Нийслэлийн мэргэжлийн хяналтын газрын 7012-8012 гэсэн шуурхай утсанд 2018 оны дөрөвдүгээр сарын 16-ны 17 цагийн орчимд “Алтай констракшн” ХХК-ийн захиалгаар “Тольт дэнлүү” ХХК-ийн туслан гүйцэтгэгчээр ажиллаж байгаа “Саруул хотхон”-ы B7 блок барилгаас кран унаж, нэг хүн бэртсэн талаар бид мэдээллэсэн.Ингээд энэ хэргийн талаар нийслэлийн Мэргэжлийн хяналтын газрын дэд бүтцийн хяналтын хэлтсийн дарга Н.Гантулгатай ярилцлаа.
-“Алтай констракшн” ХХК-ийн барилга дээрээс кран унасан. Танайхаас ямар арга хэмжээ авч ажиллаж байна вэ?
-Нийслэлийн мэргэжлийн хяналтын газраас барилгын техникийн хяналтын болон хөдөлмөрийн аюулгүй байдлын улсын байцаагч нар ослын газар дээр ажиллаж, хяналт шалгалт явууллаа. Шалгалтаар 12 давхар, цутгамал төмөр бетон карказан хийцтэй барилгын урд угсарсан улсын бүртгэлийн 1760 дугаартай QTZ-40 маркийн 4 тн даацтай цамхагт краны дээрээсээ 5-6 дахь секцийн хоорондох бэхэлгээ тасарч, унахдаа сумны үзүүр хэсэг нь зэргэлдээ орших Баянмонгол хорооллын 410 дугаар байрны дээврийн хэсэг, пронтоны өрөг, нийтийн зам талбай дээр зогсож байсан 4 автомашин, зэргэлдээ орших уг барилгын хашаа болон тор хашааг гэмтээсэн байна. Мөн дээврийн хар цаасан үе, бетон тэгшилгээний үе, дулаалгын үе, пронтоны өргийг цөмлөн гэмтээсэн, айлын цонхны шил хагарсан байдалтай байна.
-Тухайн үед нэг хүн гэмтсэн гээд байгаа. Мөн кранист БНАСАУ-ын иргэн гэсэн. Энэ талаар мэдээлэл өгөөч?
-Кран ойролцоогоор 42 м-ээс унах үед бүхээгт байсан нэг кранист гэмтэл авч эмнэлэгт хүргэгдсэн. Тус кранист нь “Алтай констрашн”-ы барилга дээр туслан гүйцэтгэгчээр ажиллаж буй “Тольт дэнлүү” компанийн ажилтан, БНАСАУ-ын иргэн 36 настай эрэгтэй байсан. Одоогоор гэмтлийн зэрэг тогтоогдоогүй байна. Түүнчлэн мэргэжлийн кранист мөн үү гэдэг асуудлыг тодруулахаар шалгаж байна.
-Тодруулаагүй байгаа юм уу. Ер нь манайд кранистыг хэрхэн яаж мэргэшүүлдэг вэ?
-Өнөөдөр бид хяналтын ажил болон туслан гүйцэтгэгч зэрэг газруудад хяналт шалгалтын ажлыг хийж байна. Манайд Кранистын сургалт явуулах зөвшөөрөлтэй хэдэн газар байдаг. Энэ хүн аль газрын сургалтад суусан гэдгийг тодруулах шаардлагатай байгаа.
-Ер нь краныг ашиглах хугацаа хэдэн жил байдаг бол. Манайд ямар дүрэм журмаар явдаг вэ?
-Манайд кран болон өргөх машин мехнизмтай холбоотой найман төрлийн дүрэм байгаа. Энэ дүрэм журмыг баримталдаг. Ер нь цаашид өргөх машин мехнизм дээр тусгайлан бие даасан дүрэмтэй болох шаардлагатай. Бид энэ асуудлыг газрын даргын зөвлөлийн хурлаар мэргэжлийн хяналтын ерөнхий газартаа уламжилсан. Мөн холбогдох яам, төрийн болон төрийн бус байгууллагад санал хүргүүлсэн байгаа. Тусгай хуультай болж хуулиар зохицуулахгүй бол манай дүрэм хүчин чадлын хувьд хүрэлцэхгүй байна. Иймээс эрх зүйн актыг нэмэгдүүлэхийн тулд хууль гаргах шаардлагатай. Мөн дүрэм журмыг батлуулах шаардлагатай гэсэн саналыг хүргүүлсэн.
-Одоо баригдаж байгаа барилгуудыг харж байхад кранаа тухайн баригдаж байгаа барилгатай нь хамт бэхэлсэн байдаг. Сая унасан краны бэхэлгээ хийгдсэн байсан уу?
-Энэ унасан кран зургаан хэсэгтэй бэхэлгээтэй байсан. Одоо металлын шинжилгээ давхар хийлгэх шаардлагатай байгаа.
– Кран унах үедээ Баянмонгол хорооллын 410 дугаар байрны дээврийн хэсэгт нөлөөлсөн гэж байна. Үүнд танайхаас ямар арга хэмжээ авч байна вэ?
-Осол гарах үед Баянмонгол хорооллын 410 дугаар байрны 9, 10 давхрын хийцэд нөлөөлсөн, дүүргэгч өрлөгүүд, үндсэн хийцэд нөлөөлсөн байх магадлалтай тул нарийвчилсан шинжилгээ хийлгэхээр Нийслэлийн ерөнхий төлөвлөгөө газартай хамтарсан үзлэгийг хийж эхэлсэн. Нарийвчилсан үзлэгийн дүгнэлт гарсны дараа мэргэжлийн хяналтын байгууллагаас хүчдэл бэхэлгээ хийх гэх мэт дараагийн шатны арга хэмжээг авч ажиллана.
–Одоо бүтээн байгуулалтын улирал эхэлж байна. Манайх аливаа хэрэг гарсны дараа шалгалтыг явуулдаг дутагдалтай. Одоо танайхаас барилга угсралттай холбоотой хяналт шалгалтыг явуулж байгаа юу?
-Он гарснаас хойш Нийслэлийн мэргэжлийн хяналтын газраас дэд бүтцийн чиглэлийн болон барилга угсралтын үйл ажиллагаа эрхэлж буй, өргөх машин механизмын чиглэлээр үйл ажиллагаа явуулж буй бүх аж ахуй нэгж байгууллагад сэрэмжлүүлэг, зөвлөмж мэдэгдлийг хүргүүлж, сургалтууд зохион байгуулж ажилласан. Тухайлбал, “Алтай Констракшн” ХХК-д 2018 оны нэгдүгээр сарын 22-ны өдөр 339 дугаартай мэдэгдлийг хүргүүлсэн. Тус мэдэгдэлд хөдөлмөрийн аюулгүй байдлыг ханган ажиллах, дотоодын хяналтын тогтолцоог нэвтрүүлэх, дотоод хяналт шалгалтаа чангатгах, ажлын байрны аюулгүй ажиллах заавар зөвлөмжийг захиалагч, гүйцэтгэгч талууд мөрдөн ажиллах зэрэг зөвлөмжийг өгсөн. Шалгалтын нэгдсэн дүгнэлт гараагүй, хяналт шалгалт үргэлжилж байна.
