-НЭЭЛТТЭЙ СОНСГОЛ ХИЙХ АСУУДАЛ ДЭМЖЛЭГ АВСАНГҮЙ-
УИХ дахь МАН-ын бүлэг УИХ-ын чуулганы өчигдрийн үдээс хойшхи хуралдаанаар хэлэлцэх бүх асуудлаар нэг өдрийн завсарлага авч, гэнэт шуурхай хурал зарлав. Тус бүлгийн хуралдаан 17:30 цагийн үед эхэлж, шөнө дөл болтол хаалттай үргэлжилсэн юм. Тус хуралдаанаар 60 тэрбумын асуудлаар нээлттэй сонсгол хийх Л.Оюун-Эрдэнэ гишүүний хүсэлтийг ихэвчлэн хэлэлцсэн байна.
Энэ үеэр УИХ-ын дарга М.Энхболд, Ерөнхий сайд У.Хүрэлсүх нар тодорхой байр суурь илэрхийлээгүй байна. Гэхдээ УИХ-ын дарга М.Энхболдын хувьд 60 тэрбумтай холбогдох материалыг хуурамчаар үйлдсэнээ шүүхэд хүлээн зөвшөөрсөн хүний баримтыг үзүүлэх боломжтой гэж дуугарсан бололтой.
Хуралдааны үеэр Д.Оюунхорол гишүүн “Намын нэрийг 60 тэрбумын гэх асуудлыг хөөсөргөх замаар зориуд шавартай нь хутгаж байна. Шинэ засаг гарснаас хойш бидний хагарал гайгүй байсан ч та нар өөрсдөө л асуудлыг эхлүүлсэн. Одоо энэ байдлаа намын дарга засах хэрэгтэй” гэх байдлаар нэлээд хурц байр суурь илэрхийлжээ.
Мөнхүү Л.Оюун-Эрдэнэ, А.Сүхбат нарын гишүүд “АН-ынхан эв нэгдэлтэй байж Д.Муратыг аваад үлдэж байхад манай намынхан Д.Гантулгыг хүчээр явуулж буруудсан” гэх үгийг эмэгтэй гишүүдэд хандан хэлсэн байна. Улмаар хэрүүл ширүүсч, “А.Сүхбат гишүүн өөрийнхөө хүүхэн шуухны асуудлыг цэгцэлчихээд ийм асуудлаар залуусыг хамгаалаарай” гэхчилэн маргалдсан байна.
УИХ-ын дарга нээлттэй сонсгол хийх Л.Оюун-Эрдэнэ гишүүний хүсэлтийг Хууль зүйн байнгын хороонд хүргүүлж, тэндээс бичгээр хариу өгүүлэх гаргалгаа байгааг ярьжээ. УИХ-ын Хууль зүйн байнгын хорооны дарга Ш.Раднаасэд “Өмнөх жишгүүдийг харж байгаад, нээлттэй сонсгол хийх боломжгүй гэдгийг бичгээр өгчихөж болно” гэх байдлаар асуудалд хандсан гэх мэдээлэл байна.
-“З.НАРАНТУЯА ГИШҮҮНИЙ ГОРИМЫН САНАЛЫГ ХҮЛЭЭЖ АВЧ БОЛОХГҮЙ”-
Тавантолгой төслийн тухайд стратегийн чухал ордуудыг нэгтгэдэг “Эрдэнэс Монгол” компанийн 49 хувийг хувьд шилжүүлэх З.Нарантуяа гишүүний саналыг дэмжих боломжгүй талаар яригдсан байна. Энэ талаар Хууль зүй, дотоод хэргийн сайд Ц.Нямдорж “Д.Сумъяабазар аа, тэр саналыг яасан ч дэмжиж болохгүй. Чиний бөх чинь тэндээ л юм байгаа биз. Би хатуу хэлчихье” гэхчилэн ярьжээ.
Эх сурвалжуудын мэдээлж буйгаар, З.Нарантуяа гишүүний гаргасан горимын саналыг 34 хувь болтол нь бууруулах замаар АН-тай тохирсон байна. Гэвч энэ хувийг Засгийн газрын зарим гишүүд, эрх баригч намын нэр бүхий гишүүд дэмжихгүй байгаа нь анхаарал татаж буй юм. Д.Сумъяабазар сайдын хувьд УИХ-ын хаврын чуулганаар Тавантолгойн төслийг баталснаар олон улсын зах зээл рүү гаргах ажлыг яаравчлах боломжтой гэж үзэж буй.
Тиймээс ч Ерөнхийлөгчийн болон сөрөг хүчний саналд тодорхой хэмжээгээр буулт хийж, ажлаа явуулахыг зорьсон бололтой. Хэрэв чуулган дээр З.Нарантуяа гишүүний санал унавал АН-ын бүлэг дахин завсарлага авчих эрсдэл бий. Тэгвэл асуудал намрын чуулган руу орчих билээ. Түүнчлэн Ерөнхийлөгчөөс хаврын чуулганыг сунган хуралдуулах тухай бичгийг өчигдөр ажлын цаг дууссан хойно УИХ-д хүргүүлсэн гэх мэдээлэл ч байна.
Эрх баригч намын бүлэг ингэж нээлттэй сонсгол хийх болон Тавантолгойн асуудлаар хуралдсан ч яг эцсийн шийдэлд хүрэлгүй, нэгнээ баахан хэмлээд таржээ. Тэд өнөөдөр чухам ямар тохироо хийж, хаврын чуулганыг хэрхэн өндөрлүүлэх бол гэсэн хүлээлт үүсэв.
Ж.МЯДАГБАДАМ
Эх сурвалж: medee.mn
