УИХ дахь Ардчилсан намын бүлэг хуралдав.
Хуралдааны үеэр УИХ-ын гишүүн С.Цэнгүүн “Бид Монгол Улсын мөнгөний бодлогын талаар ярилцаж байна.
Монголбанкны хариуцсан үндсэн бодлого бол инфялци. Инфляцид хамгийн их нөлөөлдөг зүйл бол Засгийн газрын урсгал зардлаар дамжин бэлэн мөнгийг зах зээл рүү их хэмжээгээр нийлүүлэх ажил юм. Жил бүрийн сонгуультай холбоотойгоор элдэв шинэ төслийг санаачилдаг.
Тухайлбал, 2024 оны хоёрдугаар сард “Эрдэнэс тавантолгой” компанийн 1072 хувьцааны ногдол ашигт нэг хүнд 350,000 төгрөг өгнө гэж тооцоод тухайн жилдээ 4.5 их наядын цэвэр ашигтай ажилласан “Эрдэнэс тавантолгой” компаниас 3.9 их наядыг нь тараасан.
Энэ мөнгөөр 600MBт цахилгаан станц барих бүрэн боломжтой байсан ч иргэдэд бэлэн мөнгөөр тараагаад дууссан нь тооноос харагдана. Иргэдэд хамгийн хүрсэн хөтөлбөр бол “Хүүхдийн мөнгө”. Энэ үргэлжлэх ёстой. Гэхдээ үүнийг зүгээр л дансанд нь бэлэн мөнгө хэлбэрээр шилжүүлэхээс илүү хөдөлмөр эрхлэлтийг дэмжих ёстой.
Хүүхдийн мөнгийг өгөхгүй, хасахгүй гэдэг асуудал байхгүй. Хамгийн гол нь энэ бодлогыг яаж зөв болгож, хөдөлмөр эрхлэлттэй уях вэ. Хүүхдийн мөнгө Монголын мөнгөний бодлогод яаж нөлөөлдгийг Монголбанкнаас асуумаар байна” гэв.
Монголбанкнаас өнөөдрийн байдлаар сар бүр хуваарилж буй хүүхдийн мөнгөний 30 хувь нь хуримтлал руу, 70 хувийг хэрэглээнд зарцуулж байна гэсэн статистикийг танилцуулав. Хүүхдийн мөнгө хуваарилсны дараа хотын захад хүнсний болон согтууруулах ундааны борлуулалт нэмэгддэг тул эерэг болон сөрөг үр дагавар байна гэж үзэж буйг онцоллоо.
