Дэлхийд данстай хилчин тамирчин

 

Казахстаны нийслэл Астана хотноо жүдо бөхийн насанд хүрэгчдийн дэлхийн аварга шалгаруулах тэмцээний гурав дахь өдөр алтан соёмбот Монголын тугийг хилчин тамирчин маань мандуулж чадлаа. Хамгийн гол нь тэрбээр тэмцээний салхийг хагалж чадсан гэдгээрээ эрхэм. Тэрбээр эмэгтэйчүүдийн 57 кг-ын жинд хүч үзэж өрсөлдөгчдөө ялсаар хүрэл медалийн төлөө Канадын бөх Катринатай барилдаж, хүнд барилдааны эцэст торгуулаар ялсан юм. Ийнхүү тэрбээр дэлхийд нэрээ дансалж, бөмбөрцгийн хүчтэнүүдийн эгнээнд орлоо. Тэрбээр D хэсгийг тэргүүлэн барилдаж, эхний тойрогтоо хийлсэн. Хоёрдугаар тойрогт Хятадын Лиу Яныг, гуравдугаар тойрогт Косовагийн Нора Жаковаг ялсан. Гэвч хэсгийн аваргын төлөө Японы алдарт бөх Каори Нацумотод ялагдсан. Гэсэн ч манай бөх гандан бууралгүй торгуулын тойрогт Португалын Телма Монтерог ялж гарч ирснээр ийн хүрэл медаль хүртэх замаа зассан юм. 

    Амжилтын цуурай нь тасралтгүй хөвөрч буй бяртай, ёндоотой хилчин охин маань ингэхэд Увс аймгийн Баруунтуруун сумын харьяат. 1991 оны гуравдугаар сард төрсөн. Ам бүл наймуулаа. Айлын том охин тэрбээр дороо зулай гишгэн төрсөн таван дүүтэй баян хүн. \”Хилчин” спорт хороонд харин тэрбээр 2010 онд анх хөл тавьсан. 2009 онд анх удаа зохион байгуулагдсан \”Чингис хаан” Гранпри тэмцээнд оролцож, мөнгөн медаль авчихсан үедээ тэрбээр өөрийн хүсэлтээр энэ спорт хороог сонгосон гэдэг. 2011 онд ахлах түрүүч цол авч байсан бол ололт амжилт, хөлс хөдөлмөрөө хилчдээрээ үнэлүүлэн ахлах дэслэгч болжээ. 

   Миний бие \”Хилчин” спорт хорооны тамирчин бүсгүйтэй одоогоос хоёр сарын өмнө таарсан юм. Жудо бөхийн шигшээ багийн дасгалжуулагч, \”Хилчин” спорт хорооны тамирчин, ахмад Х.Эрдэнэт-Од багшийнд зочлох үеэр тэрбээр таарч сонин сайхан хөөрөлдөхөд, \”Хамгийн ойрын зорилго дэлхийн аваргаас медаль авах. Цаашдаа илүү их амжилт гаргаж багшийгаа баярлуулна” гэж билээ. Тэгвэл багш шавь хоёр санасандаа хүрчээ. Гэхдээ дэлхийн аваргын хүрэл медаль түүний зайлшгүй авах ёстой медаль байв. Цаг нь болсон учир ийн хэлэв. Учир нь тэр залуу байна. Тэр бяртай, хүчтэй, зорилготой, аагтай байна. Түүний өмнө хүн төрөлхтний их наадам хүлээн буй. Хилчдийнхээ өмнөөс итгэл тээн, ерөөл өргөн тамирчнаа дэмжье. Ажилт хүсье бас баяр хүргэе Сумъяадаа!

Эх сурвалж:bpo.gov.mn