг өгсөн боловч одоо болтол хариу өгөөгүй байна.
Өнгөрсөн долоо хоногт ХЗДХЯ-наас цаазын ялыг сэргээх боломжгүй гэсэн дүгнэлт гаргасан тухай хэвлэлээс олж мэдлээ. Монгол Улсын Үндсэн хуулийг зөрчсөн бол олон улсын конвенцид нэгдэн орохгүй. Тиймээс цаазын ялыг сэргээх шаардлага үүсч байна.
Тиймээс бага насны хүүхдийг хүчирхийлсэн хэрэгт цаазын ял оноох саналыг Ерөнхийлөгч гаргаж, Эрүүгийн хуульд нэмэлт, өөрчлөлт оруулах төслийг боловсруулж, өнөөдрөөс санал асуулга явуулж эхэлж байна.
Эрүүгийн хуульд цаазаар авах ялыг бага насны хүүхдийг хүчиндсэн, амь насыг нь хөнөөсөн хэрэгт оноохоор төсөлд нэмэлт, өөрчлөлт оруулна. Монгол Улс цаазаар авах ялыг хоёр ч удаа халж, харамсалтай нь буцааж хэрэглэхээс өөр аргагүй нөхцөл байдалд орж байсан юм билээ.
Ерөнхийлөгч тодорхой гэмт хэргүүд дээр энэ ялыг хэрэглэх гэж байгаа. Бага насны хүүхдийг хүчирхийлнэ, амь насыг нь хорооно гэдэг тодорхой, тодруулж болдог хэрэг. Тийм учраас улс төрийн хэрэгтэнд хамаарахгүй. Ямар ч хэлмэгдэх боломжгүй нөхцлөөр энэ ялыг оруулж байгаа юм.Энэ асуудлыг батлах эсэх нь парламентын асуудал” гэв.
Бид бяцхан үрсийнхээ амь нас, эрүүл мэнд, амьд явах эрхэд хүндэтгэлтэй хандах ёстой
Хуулийн зөвлөх Р.Булгамаа “Бага насны хүүхдийг хүчиндэх, амь насыг нь хороох гэмт хэрэг сүүлийн жилүүдэд нэмэгдэж, улам харгис хэрцгий болж байна. Хөл дээрээ зогсож чадахгүй, ээжийнхээ хөхнөөс гараагүй бяцхан үрсийг хүчиндэж, амь насыг нь хороох үйлдлийг бид хараад байж хэрхэвч болохгүй.
Хэдийгээр цаазаар авах ял хүмүүнлэг бус шинжтэй ч бид бяцхан үрсийнхээ амь нас, эрүүл мэнд, амьд явах эрхэд хүндэтгэлтэй хандах ёстой. Тиймээс хууль зүйн хариуцлагыг чангатгахын тулд энэ төслийг өргөн барихаар болж байна” гэв.
Тодорхой гэмт хэрэг дээр энэ ялыг хэрэглэхээр зүйлчилж байгаа
Ингээд . Ерөнхийлөгчийн зөвлөх Г.Уянга дараах асуултад хариулт авлаа.
-Цааз ялыг буцааж болдог бол ял. Монгол Улсад шударга шүүхийн тогтолцоо бүрдээгүй хэн нэгийг гүтгээд цаазаар авах тохиолдол гарч болно. Үүнийг хэрхэн тооцоолсон вэ?
-Тодорхой гэмт хэрэг дээр энэ ялыг хэрэглэхээр зүйлчилж байгаа. Бага насны хүүхэд хүчирхийлсэн болон амь насыг хохироосон хэргийг тодорхой баримтаар тодруулж болдог хэрэг. Түүнээс биш улс төрийн хэрэгтэнд энэ ялыг хэрэглэхгүй. Иймээс хэлмэгдлийн зүйл гаргахгүй. Монгол Улс өнөөдрийг хүртэл улс төрийн хэлмэгдэлгүй ардчилсан орон гэж бодож байна. Үүнийг далимдуулж хэлмэгдүүлэх хохироох ямар асуудал гарах боломжгүйгээр энэ ялыг сэргээх саналыг ерөнхийлөгч оруулж байгаа юм.
-Энэ асуудлыг УИХ-аар дэмжихгүй бол яах вэ?
-Ерөнхийлөгч саналаа оруулж байгаа. Үүнийг УИХ олонхоор батална. Ерөнхийлөгч өнгөрсөн 11 дүгээр сард Засгийн газарт явуулсан бичигтээ хэд хэдэн хувилбаруудыг судалж санал хүргүүлсэн. Үүнийг судалж байгаа хуульд оруулж батлуулаач. Бага насны хүүхэд олноороо хүчирхийлэлд өртөж байгаа амь насан хохирч байгаа үйлдлийг зүгээр хараад сууж болохгүй . Ямар нэгэн шийдэл гарч хэрэгтэй. Гэвч дөрвөн сарын хугацаанд засгийн газраас ямар ч хариу ирээгүй байна.
-Цаазын ялыг урд нь сэргээж байсан уу?
Монгол улс цаазын ялыг халж байсан тохиолдол байгаа. Хоёр ч удаа халж байсан.Хамар салтай буцааж хэрэглэхээр өөр аргагүй нөхцөл байдалд орж байсан байна лээ. 1953 оны наймдугаар сарын 5-ны 93 зарлиг ардын их хурал гаргаж байсан байдаг. Гэвч эрүүгийн нөхцөл байдал хүндэрч онц хүнд онцтой харгис гэмт хэрэг огцом нэмэгдсэн. Ингээд дөрвөн сарын дараа сэргээж байсан байдаг.
Тиймээс бага насны хүүхдийг хүчирхийлсэн хэрэгт цаазын ял оноох саналыг Ерөнхийлөгч гаргаж, Эрүүгийн хуульд нэмэлт, өөрчлөлт оруулах төслийг боловсруулж, өнөөдрөөс санал асуулга явуулж эхэлж байна. Иймээс иргэд идэвхтэй оролцохыг уриалж байна.
