УИХ-ын гишүүн О.Баасанхүү мэдээлэл хийлээ. Тэрбээр Оюутолгойг шалгах ажлын хэсгийн гишүүн бөгөөд Оюутолгойн ТУЗ-ын гишүүдээс мэдээлэл авах гэсэн боловч ганцхан Б.Мөнбаатар ирсэн. Тиймээс Н.Багабандийг чөлөөлөх саналыг Ерөнхий сайдад хүргүүлж байгаагаа илэрхийлэв. УИХ-ын гишүүн О.Баасанхүү “Н.Багабанди ямар ч үүрэггүй атал Оюутолгойн ТУЗ байсныхаа төлөө цалин авдаг. Монголын төр Ерөнхийлөгч байсан хүмүүст өргүй. Тэд бол хангалттай идэж уусан хүмүүс гэв.
Үүнээс гадна тэрбээр “өнгөрсөн оны арванхоёрдугаар сард МАХН-ын хурлыг Төрийн ордонд зохион байгуулсан. Намынхаа хурлыг МАН, МАХН, АН бүгд л Төрийн ордонд хийдэг байсан. Гэтэл А.Гантамир гэдэг нөхөр гарч ирээд Төрийн ордонд намын хурал хийсэн гэдэг асуудлаар намайг Үндсэн хуулийн цэцэд өгөхөөр бэлтгэж байгаа юм байна. Тэгж ярих юм бол А.Гантамир надтай хамтран ажиллах санал тавиад, хуулийн холбоогоор дамжуулж 30 сая төгрөг нэхсэн. Би өгөөгүй болохоор одоо ингэж байгаа юм байна.
Би МАХН-ын хурлыг хууль ёсны дагуу хүсэлт гаргаад Төрийн ордонд хийсэн. Манай намын дотоод асуудалд цэц оролцохыг зөвшөөрөхгүй. Цэцийн гишүүд бол улстөрчийн гар, хөл болсон хүмүүс байдаг. Х.Тэмүүжингийн хэлснээр цэц бол улстөрчдийн моорог болсон гэдэг нь үнэн байхгүй юу. Төрийн ордонд хурал хийсний төлөө Үндсэн хууль зөрчдөггүй юм” гэв.
Н.Энхбаяр гэдэг хүн ганцаараа эрх мэдэлтэй биш шүү дээ
Ингээд хурлын үеэр УИХ-гишүүн О.Баасанхүүгээс зарим зүйлийг тодрууллаа.
-Таны асуудлаар үндсэн хууль дээр маргаан үүсэх гэж байгаа. Иймээс өөрийнхөө ашиг сонирхолд нийцүүлж асуудлыг тавьж байгаа юм уу?
-Тийм зүйл огт байхгүй. Би хэвлэлийн хурал хийгээд цэцийг цэцэд өгнө гэж хэлж байсан. Мөн Н.Багабандийг Оюутолгойн ТУЗ-аас гаргана гэдэг асуудлыг тавьж байсан. Цэц дээр миний зөндөө асуудал байдаг. Тухайлбал, С.Баярцогт, Ч.Сайханбилэг болон Дубайн гэрээний асуудлууд цэц дээр байгаа. Аливаа асуудал хуулийн хүрээнд явах ёстой. Өргөдөл дээр санаа зовоод байгаа зүйл байхгүй. Би хулгай хийж, худал яриагүй. Төрийн ордон уруу дайрч орж эрх мэдэл албан тушаалаа ашиглаж хурал хийгээгүй. Хууль дүрмийн дагуу зөвшөөрдөг хүмүүс, бүтэц байгаа. Ялихгүй юмаар оролдож байгааг хараад инээд хүрч байна.
-Эрдэнэттэй холбоотой асуудлаар уу?
-Мэдэхгүй. Өмнө нь биш гэж байсан. Хэдэн ноцтой баримт дэлгэх гэж байгааг зогсоох гэсэн оролдлого гэж харж байна. Жишээлбэл, Оюутолгойн татварыг зохион байгуулалттайгаар татварын газрын Б гэдэг хүнийг оруулаад асар их хөрөнгийг завшуулсан байх талтай байгаа. Одоо хуулийн байгууллагаар шалгагдаж байгаа. Бүх зүйлийг яриад яваад байж болохгүй байна. Яагаад гэхээр гэмт хэрэгтнүүд маневр хийгээд юм аа далдалж нууцлаад байгаа учраас. Миний зорилго бол Эрдэнэтийн 109 сая төгрөгийг Эрдэнэтийн мөнгөөр төлүүлэхгүй гэдэг хатуу байр суурьтай байгаа.
-Үндсэн хуулийн цэц бүхэлдээ болохгүй байна уу, эсвэл нэр бүхий хүмүүс болохгүй байна уу?
-Гар хөл болсон хүмүүс байдаг. Х.Тэмүүжин “Улс төрчдийн морг болчихоод байна” гэж хэлж байсан. Энэ үнэн шүү дээ. Өмнө ч ийм байсан. Одоо ч ийм байгаа.
-Таны талаар цэцэд ямар хүн гомдол гаргасан бэ?
-н.Гантамир гэж хүн надаас 30 сая төгрөг нэхэмжилсэн. Энэ асуудлаар материал бэлдээд прокурорын газарт хүргүүлж байгаа. Төрийн алба хаагч хэвийн үйл ажиллагаа явуулж байхад онц хүнд гэмт хэрэгт гүтгэсэн. Намайг бусдаас 160 сая төгрөг авсан гэж хэвлэлийн хурал хийсэн. Мөнгө авсан гэдэг асуудлыг АТГ-аас шалгаад мөнгө авсан асуудал байхгүй гэдгийг тогтоосон.
-Таны ард танай намын дарга байгаа юм биш үү?
-Бүгд л байгаа шүү дээ. Олигархиуд байгаа. Н.Энхбаяр гэдэг хүн ганцаараа эрх мэдэлтэй биш шүү дээ.
-УИХ-ын хоёр байнгын хорооноос ажлын хэсэг гарч Эрдэнэтийн асуудлыг шалгаж байгаа. Та тэр ажлын хэсэгт орсон уу?
-Шалгаад яах юм бэ, бодит үнэн зүйл байж байна шүү дээ. Хоёр шалтгаан байгаа. Нэгдүгээрт, гарын үсэг худлаа юм бол банк яагаад мөнгийг нь өгсөн бэ? Банктайгаа нийлээд хуйвалдсан гэсэн үг шүү дээ. Стандартын банкинд хүсэлт тавьсан байгаа.
-Н.Багабандийг Оюутолгойн ТУЗ-ийн гишүүнээс чөлөөлснөөр шалгаж байгаа зүйлд нэмэр болох уу?
-Чөлөөлөх ёстой. Ажлын хэсгийн хурал дээр орж ирээгүй. Залуугаараа Б.Мөнхбаатар гүйж байна. Хэл устай, хууль мэддэг хүн тавих хэрэгтэй. Дэлхийн хэмжээний зүйл ярьж байгаа. Ерөнхийлөгч байсан гээд юугаар гийгүүлээд байгаа юм бэ. Монголын төрд гавъяа байгуулсан байж болно. Гэхдээ мэддэг зүйлээ хийх хэрэгтэй.
