“Улсаа аврах ард түмний үндэсний хөдөлгөөн” болон УИХ-аас “Оюутолгой” компанийн үйл ажиллагааг хянах ажлын хэсгийн гишүүд болох А.Эрдэнэбаяр, Б.Жагар нар “Оюутолгой” компанийн ТУЗ-ын Монгол талын төлөөлөгч гишүүдийг шалгахыг шаардсан бичгийг өчигдөр АТГ-д хүргүүллээ. Ингэхдээ зөвхөн ТУЗ-ийн одоогийн гурван гишүүнийг бус одоо болон урьд өмнө байсан бүх гишүүдийг нь шалгах шаардлагатай гэдгийг онцолсон юм.
Тус шаардлагад “Оюутолгой”-н үйл ажиллагаанд хяналт шалгалт хийж, гэрээг дүгнэх ажлын хэсэг УИХ-ын даргын 2018 оны гуравдугаар сарын 23-ны өдрийн 57 дугаар захирамжаар байгуулагдаж, тус ажлын хэсэгт “Улсаа аврах ард түмний үндэсний хөдөлгөөн”-ий Удирдах зөвлөлийн дарга А.Эрдэнэбаяр, Ерөнхий зохицуулагч Б.Жагар нар оролцож байна. “Оюутолгой”-н Монголын талын 34 хувийг төлөөлөн ажиллаж байсан, одоо ажиллаж байгаа ТУЗ-ын гишүүд болох Монгол Улсын Ерөнхийлөгч асан Н.Багабанди, Ч.Алтаннар Б.Мөнхбаатар нарын хүмүүс жилийн 100 мянган ам.долларын цалин хөлстэй, өндөр хангамжтайгаар ажилладаг байна. “Оюутолгой”-н хөрөнгө оруулагч гэгч 66 хувийг эзэмшиж буй талаас гадаад улсын аль нэг банкнаас зээл авахын өмнө албан бичгээр дээрх ТУЗ-ийн гурван хүнээр дамжуулан Монгол Улсын Засгийн газарт мэдэгдэж байсан гэх баялгийн эзэн болох Монголын ард түмэнд энэ талаар тухай бүрд нь мэдэгдээгүй, хууль бус гэрээг өөгшүүлж, нам дамжсан олигарх бүлэглэл газар шороо, байгалийн баялгийг ямар ч хяналтгүйгээр гадныхантай хуйвалдан завшиж, хууль шуударга ёсыг уландаа гишгэж, Монгол хүний үнэлэмжийг алдагдуулж, эрх ашгийг нь хохироосоор байгааг иргэд, олон нийтийн байгууллагууд удаа дараа мэдээлсээр байтал хөрөнгө оруулагч нэртэй эдийн засгийн алуурчдын гар хөл болж, улс эх орны эрх ашгийг өөрсдийн эрх ашгаас доогуур тавьж, төрийн нууц нэрээр халхавч хийж, хийх ёстой үндсэн ажлаа хийхгүйгээс хоногт бид 3 сая долларын өрөнд орж, манай улсыг төлөөлж байсан, одоо байгаа гурван хүн хөрөнгө оруулагч талын сахиулын үүрэг гүйцэтгэж байгааг УИХ-ын гишүүд ч хэлж байна. Тиймээс “Оюутолгой”-н ТУЗ-д урьд өмнө байсан хийгээд одоо байгаа гурван хүнийг нэн яаралтай шалгаж, хуулийн хүрээнд хариуцлага тооцохыг шаардаж байна. ” гэжээ.
Товчхондоо ард иргэдийн мэдэх шаардлагатай мэдээллийг нуун дарагдуулж, хөрөнгө оруулагч компанийн эрх ашгийн төлөө ажилласан тул АТГ-аас тус гишүүдийг шалгахыг шаардаж байгаа аж.
Мөн энэ үеэр “Улсаа аврах ард түмний үндэсний хөдөлгөөн”-ий тэргүүн А.Эрдэнэбаяр ““Оюутолгой” компани “Оюутолгой”-н баялгийг барьцаалан гадны банкуудаас зээл авч, Монголын тал зээлийн хүүг нь төлж байна. Энэ үйл ажиллагааг гүйцэтгэхдээ “Оюутолгой” компани Монгол талын ТУЗ-ийн төлөөлөгч нараар дамжуулан ард иргэдэд мэдээлэл өгөх үүргээ гүйцэтгэсэн. Гэтэл ТУЗ-ийн гишүүд үүнийг ард түмэнд зарлалгүй, гадны компаниудын сахиулын үүргийг гүйцэтгэж байна. Мөн тухайн зээлээрээ Ханбогд суманд цахилгаан станц барьж өгөөд үүнийгээ Монголын засгийн газарт дэлхийн зах зээлийн ханшаас хамаагүй өндөр буюу 3,5 тэрбум доллараар хүлээлгэн өгч бас л Монголын засгийн газар зээлийг нь төлж байна. Энэ мэтчилэн хуул бус үйлдлүүдээс болоод бид АТГ-д бид хандаж байна”” гэв.
“Оюутолгой”-н ТУЗ-ийн гишүүнээр Монгол улсын ерөнхийлөгч асан Н.Багабанди хоёр дахь удаагаа, Б.Мөнхбаатар, МУИС-ийн дэд профессор Ч.Алтаннар нар 2016 оны есдүгээр сараас эхлэн сонгогдон ажиллаж байгаа билээ.
