УИХ-ын гишүүн Л.Оюун-Эрдэнэд АТГ-аас хариу ирүүлжээ. АТГ-аас 60 тэрбумын гэх хэрэг нь нотлох баримтаар нотлогдоогүй учраас хэргийг хаажээ. Энэ талаар өнөөөдр тэрээр мэдээлэл хийв.
Тэрээр хэлэхдээ “Би АТГ-т хандаж 60 тэрбумын хэргийн мөрдөн байцаалтын явцтай холбоотой тодруулга авахыг хүссэн. Өнөөдөр АТГ-аас надад хариу ирүүлсэн. Хариуд, шинжилгээд ирүүлсэн бичлэг нь эх хувь биш учраас дуу авианы адилтгал хийх боломжгүй гэж үзэж ирүүлсэн материалуудыг буцаасан. Интернэтэд тавигдсан 60 тэрбумтай холбоотой бичлэг нь дуу авианы бичлэгийг дуу, дүрс болгон эвлүүлсэн гэсэн дүгнэлт гаргасан. Мөн УИХ-ын гишүүн асан Ц.Оюунгэрэл АНУ-д хандаж, хөндлөнгийн шинжээч томилуулж хийлгэсэн шинжилгээгээр гурван хүний яриа гэсэн дүгнэлт гарсан бол гэрч нь таван хүн байсан гэж мэдээлсэн. 1400 төрийн албан хаагчаас гэрчийн мэдүүлэг авахад авлига өгсөн гэж хэн ч хүн хэлээгүй. Төрийн албыг үнэлж, хахууль авах, сонгуулийн мөнгө босгох яриа нь бодит амьдрал дээр хэрэгжээгүй болох нь тогтоогдсон тул тус хэргийг хаасан гэсэн хариуг АТГ-аас өглөө.
Өөр улс оронд ийм баримттай, мэдээлэлтэй, олон нийтийн анхаарлын төвд байгаа хэргийг ийм янзаар хаасан бол тухайн улсын иргэд нэг цаг ч тэсэхгүй тэмцэх байсан байх. Хэрвээ энэ хэргийг хаасныг хүлээн зөвшөөрвөл цаашлаад “Эрдэнэт”-ийн 49 хувийн асуудал, “Эрдэнэт” үйлдвэрийн 51 хувийг барьцаалж Стандарт банкнаас зээл авсан хэрэг, Самуурай, Чингис бондын эргэн төлөлт гээд дуулиант хэрэг ийм байдлаар замхарна. Монголчууд бид одоо, эс бол хэзээ ч үгүй гэсэн сонголтын өмнө байна. Нам гэдэг явцуу үзэл баримтлалаа хойш тавиад улс гэдэг язгуур үнэт зүйлээ хамгаалж авлигын эсрэг бүх нийтээрээ тэмцэхгүй бол шударга ёсыг тогтоох хууль хяналтын байгууллага, АТГ өөрсдөө албан тушаал, авлигын өмнө хүчин мөхөстөж байна.
Нэгд, Нээлттэй сонсголын хуулийн дагуу 60 тэрбумын асуудалд холбогдсон нэр бүхий гурван хүн, гэрч, хууль хяналтын байгууллага, шинжээчид олон нийтийн өмнө нээлттэй сонсгол хийх ёстой. Нийт УИХ-ын гишүүдэд уриалж байна. Хоёрт, хэн нэгэн хүн албан тушаалд очихдоо мөнгө өгсөн нь нотлогдвол прокуророос энэ хэргийг дахин шалгах боломжтой. Тиймээс иргэд иргэний зориг гаргаж энэ талаарх мэдээллийг 93106060 гэсэн утсаар өгөөрэй.
Ийм асуудалд нэр холбогдсон УИХ-ын дарга М.Энхболд огцрох ёстой. Ийм хэрэгт оролцсон хүн хууль хяналтын байгууллагад нөлөөлж ийм дүгнэлт гаргуулчихаад УИХ-ыг удирдана гэдэг ёс зүйн хувьд боломжгүй. Энэ хэрэг эцэслэн шийдвэрлэгдтэл М.Энхболд дарга үүрэгт ажлаасаа сайн дураараа түдгэлзэх шаардлагыг бичгээр хүргүүлнэ. Шат дараалсан арга хэмжээг авах болно” гэлээ.
