Х.Амгаланбаатар: Засгийн газар шуурхай ажиллах санал шаардлагыг бид тууштай тавьж ажиллана

МҮЭ-ийн холбооноос цалин нэмэгдүүлэх тэмцэл хөдөлгөөний явцын талаар өнөөдөр мэдээлэл хийлээ. Монголын Үйлдвэрчний Эвлэлийн Холбооны ерөнхийлөгч Х.Амгаланбаатар “Сангийн сайдын зүгээс нөхцөл байдлыг МҮЭХ-ны холбогдох бүрэлдэхүүнд танилцуулж цалин нэмэгдүүлэх боломжийг ОУВС-тай ярилцаж, цалин нэмэгдүүлэх бололцоог гаргах чиглэлээр ажлын хэсгийг байгуулж ажиллуулахаар болсон. Мөн энэ ажлын хэсэгт итгэл үзүүлж ажиллах нөхцөл бололцоог хангаж ,ажил хаялтын өмнөх суултаа бүрэн хугацаагаар зогсоох нь зөв гэсэн саналыг тавьсан. Энэ уулзалтад оролцсон МҮЭХ-ны удирдлагууд хамтын шийдвэрээрээ маргааш өдрөөс нь 9 хоног үргэлжилсэн ажил хаялтын өмнөх энэ суултыг түр хугацаагаар завсарлуулсан. Үр дүнг хүлээгээд бид нар зүгээр суугаагүй. Энэ хугацаанд ажлын хэсгийн үр дүнг богино хугацаанд гаргуулах санал шаардлага мэдэгдлийг Сангийн яам, Боловсролын яам, Эрүүл мэндийн яаманд тус тус хүргэсэн. МҮЭХ-оос цалин нэмэгдүүлэх үр дүнг богино хугацаанд гаргах зорилгоор нөлөөлье гэсэн арга хэмжээг явуулсан.
ОУВС-ын гүйцэтгэх захирал, Монгол Улсын асуудлыг хариуцдаг холбогдох бүсийн удирдлагуудад, Монгол Улсын Засгийн газартай байгуулсан өргөтгөсөн санхүүжилтийнхээ нөхцөлийг эргэн авч үзэж цалинг нэмэгдүүлэх бололцоо Засгийн газарт олгооч гэдэг албан хүсэлт, шаардлагыг хүргүүлсэн. Энэ хүрээнд ОУВС-ын эрх бүхий хүмүүс ирж Монгол Улсын Ерөнхий сайд, өргөтгөсөн санхүүжилтийн талаар санал солилцоод байгаа. Ерөнхий сайд, УИХ-ын даргын зүгээс цалин нэмэгдүүлэх бодит шаардлага байгаа учраас энэ саналыг эргэн авч үзэх хэрэгтэйг илэрхийлсэн. МҮЭХ-ноос явуулж байгаа тэмцлийн үйл ажиллагаа үргэлжилж байна.Засгийн газар шуурхай ажиллах санал шаардлагыг бид тууштай тавьж ажиллана.
Мөн Сангийн сайд Ч.Хүрэлбаатар, Хөдөлмөр нийгмийн хамгааллын сайд С.Чинзориг, Боловсролын сайд Ц.Цогзолмаа, Эрүүл мэндийн сайд Д.Сарангэрэл нар багтсан 4 яамны хамтарсан ажлын хэсэг энэ цалин нэмэгдүүлэх асуудлаар ажиллаж байгаа. Энэ ажлын хэсгийн үр дүнг хүлээхгүйгээр бид хөдөлмөрийн хамтын маргаанаа эхлүүлэх шийдвэр гаргасан. Үүгээрээ МҮЭХ-ны ажил хаялтын өмнөх суулт нь хууль ёсны тэмцэл рүүгээ орсон. Үүнээс гадна цалин нэмэгдүүлэх асуудлыг дагаад нийгэмд зохиомол үнэ өсдөг. Цалин нэмэгдээгүй байхад зохиомол үнээр иргэдийг улам туйлдуулдаг үзэгдэл сүүлийн 27 жил амь бөхтэй оршиж байна. МҮЭХ өнөөдрөөс эхлэн зохиомол үнийн эсрэг хугацаагүй ажлыг холбогдох төрийн болон төрийн бус байгууллагуудтай хамтарч зохион байгуулна”гэлээ.