Анх гудамжны тэмцэгч болж Ахмадын холбооны тэргүүн гэдгээрээ олны танил болсон Г.Баасангийн хувьд нийгэмд шударга ёсыг уриалан дуудадгаараа алдартай нэгэн билээ. Түүний хувьд олон жилийн турш Монголын нийгэмд бугшаад байгаа хуулийн гажуудал болон авлига, хээл хахуулийг илчлэх компанит ажилд идэвхитэй оролцож ирсэн гэдгээр нь ард түмэн сайн мэднэ .
Харин одоо тэрээр АТГ-ын дэргэдэх орон тооны бус Олон нийтийн зөвлөлийн даргаар ажиллаж байгаа юм. Сүүлийн үед АТГ-ын даргыг солино гэх яриа гарсантай холбогдуулан уг албан тушаалд олон хүний нэр яригдаж байгаа бөгөөд үүнтэй зэрэгцээд мөнөөх алдарт Г.Баасанг ч АТГ-ын даргын суудалд очиж магадгүй гэсэн яриа гараад байгаа ажээ. Харин энэ талаар сэтгүүлчид түүнээс өөрийнх нь байр суурийг асуухад тэрээр тус байгууллагын даргын суудлаас татгалзахгүй гэдгээ ний нуугүй хэлсэн байна. Гэхдээ АТГ-ын даргад тавигддаг шаардлага нь төрийн албанд 10-аас доошгүй жил ажилласан, эрх зүйч мэргэжилтэй байх шаардлагатай гэсэн хуулийн заалттай байдаг. Тэгвэл Г.Баасан 2009-2012 онд МУИС-д суралцаж, хуульч болсон нэгэн бөгөөд тэгэхээр тэрээр АТГ-ын дарга болно гэдэг хуулиар бол мөрөөдөл болох нь тодорхой юм. Нөгөө талаар түүнийг АТГ-ын дарга болгох асуудлыг олон нийт шийдэхгүй бөгөөд учир нь Ерөнхийлөгч тус байгууллагын даргаар томилогдох хүнийг санал болгож, түүнийг нь УИХ-ын олонхын саналаар дэмжих эсэхийг шийддэг хуулийн заалттай юм.
Харин АТГ-ын Олон нийтийн зөвлөлийн дарга Г.Баасан энэ талаар өөрийн байр суурийг илэрхийлэхдээ”Монголын ард түмэн итгэл найдвар үзүүлэн миний нэрийг явуулж байгааг би удаан харж байгаа. Монгол улсын Ерөнхийлөгч УИХ дотор Монгол Улсыг авилгагүй байлгая гэсэн хүсэл эрмэлзлийн доор надад итгэл хүлээлгэвэл би ажиллах болно. Төрийн албанд ажиллахад шаардлагатай шалгуур бол миний үзүүлэлтэнд таарч байгаа” гэж хариулжээ.
