Монгол Туркийн хамтарсан сургуулийн захирал Вейсэл Акчайг Туркийн тусгай албаныхан хулгайлахыг завдсан. Туркийн СТ 4010 дугаартай онгоц Чингис нисэх буудлаас өчигдөр орой 21 цагийн үед буцаж хөөрсөн юм. Харин бусдад хулгайлагдсан гэх Вейсэл Акчай хохирогч болж Эрүүгийн цагдаагийн газарт байцаагдахаар үлдсэн .
Монгол Турк сургуулийн ерөнхий захирал, БНТУ-ын иргэн Вейсэл Акчайг шөнийн 01:40 цагт шүүх эмнэлгээс гаргажээ. Тэрбээр “Би зүгээр ээ. Хэргийг шалгаж байна. Намайг хамгаалж өмгөөлсөн та нартаа баярлалаа. Намайг ямар хүмүүс авч явсныг мэдэхгүй, хэргийг шалгаж байгаа” гэснээр Эрүүгийн цагдаагийн албаныхан түүнийг гэрт нь хүргэж өгөхөөр авч явжээ.
Тэрээр ийнхүү чөлөөтэй болсныхоо дараа болсон явдлын талаар дурдаж, монголчуудад баярласнаа илэрхийлсэн бичлэгээ цахим сүлжээнд тавьжээ.
Уг бичлэгт “Би “Элит” сургуулийн засварын ажлыг шалгах ёстой байсан тул 10:00 цагийн орчимд гэрээсээ гарсан. Гараад иртэл гэрийн үүдэнд үл таних хүмүүс машинаас буугаад, над руу чиглээд ирсэн.
Сайн зүйл болохгүй нь гэдгийг ойлгоод буцаж зугтахыг оролдсон боловч хоёр гараас минь барьж сугадаад машинд хүчээр суулгасан. Ингээд бараг есөн цаг уул хадаар явж байгаа юм шиг донсолгоотой замаар зөндөө авч явсан. Энэ хооронд Ерөнхийлөгч, Ерөнхий сайдаас эхлээд хууль хяналтын байгууллагууд маш их ажилласан байна.
Та бүхэнд маш их баярлалаа. Үүний зэрэгцээ хэвлэл мэдээллийн байгууллагууд, зурагчид, манай төгсөгчид, эцэг, эхчүүд бүгдээрээ сэтгэл тавьж, орой болтол хөөцөлдөж ажилласан байна. Өнгөрсөн 24 жилийн турш Монгол Улсын боловсролын салбарт юуны төлөө ажилласнаа илүү сайн ойлголоо. Цаашид миний уух ус, идэх талх, хийх ажил минь энд байна. Монгол ахан дүүстээ маш их баярлалаа” хэмээн хэлжээ.
Her zamanki sukuneti ve naifligi ile.. Veysel Akçay abi..
Teşekkürler Moğolistan❤..Rabb’im tum kardeslerimizi zalimin şettinden korusun.. pic.twitter.com/GObg3azfLl
— Abdullah Sinan (@ciftler76) July 27, 2018
