Ховд аймгийн цэргийн 123-р ангид сүрьеэ өвчин дэгдэж, цэргүүд халдвар авсан талаар ХӨСҮТ-өөс мэдээлэл өглөө.
ХӨСҮТ-ийн Сүрьеэгийн тандалт, судалгааны албаны тархвар судлаач эмч Б.Цолмон: ХӨСҮТ-ийн Сүрьеэгийн тасаг Ховд аймгийн 123 дугаар цэргийн ангид ажиллаад ирлээ. Дөрөвдүгээр сард эхний өвчлөлүүд гарсан байсан ч нууц үеийн хугацаа таарсан. Гэхдээ хариу арга хэмжээнүүдийг авч дэгдэлтийг хяналтад аваад байна. Эмчилгээнд хамрагдаад цэргүүдийн биеийн байдал ч сайн байгаа. Цэргийн анги нь өөрөө өвөрмөц орчин. Ялангуяа амьсгалын замын халдварын үед эрсдэлтэй нөхцөл болох гээд байдаг. Мөн ар гэрийн хавьталтай байлдагчид их байна. Эрэгтэйчүүдийн дунд, цэргийн насны залууст сүрьеэгийн өвчлөл хамгийн их байдаг. Өвчлөлийг тархахаас сэргийлж сүрьеэгийн нянг өвчлөл болохоос өмнө устгах урьдчилан сэргийлэх эмчилгээг хийдэг. Түүнчлэн, ангийн бие бүрэлдэхүүнийг шинжилгээнд хамруулахад нийт 21 цэрэг халдвар авсан нь батлагдсан. Сүрьеэгийн халдвартай хүнийг хамгийн багадаа зургаан сарын турш эмчилдэг дэлхийн жишиг бий. Энэ жишгээрээ цэргүүдийн эмчилгээг эхлүүлсэн.
Монгол Улс сүрьеэгийн дарамт өндөртэй дэлхийн 30 улсын тоонд ордог. Учир нь 100 мянган хүн тутмын 700 нь сүрьеэтэй гэж тоологдсон байдаг. Үүний дийлэнх нь 15-33 насны эрчүүд зонхилж байна. Энэ төрлийн халдвараас агааржуулалт, амны хаалт тогтмол зүүснээр сэргийлэх боломжтой” гэв.
