“Эрдэнэс тавантолгой ХК байгуулагдаад өдгөө 8 жилийн хугацаа өнгөрчээ. 2018 оны эхний хагас жилд 953 тэрбум төгрөгийн борлуулалтын орлоготой ажилласан байна. 2018 оны нийт хугацаанд 285.4 тэрбум төгрөгийг улсын төсөвт төвлөрүүлэх үүрэг хүлээсэн бол 2018 оны хагас жилийн байдлаар 216.5 тэрбум төгрөгийг улсын төсөвт төвлөрүүлжээ. Компани хагас жилийн байдлаар 373 тэрбум төгрөгийн цэвэр ашигтай ажилласан. Жилийн гүйцэтгэлээр 337 тэрбум төгрөг бүрдүүлэх ёстой байтал үүнийгээ хагас жилдээ бүрдүүлж, 110 хувийн гүйцэтгэлтэй ажиллаж байна. Ингэснээр улсад өгөх өгөөж жил ирэх тусам нэмэгдэж байгаа юм байна. Энэ нь нэмэгдэх тусам өөрсдийн шууд хамаарал бүхий төслүүдээ санхүүжүүлэх чадавхитай болж байна гэсэн үг. Дээрээс нь 1072 хувьцааг амилуулах эдийн засгийн суурь нөхцөлийг бүрдүүлж чадсан байна. Эдгээрийг хэрэгжүүлснээр компанийн үйл ажиллагаа дэлхийн хэмжээнд санхүүгийн чадавхитай болох нь харагдаж байгаа аж.
Энэ бүх орлого, ашиг зөвхөн нүүрсний үнэ дээр тогтож байгаа юм. Үний хоёр төрлийн аргачлалтай. Чалко трейдинг компанитай гэрээтэй ажилладаг. 2018 он гарснаас хойш хоёр ч удаа үнийг өсгөсөн байна. 59.33 байсныг 60.33, улмаар 61 ам.доллар болгосон. Хоёр дахь нь Баруун цанхийн болон бусад нүүрсийг нээлттэй сонгон шалгарлуулалтаар явуулдаг байна. 2018 онд 68 байсан нээлттэй сонгон шалгаруулалтаар 70-аас дээш долларын үнэ тогтоож чаджээ.
Үйлдвэрлэл, борлуулалтын бодлогын тухайд, 2018 онд 4.9 сая тонн нүүрс олборлох даалгавараа 5.1 буюу 51 хувиар давуулан биелүүлсэн байна. Экспортод 6.8 сая тонн нүүрс гаргаж 64 хувиар биелүүлжээ. 2014 оноос хойш тасалдаад байсан нөөцийн болон ашиглалтын хайгуулыг энэ жил нөөцийн хайгуулыг 50 мянган тууш метрт, ашиглалтын хайгуулыг 13 мянган тууш метрт гүйцэтгээд 27 мянган дээж авч, 12555 дээжийн хариуг гаргажээ. Ингэснээр нүүрсний нөөц 270 орчим буюу түүнээс дээш хэмжээгээр өссөн байна. Энэ нь баталгаажвал компанийн үнэлгээнд нөлөөлөх аж. Мөн баталгаажуулсан үнэлгээнд ч нөлөөлөх боломжтой болж байгаа юм байна.
Эрдэнэс тавантолгой ХК-ийн гүйцэтгэх захирал Б.Ганхуяг мэдээлэл хийх үеэр “Бид дотоодын болон гадаадын банк санхүүгийн байгууллага, хуулийн байгууллага, хөрөнгийн биржүүдтэй хамтран ажиллах ажлаа эхлүүлсэн. Хувьцаа мэдээллийн төв байгуулагдсан өдрөөсөө хойш 15 мянга орчим иргэнд зөвлөгөө мэдээлэл өгчээ. Харамсалтай нь 393 хүнд хувьцаан ногдол ашгаа авах эрхийг нь нээж өгсөн байгаа юм. Тэгэхээр маш хариуцлагагүй байна гэсэн үг. 2-3 минутанд ногдол ашиг авах эрхээ нээлгэх нь иргэдийн өөрсдийн хариуцлагын асуудал. Иргэд бас мэдээлэл муутай байна. 1072 хувьцаа амилах боломж нь үүсчихлээ. Санхүүгийн суурь үүсчихлээ. Тэгэхээр одоо 2511000 иргэн хувьцаа эзэмшдэг. Үүний 623 мянга нь эрхээ нээлгэсэн байгаа юм. Бусад нь эрхээ нээлгэж байж энэ хувьцаа амь орж, урагш хөдлөх эрх нь үүсдэг юм. Тиймээс иргэд өөрсдийн санаачлагаараа ирж хувьцааны эрхээ нээлгэх боломжтой шүү. Ер нь компани цахим засаглалд тулгуурласан ил тод, нээлттэй, түргэн шуурхай, хүнд сурталгүй, шилэн данс, санхүүжилтийн ил тод байдлыг нэг номерт тавьсан, эко уурхай болох зорилтыг дэвшүүлэн ажиллаж байна.” хэмээн ярилаа.
Тэгэхээр 1072 хувьцаа амилуулах эдийн засгийн эдийн засгийн суурь нөхцөл нь бүрдсэн гэж байгаа боловч урагш хөдлөх эрх нь хувьцааг нь эзэмшиж байгаа ард иргэдээс шууд хамааралтай гэдгийг сануулжээ. Өөрөөр хэлбэл, эрхээ нээлгээгүй үлдэж байгаа 1 сая 888 мянган иргэнд энэ асуудал шууд хамааралтай болж таарав. Мэдээж эрхээ нээлгэх эсэх нь тухайн иргэний эрхийн асуудал. Хамгийн гол нь иргэдийн дийлэнх нь санхүү, эдийн засгийн ойлголт дутмаг байдгаас хувьцаа эзэмших нь ашигтай юу, үгүй юу, ашигтай юм бол хэрхэн яаж ашиг хүртэх вэ гэдгээ төдийлөн сайн мэддэггүй. Тэгэхээр Тавантолгойг урагш хөдөлгөх эсэх нь ийм л зүйлээс шалтгаалж байгаа дүр зураг гарч ирж байна.
