Гурван шатны шүүхийн шийдвэрээр хуралдсан МҮБХ-ны ээлжит бус “Их эе”-аас сонгогдсон МҮБХ-ний Цэцдийн зөвлөлийн дарга Ү.Хүрэлбаатар, гүйцэтгэх захирал Ц.Төмөрсүх, бөхчүүдийн төлөөлөл Монгол Улсын начин Б.Ганхуяг нар МҮБХ-ы тэргүүн нь Б.Бат-Эрдэнэ аварга биш “Гацуурт”-ын Л.Чинбат болох тухай мэдээлэл хийлээ. Энэ хурлын үеэр МҮБХ-ны гүйцэтгэх захирал Ц.Төмөрсүхээс дараах зүйлийг тодрууллаа.
МҮБХ-ны ээлжит бус “Их эе” хурал болж Б.Бат-Эрдэнэ аваргыг олонхын саналаар сонгогдсон шүү дээ. Та нар ямар шалтгаанаар эсэргүүцээд байгаа вэ?
-Нийслэлийн шүүхийн шийдвэр гүйцэтгэх ерөнхий газраас Оюуны өмч, улсын бүртгэлийн ерөнхий газарт хууль бусаар хуралдуулсан МҮБХ-ны наймдугаар “Их эе”-ийн тухай мэдээллийг улсын бүртгэлд бүртгэхгүй байхыг удаа дараа мэдэгдсэн. Тиймээс улсын бүртгэлд МҮБХ-ны тэргүүн Б.Бат-Эрдэнэ гэсэн мэдээлэл байхгүй болохыг албан ёсоор мэдэгдэж байна.
Оюуны өмч, улсын бүртгэлийн ерөнхий газраас 2010 оны дөрөвдүгээр сарын 03-ны өдөр улсын байцаагчийн дүгнэлт гаргаж МҮБХ-ны улсын бүртгэлийн гэрчилгээ, тэмдгийг хүчингүй болгож шийдвэрлэсэн байдаг.
-Тэгэхээр Б.Бат-Эрдэнэ аварга МҮБХ-ны тэргүүнээр хууль бусаар сонгогдсон гэсэн үг үү?
-Гурван шатны шүүхийн шийдвэрийн дагуу хуралдсан МҮБХ-ны ээлжит бус “Их эе”-ээс сонгогдсон Л.Чинбатыг МҮБХ-ны тэргүүн мөн болохыг гэрчилж, улсын бүртгэлийн гэрчилгээнд нэмэлт өөрчлөлт оруулж, улсын бүртгэлийн гэрчилгээ, тамга тэмдэг шинээр олгосон. Энэ нь Оюуны өмч улсын бүртгэлийн газарт бүртгэгдсэн нэг л МҮБХ байгаа бөгөөд түүний тэргүүн нь Л.Чинбат мөн болохыг баталгаажуулсан хэрэг юм.
Гэтэл гурван шатны шүүхээр шийдвэрлэгдсэн эл асуудлыг маргаантай хэвээр байгаа мэт үйлдэл удаа дараа хийж, хууль бус МҮБХ-ны 8-р “Их эе”, Цэцдийн хурал гээчийг хуралдуулж, орон даяар нэвтрүүлсэн нь хууль бус.
-Өнгөрсөн гуравдугаар сарын 27-ны өдөр шүүхийн шийдвэрийн ажилчид бөхийн өргөө рүү дайрсан орсон асуудал гарсан. Энэ асуудал юу болж байгаа вэ?
-Нийслэлийн шүүхийн шийдвэр гүйцэтгэх газраас 2018 оны гуравдугаар сарын 27-ны өдөр Баянзүрх дүүргийн цагдаагийн хоёрдугаар хэлтэст шүүхийн шийдвэрийн биелэлтийг баталгаажуулах, шүүгчийн захирамжийг танилцуулах шийдвэр гүйцэтгэх ажиллагаанд саад учруулсан Р.Нямдорж, Д.Данзан нарт эрүүгийн хэрэг үүсгэн шалгах, Нямдоржийн Ганбаатар болон менежер С,Гантөр нарт замбараагүй байдал үүсгэн хэв журмыг зөрчсөн үйлдэлд нь Зөрчлийн тухай хуулийн дагуу шалган шийдвэрлэж өгөхийг хүссэн мэдэгдэл илгээснээр хэрэг үүсгэн шалгаж эхэлсэн байна.
