УИХ-ын гишүүн С.Цэнгүүн Эрчим хүчний реформын үндэсний хорооноос гарч буйгаа албан бичгээр мэдэгдсэний дараа олон нийтийн сүлжээнд түүнийг шүүмжлэх, мэдээллийг цочирдон хүлээж авах олон янзын байр суурь бүхий постууд хөвөрч эхэлсэн.
Тэдгээрийн дундаас “Монгол мэйд” брэндийг үүсгэн байгуулагч, олон нийтийн харилцааны мэргэжилтэн Б.Солонгын илэрхийлсэн байр суурь анхаарал татлаа.
8 тэрбум харин ч багадна!
Цэнгүүн ПиАрын салбарт бага сага хутгалдаж явсан хүн төсвөө голоо юм болов уу даа! Мэдээллийн эдийн засгийн үр нөлөөг үнэлж, өгөөжийг нь хүртэж сурахсан.
Төр бодлогоо сайн ойлгуулах нь чухал.
Мэдээ, мэдээллийг үнэгүй хийсээд явж байдаг мэт ойлгодгоо хэзээ болих вэ? Хэвлэл мэдээлэл, олон нийтийн харилцааны салбарынхан буяны байгууллага уу? Адилхан цалин тавина, тоног төхөөрөмж авна, цаг наргүй тархиа ажиллуулна.
Хурал хуй тэдэн тэрбумаар хийлээ л гэнэ.
Мэдээлэл солилцож, чигээ зөв авч байж аливаа ажил зөв замдаа орно. Төр иргэдтэйгээ ойлголцохын тулд олон ПиАрчин бэлтгэх ёстой.
Маркетинг, ПиАраа ялгаж салгах чадалгүй, бядгүй мэргэжилтнүүд хаа сайгүй. ПиАр зөв эзэмшиж чадвал уулыг өргөж, усыг эргүүлэх лаг мэргэжил ш дээ. Сингапур батлан хамгаалах, боловсрол, эрүүл мэндийн салбартаа хамгийн олон ПиАрчин бэлтгэдэг.
Анхнаас нь пиар гэдэг юмны суурь ойлголтыг буруу суулгасны лайгаар нэг л их мөнгө идэж ууж хор найруулдаг төлөвт амьдрах юм.
Нэг дэлгүүр хаалттай байгааг мэдэлгүй хаалга мөргөсөн 100 хүний зардал, цаг хугацаа ямар байх уу, нэг сайтаар тэр дэлгүүр хаалттай байгааг мэдсэн 1000 хүн хэдэн төгрөг хэмнэх үү?
Бүтэн жил үргэлжлэх, үндэсний хэмжээний реформын коммуникацийн ажлыг би лав багадаа 12 тэрбумд авна аа.
Арваад жилийн өмнө Голомтын ТУЗ хурал дээр маркетингийн хэлтэс зардлаа тэдээр хэмнэжээ гэснийг сонссон ТУЗ гишүүн “Сурталчилгаагаа багасгаж борлуултаа боомилдог нь яаж байгаа юм” гэсэн гэдэг.
Ийм өнцгөөс асуудлыг хардаг удирдагч олон болог ээ!
