Налгар зуны улирал ирж, иргэдийн аялал зугаалга хэдийнэ эхлээд буй. Гэвч аюулгүй байдлаа хангаагүй, анхаарал болгоомжгүй үйлдлээсээ болж иргэд амь нас, эрүүл мэндээрээ хохирох харамсалтай явдал гарсаар байна. Уул хадаар аялах, гол усанд орохдоо байнгын сэрэмжтэй байх хэрэгтэй гэдгийг сануулах үүднээс дараах мэдээг хүргэе.
Нийслэлийн Хан-Уул дүүргийн 11 дүгээр хороо, “Чингисийн өргөө” амралтын газраас урд зүгт 200 метр газарт “Богд Хан” ууланд алхалт хийж явсан нийслэлийн Баянзүрх дүүргийн харъяат иргэн 61 настай Д /эрэгтэй/ хадан дээрээс унажээ. Хаднаас унаж бэртсэн тухай дуудлага өчигдөр буюу энэ сарын 4-ний өдрийн 11:56 цагт ирсний дагуу Нийслэлийн Аврах ангийн алба хаагчид 7.5 км замыг туулан 12:10 цагт очиж, цогцсыг буулгаж, Цагдаагийн байгууллагад шилжүүлэн өгсөн байна.
Мөн Сэлэнгэ аймгийн Сүхбаатар сумаас 4 км зайтай Хонгорморьт багийн “Мөндөлтэй хошуу” гэдэг газар сумын харъяат 11 настай Б /эрэгтэй/ өнгөрсөн тавдугаар сарын 28-ны 16:00 цагт “Орхон” голд осолдсон тухай мэдээлсэн билээ. Улмаар 29-ний өдрөөс тус аймгийн болон Дархан-Уул аймгийн Онцгой байдлын газрын нийт 16 алба хаагч, эрэн хайх ажиллагааг зохион байгуулж байгаа юм. Энэ сарын 4-ний өдрийн байдлаар осолдсон газраас ОХУ-ын хил хүртэл нийт 100 км-т, хоёр удаа самналт хийсэн боловч үр дүнд хүрээгүй тул 21:07 цагт эрэн хайх ажиллагааг түр зогсоож, 5-ны өдрийн 07:00 цагт дахин эхлүүлээд байна.
Иймд ард иргэд Та бүхэн аялал зугаалгаар явахдаа аюулгүй байдлаа хангаж, болгоомжтой явахыг сануулж байна.
