Нийслэлийн Баянзүрх дүүргийн 79 дүгээр сургуулийн хөлбөмбөгийн талбай дээр 11 настай хүү тоглож байгаад амиа алдсан харамсалтай хэрэг гарсан билээ.
Тэгвэл энэ золгүй, бас хариуцлагагүй асуудалд Нийслэлийн Боловсролын газрын даргын баталсан удирдамжийн дагуу 2018 оны 06 дугаар сарын 19, 20-ний өдрүүдэд тус сургууль дээр ажлын хэсэг ажиллав.
Ажлын хэсгийн дүгнэлтээр Баянзүрх дүүргийн 79 дүгээр сургуулийн захирал Ш.Болор-Эрдэнэ нь хууль тогтоомж, хөдөлмөрийн гэрээнд заасан үүргээ биелүүлээгүй, ажлын хариуцлага алдаж, сургуулийн орчны аюулгүй байдлыг хангах нөхцлийг бүрдүүлээгүй ноцтой зөрчил гаргасан нь тогтоогдсон.
Дүгнэлтийг үндэслэн нийслэлийн Засаг даргын 2018 оны 06 дугаар сарын 21-ний өдрийн Б/117 дугаар захирамжаар Баянзүрх дүүргийн 79 дүгээр сургуулийн захирал Ш.Болор-Эрдэнэд сахилгын арга хэмжээ авч, ажлаас нь чөлөөлжээ.
Сургуулийн захирлын хувьд бас нэг ёсзүйгүй алдаа гаргасан нь “Миний санахаар тэр хүүхэд эрсдэлт бүлгийн хүүхэд байсан. Ээж нь багаас нь хаяад явчихсан. Аав нь архины хамааралтай хүн байдаг. Эмээтэйгээ амьдардаг” гэж ярьсан нь түүнийг ажлаасаа халагдах нэг үндэслэл болсон байх.
Гэхдээ энэ удаад ганц захирлаар туг тахиад өнгөрөхдөө гол биш, сургууль, цэцэрлэгийн хүүхдүүдийн тоглох тоглоомын талбай аюулгүй байхыг, мөн хүүхдүүдийнхээ ирээдүйн төлөө эрсдэлгүй зөв бодлого тодорхойлж гаргахыг бодлого боловсруулагчдаас хүсмээр байна.
