Уран Зургийн Галерей нь Монголын орчин үеийн дүрслэх урлагийн бүтээлүүдийг олон түмэнд сурталчлан танилцуулах зорилгоор 1991 онд Дүрслэх Урлагийн Музейгээс салж бие даан үйл ажиллагаагаа явуулж эхэлсэн байдаг.
МУЗГ нь нийт 4000 гаруй үзмэртэй бөгөөд үзүүллэгийн танхимдаа 10 орчим хувь нь дэглэгдэж хүртээл болсоор ирсэн аж. Түүнчлэн жилдээ 40-50 орчим үзэсгэлэн арга хэмжээг тогтмол зохион байгуулдаг юм байна.
Одоогийн байдлаар галерейн:
Хойд танхимд “XX зууны уран зургууд” үзэсгэлэн зохион байгуулагдаж байна.
Баруун танхимд Модерн зургийн чиг хандлагаас сэдэвчилсэн үзэсгэлэн олны хүртээл болж байна. МУЗГ-н сан хөмрөгийн модерн чиглэлийн үзмэрийн цуглуулга энд дэлгэгджээ.
Түүнчлэн уран баримал болон уран сийлбэрийн сан хөмрөгийн хөөмлийн урлалын үзмэрээр “Монгол хөөмлийн урлаг” сэдэвчилсэн үзэсгэлэнг, уран сийлбэрийн сан хөмрөгийн сийлбэр, хатгамал, шаазан урлалын үзмэрүүдээр байнгын үзэсгэлэн зохион байгуулан үзэгчдийн хүртээл болгож байгаа юм байна.
Харин гол танхимаас МУЗГалерей Багануур дүүргийн Сод сургуультай хамтран “Содон өнгө” үзэсгэлэнг ОУ-ын хүүхдийн баярт зориулан үргэлжлүүлэн зохион байгуулж байгаа юм. Тус сургуулийн бүтээлч, авьяаслаг хүүхдүүдийн 150 бүтээл үзэсгэлэнд оролцож байгааг Та бүхэн эндээс үзэж сонирхох боломжтой.
Хоёрдугаар давхарт Улсын тэргүүний 24-р сургуулийн сурагч Б. Өсөхбаярын “Миний ертөнц” үзэсгэлэнг дэмжин “Урлахуй” үзэсгэлэнг толилуулж байна. Үзэсгэлэнд уран бичлэг, зураг хосолсон нийт 30 гаруй бүтээлийг дэлгэжээ. Уг үзэсгэлэн энэ сарын 28-29-ний өдрүүдэд үргэлжилнэ.
Урд танхимд зохион байгуулагдах Хэйсэйгийн үеийн япон үндэстний сэтгэлгээг залгамжлагчдын Монгол дахь үзэсгэлэн энэ сарын 30-ны өдөр нээлтээ хийх аж.
Тус галерей нь 1921 оны Ардын Хувьсгал ялснаас хойш өнөө үеийг хүртэлх дүрслэх урлагийн шилдэг бүтээлүүдийг сонгон цуглуулж, сан хөмрөгөө баяжуулах, судлан сурталчилах, хадгалж хамгаалах, нийгэм, түүх, соёлын хөгжлийн зүй тогтлыг баримтжуулах, дүрслэх урлагаар дамжуулан үзэгчдэд гоо зүйн болон урлагийн боловсрол олгох зорилго, чиглэлтэй төрийн үйлчилгээний байгууллага юм.
Галерейн алтан сан хөмрөгт монгол зураг, уран зураг, зураасан зураг, баримал, сийлбэр, хөөмөл, ардын гар урлал, хатгамал зэрэг Монголын орчин үеийн дүрслэх урлагийн шилдэг бүтээлүүд хадгалагдаж байна.
