Манай улсад 833 мянган тээврийн хэрэгсэл бүртгэлтэй байдаг. Үүнээс 300 мянга гаруй нь замын хөдөлгөөнд оролцдогүй, татвар төлдөггүй. Эдгээрээс сүүлийн таван жилд татварыг нь төлөөгүй 95700 автомашиныг ямар нэг төлбөр авахгүйгээр бүртгэлээс хасах шийдвэр гарчээ. Он гарснаас хойш 1366 иргэн ийм хасалт хийлгэсэн байна.
Одоо бол зөвхөн хассан гэсэн тамга дарж байгаа бол техникийн паспорт нь бүртгэлийг хассан гэсэн тодорхойлолт болох аж. Олон улсын стандартын дагуу хилээр гарч буй тээврийн хэрэгсэлд ч техникийн паспорт олгох ажил хийх юм байна. Манай улсаас 2010 оноос хойш 10 мянга гаруй машин Казахстан руу хил даваад, буцаж орж ирээгүй байдаг гэнэ.
Бүртгэлээс хасагдаагүй, техникийн үзлэгт ороогүй автомашиныг энэ сарын 1-нээс камераар шүүж, торгодог болоод байгаа юм. Ийм зөрчилтэй иргэнийг 120 мянган төгрөгөөр торгоно. Тиймээс иргэд 20 мянган төгрөг төлөөд тогтсон хугацаанд үзлэгтээ орох шаардлагатай гэдгийг албаныхан сануулж байна.
Дашрамд дуулгахад, Авто тээврийн үндэсний төвийн мэдээллийн санг Иргэний бүртгэл, мэдээллийн улсын төвийнхтэй холбох юм байна. Иргэний үнэмлэхийн зураг нь танигдахгүй байх, бусдын үнэмлэхийг ашиглах зөрчил манайд цөөнгүй гардаг. Мөн иргэд иргэний үнэмлэх дээрх гэрийн хаягаа өөрчилсөн ч автомашины гэрчилгээ дээрх хаягаа солиулаагүйгээс торгуулийн хуудас явуулах, эзэмшигчтэй нь холбоо барихад хүндрэл үүсдэг. Тиймээс бүртгэлийн үйл ажиллагааг цахимжуулж, хурууны хээг ашиглан иргэдийн мэдээллийг тулгах зайлшгүй шаардлагатай болжээ. Нөгөө талаас, ингэснээр иргэд олон газраас лавлагаа авах хэрэггүй болох юм байна.
