Хятадын баруун өмнөд нутгийн Төвөдийн өөртөө засах оронд мягмар гаргийн өглөө 6.8 магнитудын хүчтэй газар хөдөлж, Хималайн нурууны хойд энгэрт олон мянган байшин барилга нурсны улмаас нийт 126 хүн амиа алдаж, 188 хүн гэмтэж бэртсэн байна. Газар хөдлөлт Бээжингийн цагаар өглөөний 9:05 цагт болсон бөгөөд голомт нь Шигазэ хотын Динри хошууны Цого сууринд байв. Газар хөдлөлтийн голомтоос 20 км-ийн эргэн тойронд 27 тосгон, 6900 орчим хүн амьдардаг.
Одоогийн байдлаар 3609 байшин нурсан гэж Шигазэ хотын захиргаа мэдээлээд, нурангид дарагдсан 407 хүнийг аварч, байгалийн гамшигт өртсөн 30 мянга гаруй оршин суугчийг нүүлгэн шилжүүлсэн гэдгийг дурджээ.
Аврагчид эрэн хайх, аврах ажиллагааг үргэлжлүүлсээр байна. Агаарын хэм Цельсийн -17 хэм хүрч хүйтрэх төлөвтэй байгаа тус бүсэд нүүлгэн шилжүүлсэн иргэдэд зориулан майхан барихын тулд аврагчид мөн цаг хугацаатай уралдан ажиллаж байна. Газар хөдлөлтийн голомт болох Цого тосгон болон хамгийн их хохирол амссан Чамко тосгонд олон байшин барилга нурж, оршин суугчид гадаа байрлаж байгааг Синьхуа агентлагийн сурвалжлагчид харжээ. Метог тосгоны оршин суугч 49 настай Пасан Цэрингийн ярьснаар, эхний хүчтэй чичирхийлэл үүр цайхын өмнө болж, чийдэн, тавилганууд чичирхийлэн хөдөлсөн ба түүний дараа хоёр дахь бөгөөд илүү хүчтэй газар хөдлөлт болсон тул би тэр даруй гадаа гарсан гэв. Тосгоны өөр нэгэн оршин суугч Пасан барилгын нурангыг цэвэрлэж байхдаа “би урьд өмнө нь ийм хүчтэй газар хөдлөхийг үзэж байгаагүй” гээд, бид одоо хаана хонох вэ гэдэгт хамгийн их санаа зовж байна, тосгонд хэдэн нөөц майхан байгаа, дахиад майхан илгээсэн тухай албаны хүмүүс хэлсэн хэмээн ярьжээ.
Гурум тосгоны намын дарга Цэрин Пунцог байгалийн гамшигт 74 настай ээжийгээ алдсан бөгөөд гэр бүлийн хэд хэдэн гишүүн нь нурангид дарагдсан хэвээр байна. 222 оршин суугчтай уг тосгонд 22 хүн амиа алдсаны 11 нь хүүхэд байсан гэж тэрбээр хэлээд, тосгоны бүх байшин эвдэрч сүйдсэн гэлээ.
“Газар хөдлөх үед хөгшид хүүхдүүд төдийгүй залуучууд ч гэрээсээ гарч чадаагүй” гэж тэрбээр нэмж хэлсэн байна. Мягмар гарагт БНХАУ-ын дарга Ши Жиньпин байгалийн гамшигт өртсөн бүсэд хүмүүсийн амь насыг аварч, гарз хохирлыг багасгахын тулд бүх хүчээ дайчлан ажиллахыг үүрэг болгожээ. Шадар сайд Жан Гуочин байгалийн гамшигт нэрвэгдсэн бүсэд аврах, тусламж үзүүлэх ажиллагааг удирдаж байна. Хятадын төв Засгийн газрын эрх баригчид газар хөдлөлтөд нэрвэгдсэн бүс нутагт майхан, өвлийн хүрэм, хөнжил, эвхдэг ор зэрэг гамшгаас аврах 22 мянга орчим эд зүйл, мөн өндөр газар болон хүйтэн бүс нутагт ажиллахад шаардлагатай тусламжийн хэрэгслүүдийг илгээжээ. Төвөдөд болсон газар хөдлөлтийн уршгийг арилгах хариу арга хэмжээний зэргийг I дүгээр буюу хамгийн өндөр түвшинд хүргэж ахиулсан гэж тус бүсийн шуурхай командын төв мягмар гарагт мэдэгдсэн байна. Төвөдийн удирдлага газар хөдлөлтийн голомтод гал сөнөөгч, цэрэг, цагдаа, мэргэжлийн аврагч зэрэг 12 мянга гаруй алба хаагчийг илгээжээ.
Сангийн яам болон Онцгой байдлын яамнаас мэдэгдсэнээр, Төвөд дэх гамшгаас аврах ажиллагаанд дэмжлэг үзүүлэх зорилгоор 100 сая юань /ойролцоогоор 13.9 сая ам.доллар/ хуваарилсан байна.
Үндэсний өөрчлөлт шинэчлэлтийн хороо мөн гамшгийн дараах яаралтай сэргээн босголтын ажилд дэмжлэг үзүүлэх зорилгоор 100 сая юанийн санхүүжилт олгожээ. Хятадын Улаан загалмай нийгэмлэг газар хөдлөлтөд нэрвэгдсэн бүсүүдэд майхан, хөнжил, дулаан хүрэм, эвхдэг ор зэргийг илгээхээр яаралтай арга хэмжээ авч эхэлсэн байна. Мягмар гаргийн 18:08 цагийн байдлаар газар хөдлөлтийн голомттой ойролцоох гурван суурингийн харилцаа холбоог сэргээсэн гэж China Mobile компанийн Төвөд дэх салбараас мэдээлжээ.
Э.Хулан
Эх сурвалж: “Монцамэ” агентлаг
