Хэвлэл мэдээллийн салбараас дэд сайд хүртлээ дэвшсэн Б.Цогтгэрэлийн хөрөнгө бас л олны хараанаас мултарсангүй. Залуу хүн богино хугацаанд хэрхэн хөлжсөн нь олны сонирхлыг татахаас яах билээ.
Түүний хувьд анх МАХН-ын дарга Н.Энхбаяр ахыгаа тойглож, эргээд булгиж, сүүлд нь МАН-ын аппаратад ажиллаж байгаад УИХ дахь МАН-ын бүлгийн зөвлөхөөр ажиллаж байв. Тэр үедээ шилэн данс онгичиж, улмаар “Шилэн” Цогоо гэх салшгүй гуншинтай болсон. Бас түүнийг “Дарваан хар” ч гэх нь бий.
Ингээд Зам тээврийн хөгжлийн дэд сайдаар томилогдсоноосоо хойш яамны эрхэм болсон тэрээр ХОМ-тээ 2015 оноос хойш нийт 820 сая төгрөгийн хоёр байртай, 2015 онд Лексус-470, Lexus RX-400 автомашинтай байснаа 2016 оноос хойш Лексус-470 нь хасагдсан гэх мэт байдлаар мэдүүлжээ.
Үүнтэй холбоотойгоор нэгэн иргэн түнээс доорх асуултыг тавихад Шилэн Цогоо ийн хариулсан байна.
-Та яаж 820 сая төгрөгийн байртай болсоноо тайлбарлаад өгөөч? гэхэд Б.Цогтгэрэл:
-Яаж 820 саяын байртай болсон??? гэнээ. 2011 онд 30-тайдаа ажил хөдөлмөр хийж авсын. Энд хүн муулж суухаар эхнэр хүүхэд гэр бүлдээ наад цаг заваа гарга. Харахад 50 нэлээд гарсан хүн шиг л байхын гэжээ.
“Ичсэн хүн хүн ална” гэгчээр муу үг хэлгүй, энгийн асуултад ингэж яаран бүдчин хариулт өгсөн нь харин ч өөрийгөө илчлэх шиг.
Ямартай ч ард түмний төрийн түшээд, албан тушаалтнуудад тавих анхаарал, хяналт хэзээ ч сулрахгүй гэдгийг эрхэм өндөр сэнтийтнүүд өдөр бүр санаж, үг хэлээ цэгцэлж, үргэлж бэлэн байхгүй бол буруу зөрүү үгнээсээ болж булайгаа дэлгэж, урт хэлээрээ хүзүүгээ ороох нь байна шүү.
