“Монголын эцэг эхчүүдийн үндэсний зөвлөл”-өөс олон улсад зөвшөөрөгдөөгүй хүүхдийн вакцины туршилтыг Монгол Улсад явуулж байна гэсэн асуудлаар өнөөдөр хэвлэлийн бага хурал зарласан юм. Харин тэд сүрьеэ өвчнөөс сэргийлэх гэсэн нэрийдлээр хүүхдүүдийг туршилтанд оруулж байгаа талаар мэдээлэл өглөө.
Мэдээллийн эхэнд “ЕБС-ийн 8214 бага насны хүүхдэд Д витамин гэх зүйлийг албадан уулгаж, эмийн туршилт хийж буй талаар эцэг эх, багш, эмч нараас ирсэн гомдол мэдээллийн дагуу уг үйл ажиллагааг судалж үзэхэд бидний олж мэдсэнээр, хүүхдүүд дээр хоёр удаагийн туршилтын ажлыг хийж байсан үйл ажиллагаатай холбоотой байх магадлалтай гэдгийг тогтоосон. МУ-ын Үндсэн хуулиар олгогдсон хүүхдийн эрүүл аюулгүй орчинд амьдрах эрхийг зөрчин, хүүхдүүдэд эмийн туршилт, судалгаа хийх зөвшөөрлийг Эрүүл мэндийн яам олгож, БСШУЯ хамтран зохион байгуулж ажилласан болох нь мөн баримтаар нотлогдсон. Бид ЭМЯ, БСШУЯ, ХНХЯ-д бичиг өгсөн. Бага насны хүүхдүүдэд сүрьеэгийн эмийн туршилт судалгаа хийж буй энэ бусармаг үйл ажиллагаагаа таслан зогсоож, тайлбар өгөхийг хүссэн бичгийг гурав хоногийн хугацаатай өгсөн боловч ХНХЯ-наас бусад нь огт хариу өгөөгүй.” гэлээ.
Холбогдох яамдад өгсөн бичигт:
-Сүрьеэ өвчнөөс Д витамины нөлөөгөөр урьдчилан сэргийлэх нь гэсэн энэ туршилт судалгааны төслийг нэн даруй зогсоох,
-Хүүхдийн эрүүл мэндэд учруулсан хохирлыг судлан тогтоох, барагдуулах,
-Гэм буруутай этгээдэд хариуцлага тооцох ажлыг эхлүүлэхийг шаардсан бөгөөд уг шаардлагыг өнөөдөр мөн Засгийн газарт хүргүүлж байгаа юм байна.
Туршилт хэмээн үзэж байгаа үндэслэлээ тэд тайлбарлахдаа “Эрүүл мэндийн үүсгэл ХХК нь ЭМЯ-наас зөвшөөрөл авч, Боловсролын яамтай хамтарсан ажлын хэсэг байгуулаад нийт 8214 хүүхдэд буюу нийслэлийн 15 сургууль дээр зохион байгуулагдаж байгаа энэ ажил 2015 оны хоёрдугаар сараас эхэлсэн. 7 хоног болгон 1 тун Д витаминыг хүүхдийн аманд хийж өгөөд ус уулгаад, араас нь амыг нь шалгадаг. Ингэж хүчээр эм уулгаж байна. Эмч нар туршилтын шинжтэй ийм ажиллагааг хүүхдүүд дээр явуулахыг бид зөвшөөрөхгүй гэж байгаа. Тиймээс энэ талаар төрийн болон хууль хүчний байгууллагад хандахыг биднээс хүссэн. Урьд нь Ерөнхий сайдад үүнийг шалгаж өгөөч гэж бичиг хүргүүлсэн. Дараа нь гурван яаманд бичиг хүргүүллээ. Хэрэв хариу ирүүлэхгүй бол цаашдаа нийт хохирсон эцэг эхчүүд нэгдсэн хөдөлгөөн өрнүүлнэ. Бидний олж мэдсэнээр энэ туршилт бүх сургуулиуд дээр хийгдэнэ гэсэн мэдээллийг авсан байгаа. Энэ бол маш аюултай зүйл юм.” хэмээн ярьж байлаа.
Уг туршилт нь Монгол хүүхдийн оюун санаа, эрүүл мэндэд ноцтой хохирол учруулж, Монгол хүний удмын санг устгах хүртэл гаж нөлөө үзүүлж, эмгэг өвчин үүсгэх шинж тэмдэг илрээд байгаа тул эдгээр 8214 хүүхдүүдийн эцэг эхчүүд хүүхдүүдээ туршилтанд оруулахаас нэн даруй татгалзахыг уриалж байгаагаа энэ үеэр хэллээ. Мөн тус зөвлөлд хандаж, хүүхдийн бие, эрүүл мэндэд ямар нэгэн нөлөө үзүүлсэн талаарх мэдээллийг ирүүлэхийг хүслээ. Учир нь уг судалгаа, шинжилгээнд хамрагдсан хүүхдүүд нь ямар ч өвчлөлгүй хэмээн сонгогдож уг туршилтад орсон цоо эрүүл хүүхдүүд байсан аж. Өөрөөр хэлбэл, туршилтанд сүрьеэтэй хүүхдийг сонгож, эдгэх процетурыг ажиглах ёстой байтал эрүүл хүүхдэд энэ бэлдмэлийг өгөөд сүрьеэгээр өвчлүүлсний дараа эдгээх процетурын 1, 2, 3-р шатны туршилтын үйл ажиллагааг нэгэн зэрэг хийж байна гэж тэд үзэж байгаа аж.
“Монголын эцэг эхчүүдийн үндэсний зөвлөл”-ийн дэд тэргүүн н.Эрхэмбаатар “MHI буюу “Монголын эрүүл мэндийн үүсгэл” ХХК нь Монголын 10 мянган хүүхдэд сүрьеэгийн далд хэлбэрийн судалгааг хийсэн байна. Энэ нь сүрьеэгийн далд хэлбэрийн тархалтыг судлах судалгаа. Үүнд 10 мянган хүүхдийн 5 хувьд, байшин хорооллын 20 хувьд нь илэрсэн гэсэн дүгнэлт гарсан байгаа юм. Ингээд 15 сургуульд Д витамин тарааж өгснөөрөө сүрьеэгээс урьдчилан сэргийлэх боломжтой гэж үзэж анх энэ төслийн ажиллагаа эхэлсэн байдаг юм. Тэгээд ямар ч эцэг эхийн зөвшөөрөлгүйгээр 1-5 дугаар ангийн хүүхдүүдэд цусны шинжилгээ хийсэн. Энэ шинжилгээгээр эрүүл гарсан хүүхдүүдийн эцэг эхчүүдийг тусгайлан дуудаж уулзаад сүрьеэгийн тархалт их байгаа тухай тайлбарлаж, Д витаминаар үнэгүй урьдчилан сэргийлэх судалгаанд оролцуулах гэрээнд гарын үсэг зуруулж зөвшөөрөл авсан байдаг юм. Судалгаанд ноцтой зүйлүүдийг дурьдсан байгаа. Гэрээнд дурьдсанаар судалгаа 3 жил үргэлжилнэ.“ гэх мэт мэдээллийг өгсөн юм. Түүний хувьд эгчийнх нь дүүгийн баруун талын уушги нь хатгуулж өвдөж байгаа. Сүүлийн үед биеийн тамирын хичээлдээ орохоо больсон. Нүд нь ойр ойрхон анивчдаг, биеийн хувьд сулбагар, сульдаа болжээ.
Эцэг эхчүүдтэй хийсэн тухайн гэрээ нь эцэг эхчүүдийг төөрөгдүүлж байна гэж тус зөвлөлийнхөн үзээд үүнийг туршилт хэмээн дүгнэж байгаагаа илэрхийллээ. Судалгаанд хотын захын хорооллын 14, байшин хорооллын 1 сургуулийн хүүхдүүд хамрагджээ.
Олон улсын жишгээр бол эмнэлзүйн туршилтыг эрүүл болон насанд хүрэгчдэд л хийдэг. Мөн тодорхой өртөгтэйгээр хийдэг гэдгийг тэд сануулж байлаа. Харин манайд ийм туршилтыг судалгаа гэдэг байдлаар харуулж, зөвхөн эцэг эхийн гарын үсэгтэйгээр хүүхдийн, Монголын ирээдүйг хувь заяаг туршилтанд оруулж байна гэж үзэж байгаа тул ийнхүү хэвлэл мэдээллийн байгууллагад хандаж байгаа гэлээ.
