“Тавантолгой” ХК 268 мянган тонн нүүрс хулгайгаар тээвэрлэсэн гэх асуудлыг УИХ-ын гишүүн Л.Энхболд мэдээлсэн. Тэгвэл Ерөнхий сайдыг Өмнөговь аймагт ажиллах үеэр дээрх асуудлыг дахин сөхөж, хулгайгаар нүүрс тээвэрлэсэн бол хариуцлага тооцохыг засгийн газрын тэргүүн үүрэг болгожээ. Энэ хүрээнд Уул уурхай, хүнд үйлдвэрлэлийн яамнаас ажлын хэсэг гарган, ажиллуулж эхэллээ.
Гэхдээ УУХҮ-ийн сайд, УИХ гишүүн Д.Сумъяабазар 268 мянган тонн нүүрс хил даваад хэдэн мянган машины ачаа болоод гарна гэдэгт итгэхгүй байгаагаа илэрхийлсэн юм. Тэрээр хэлсэн үгэндээ “Тооцоолол алдсан уу, 268 мянган тоонноор нь алдана гэж байхгүй байх. Нарийн тооцоо судалгаа хийгээд, ажлын хэсэг гарган, хууль хяналтын байгууллагатай зэрэгцүүлж ороод, бодит үнэнийг тодруулж эргэн мэдээлнэ. Үнэхээр ийм хэмжээгээр хулгайлаад аваад явчихдаг бол бас айхтар л хэрэг болно.” гээд, хэрэв энэ хэмжээний нүүрс хулгайн замаар борлуулагдсан бол буруутныг олж хариуцлага хүлээлгэнэ гэсэн юм. Түүнчлэн нүүрс байсан уу, баяжмал байсан уу гэдгийг ч тогтоох шаардлага гарч байгаа юм байна.
“Эрдэнэс Тавантолгой” компанийн лицензтэй талбайгаас 268 мянган тонн нүүрс алга болсон гэх уг маргаан 2007 оноос эхтэй. “Эрдэнэс Тавантолгой”, орон нутгийн өмчит Тавантолгой компанийн хоорондын хилийн цэс тогтоох шаардлага гарсан. Улмаар 2014 онд үүнийг эцэслэн шийдвэрлэж хоёр компанийн зүгээс ажлын хэсэг гаргаж, хилийн цэсийг тогтоон, аюулгүй ажиллагааг хангах хүрээнд мөргөцөгийг намсган зөөвөрлөж, буулгах шилжүүлэх ажиллагааг хяналттайгаар явуулсан байдаг. Үүнийг УИХ-ын гишүүн Л.Энхболд хулгайн тээвэрлэлт гэж үзэж байгаагаа илэрхийлээд буй юм. /Түүний мэдээллийг ЭНДЭЭС үзнэ үү./ Тиймээс ажлын хэсэг байгуулан шалгахаар болжээ.
