Ам.долларын зээлийг төгрөгт шилжүүлэх шаардлага тавив

\”218.1 хөдөлгөөн” гэдэг нь Иргэний хуулийн 218.1-дэх хэсэгт заасан \”Төлбөр гүйцэтгэх хугацаа болохоос өмнө мөнгөний ханш өссөн, буурсан бол үүрэг үүсэх үеийн ханшаар тооцож төлбөрийг төлнө” гэсэн заалттай холбоотой юм байна. Өөрөөр хэлбэл энэ заалтыг хэрэгжүүлэхгүй байгаагаас үүдэн доллараар зээл авсан иргэн, аж ахуйн нэгжүүд маш их хохирч байна гэж үзжээ. Энэ заалтыг тайлбарлавал \”Иргэнд зээл олгохыг банкнаас зөвшөөрч, зээл нь иргэний дансанд шилжсэн тэр өдрөөс хойш зээл төлж дуустал мөнгөний ханш өссөн, буурсан ч тухайн зээл олгосон өдрөөр ханшийг тооцно\” гэсэн агуулгатай юм.

Иргэн Т.Баярхүү \”Ам.долларын ханш одоогоос хэдэн жилийн өмнө 1400 орчим төгрөг байсан. Гэтэл тэр үед 20 мянган доллар буюу 28 сая төгрөг зээлж авсан хүн өнөөдрийг хүртэл зээлээ тасралтгүй төлж байгаа ч эргээд 40 гаруй сая төгрөгийн өртэй үлдэж байна. Энэ бол долларын ханшны өсөлтөөс бүрэн шалтгаалж байгаа юм. Яагаад гэвэл ам.доллар 2040 төгрөгт хүрсэн бөгөөд үүгээр нь тооцож байгаа хэрэг. Гэтэл Иргэний хуулиндаа ийм сайн заалттай байж хэрэгжүүлж чадахгүй байна” гэсэн юм. Иймээс тус хөдөлгөөн дээрх заалтыг хэрэгжүүлэх, ам.долларын зээлийг төгрөгт шилжүүлэх зэрэг шаардлага гаргаж, Монгол Улсын Ерөнхийлөгч, УИХ-ын дарга, Ерөнхий сайд нарт хүргүүлсэн байна.

Шаардлагад \”УИХ-ын харъяа бүтэц болох Монголбанк, Санхүүгийн зохицуулах хороо, Монголын банкуудын холбоо, МҮХАҮТ, МҮЭХ, Ажил олгогч эздийн нэгдсэн холбоод болон бусад хэрэгтэй төлөөллүүдээс оролцуулсан ажлын хэсгийг УИХ дотроос зохион байгуулж, ам.долларын зээлүүдийг Иргэний хуулийн 218.1 заалтын дагуу төгрөгийн зээлд шилжүүлэх асуудлыг шийдэх, Монголбанк, Монголын банкуудын холбоотой хамтран банк бүрээр олгогдсон ам.долларын зээлийн олгогдсон үеийн төгрөгийн ханшаар тооцсон дундаж шилжүүлэх итгэлцүүр ханшийг тодруулж баталгаажуулах, Ажлын хэсгийн судалж, баталгаажуулсан ханшийн дагуу арилжааны банкуудын ам.долларын зээлийг төгрөгт шилжүүлж гэрээнүүдийг шинэчлэх, Хэрэгжих шатанд банк бусад сонирхогч этгээдүүдээс янз бүрийн санхүүгийн заль булхай оруулахгүй байхыг хянаж хэрэгжүүлэх, 2015 онд батлагдсан Онцгой албан татварын тухай хуулийн нэмэлт өөрчлөлтөөр тогтоосон нэгж ам доллар 1470 төгрөг гэсэн ханшаас ямар ч тохиолдолд ихэсгэхгүй байх, Ажлын хэсгийн явуулах үйл ажиллагааг биечлэн хянаж, долоо хоног бүр ард түмэндээ мэдээлж байх” тухай дурджээ.