Өнөөдөр нэр бүхий сэтгүүлчид “Авто замын долоон тэрбумын асуудал” сэдвээр мэдээлэл хийлээ. Тодруулбал, Завхан аймгийн Тосонцэнгэл сумаас Увсын Улаангом чиглэлийн 167 км замын ажил гүйцэтгэлийн талаар шүүмжлэлтэй хандаж, дэвшүүлэх асуудал байгааг дуулгасан юм.
Тус замыг БНХАУ-ын хөрөнгө оруулаллтайгаар “Монгол ЛЗ зам гүүр” компани 660 сая юань өртгөөр, хоёр жилийн дотор концессоор барьж гүйцэтгэхээр Засгийн газартай гэрээ байгуулсан байна. Зам ашиглалтад орсноор Завхан аймгийн хойд талын сумд болон Увс аймаг Улаанбаатар хоттой хатуу хучилттай замаар холбогдох аж.
Гэвч Улаангомын замын зургийг хийлгэхдээ өмнө нь хийлгэсэн Улиастайн замтай уялдуулаагүйгээс 20 гаруй километр газар зэрэгцсэн зам баригдахаар болчхоод байгаа аж. Тус замуудын зураг төслийг 2012 онд Зам тээврийн яамны захиалгаар хийж байжээ. Одоогийн байдлаар Улиастайн зам баригдаж эхэлсэн ч, түрүүлж баригдсан замтайгаа уялдуулан шинэ эхлэх замын зурагт ялимгүй өөрчлөлт хийж 10 км хэмнэх санаачлагыг гаргаад байгаа юм байна.
Энэ талаар сэтгүүлч М.Амарбаяр хэлэхдээ “Тус замын ажил эхэлсэнтэй холбогдуулан ганц хоёр зүйлийг анхаарч үзээч ээ гэдэг хүсэлтийг Завхан нутгийнхны дуу хоолой болж УИХ болон Засгийн газарт хүргүүлэх гэсэн юм. Замын ажлын зураг төсөл нь Тосонцэнгэлийг дөрвөн замын уулзвараас Увсын Улаангом хүртэл 167 км урттайгаар зураг төсөл хийгдсэн байдаг. Энэхүү зураг дагуу зам хийгдэх ёстой ч Завханы Улиастай чиглэлийн зам болон Тосонцэнгэл сумын цаад талаас Улиастай руу чиглэсэн зам байдаг. Тус замын ажил өнгөрсөн жил эхэлж энэ жил дуусах төлөвлөгөөтэйгөөр одоо дуусч байна.
Зургийн дагуу баригдвал 25 км орчим газар Улиастайн замтай зэрэгцэн бие биенээ харсан хоёр зам Хүрэн тал дээгүүр давхих юм. Тиймээс Улаангомын замын эхлэлийг дөрвөн замаас биш, 15 км-ын цаанаас Улиастайн замаас салаалж эхлүүлвэл дор хаяж 10 км зам хэмнэнэ. Энэ нь эдийн засгийн өртгөөрөө 5-7 тэрбум төгрөгийн хэмнэлт хийх боломжтой гэсэн тооцоо гарсан. Замын зургийг ингэж өөрчлөхөд газрын байршлын хувьд ч ямар нэгэн асуудалгүй гэдгийг мэргэжлийнхэн хэлж салбар яам, замын мэргэжлийн зөвлөлд таницуулсан ч хүлээж аваагүй.
Концесс бол эргэн төлөгдөх хүүтэй мөнгө. Иймд хайхрамжгүй байдлаар улсын хөрөнгийг үрэн таран хийхгүй байхыг Завхан аймгийнхныг төлөөлсөн сэтгүүлчид анхааруулж байна. Үүнээс хэмнэсэн 10 км замаа Түдэвтэй сумыг шинэ замтай холбох эсвэл Нөмрөг, Сонгино, Түдэвтэй сумын төвд хатуу хучилттай зам тохижилтын ажил хийх байдлаар үр ашигтай зарцуулах хүсч байна. Үүнийг шулуун татаж сумын төвөөр дайруулбал эдийн засгийн хувьд хэдэн зуун метр зам хэмнэнэ.
Мөн сумын төвийнхөн зам дагаж нүүхгүйгээр байгаа газраа хөгжих боломжтой тул өөрчилж өгөөч гэсэн хүсэлтийг Нөмрөг сумын иргэдийн хурал, Засаг даргын зүгээс Зам тээврийн хөгжлийн яаманд ирүүлсэн. Иймд энэ бүхнийг анхааралдаа авахыг хэвлэлийн хурал зохион байгуулсан сэтгүүлчид ч мэдэгдэж байна” гэв.
Хайхрамжгүй байдлаар улсын хөрөнгийг үрэн таран хийхгүй байхыг сэтгүүлчид анхаарууллаа
}
Шинэ мэдээ
