Польш Улсад сурч, ажиллаж, амьдарч ирсэн Жаргалсайханы Мишээл нь анх өөрийгөө кино од болно чинээ огт төсөөлөөгүй биз ээ. Учир нь тэр гуравхан настайдаа Польшийг зорисон гэдэг. Харин тэрээр өнөөдөр бол Польшийн кино урлагт хэдийнэ өндөр байр суурийг эзэлж, өөр бусад үйл хэргээрээ ч олны хайр хүндэтгэлийг хүлээсэн алдартан болж чаджээ. Ингээд түүний амьдралын гайхалтай хуудсуудыг хамтдаа сөхөн хуваалцъя.
-Юуны өмнө өөрийгөө уншигчдад товчхон танилцуулъя. Мөн Польш улсыг зорих болсон анхны шалтгаан нь юу байсан юм бол оо?
-Намайг Ж.Мишээл гэдэг. Би Польш Улсад 1991 онд очиж байлаа. Тэр үед би 3 настай байсан юм. Миний ээж Х.Эрдэнэцэцэг эмч хүн. Тэгээд эмч нарын солилцоогоор ээж минь гэрээ байгуулан анх Польш руу явсан юм. Би нэг эрэгтэй дүүтэй. Ингээд аав, ээж, дүү бид хоёрыг аваад Польшийг зорисон. Гурван жилийн хугацаанд аав, ээж маань маш амжилттай сайн ажилласан гээд хугацааг сунгахаар болсон. Түүнээс хойш 27 жил болж байна. Гэхдээ хамгийн гол нь зун болгон гэр бүлээрээ Монголдоо ирдэг байсан. Дүү бид хоёрыг Монголтойгоо, гэр бүлийнхэнтэйгээ ойр байлгах гэж хичээдэг байсанд нь би их баярладаг юм.
-Уран бүтээлийн гарааг хэзээ яаж эхлүүлсэн бэ. Анхны бүтээлийнхээ талаар ярьж өгөөч. Ямар дүр нь Мишээлийг олонд ойрхон таниулж өгсөн юм бол?
-Намайг есөн настай байхад бид дөрөв Польшийн Хойнийцай гээд нэгэн жижигхэн хотод амьдардаг байлаа. Тухайн үед крисмас болж байсан болохоор бид гэр бүлээрээ Варшав руу аав, ээжийн найзынд очихоор явсан юм. Тэгсэн тэр үед ээжийн найз нь Варшавт шалгаруулалт явагдаж байна, Мишээлийг оруулах уу гэсэн юм байна. 7-10 насны хүүхдүүдийн дунд болно гэсэн болохоор ээж надаас асуусан. Би юу болохыг нь мэдэхгүй болохоор яасан ч яахав гээд нэг богинохон шүлэг цээжлээд явсан юм. Тэгээд долоон үе шатаар шалгаруулалт явуулж, Польшоос гадна өөр орны нийт 2500 гаруй хүүхдүүдээс таван хүүхэд сонгосны нэг нь би юм. Манай кинонд таван хүүхэд гол дүрд тоглож байсан. Анх гадаад хүүхэд авна гэж төлөвлөөгүй байсан ч өөрчлөгдсөн юм билээ. Ингээд би “Үрчлэгч гэр бүл” гэсэн үтга бүхий нэртэй олон ангит кинонд гол дүрүүдийн нэгд тоглохоор болж, гараагаа тавьсан юм. Энэ кино нь бүх насныханд зориулагдсан, бас хөгжилтэй, ямар нэг хэмжээгээр ухаарал хайрласан, гол нь их сургамжтай олон ангит бүтээл байсан болохоор польшуудад маш их таалагдсан. Бид киногоороо маш их зүйлийг заасан гэж боддог.
Нийт бид 13 жилд 400 орчим ангийг хийсэн байгаа юм. Миний хувьд 10 жилд нь 300 гаруй ангид тоглосон байгаа. Би дээд сургуульд орохоор болсон учраас киногоо бүрэн дуусгаагүй.
-Ийм олон ангитай кино гэхээр ямар жанрын ямар утгатай бүтээл юм бол?
-Манай кино бол гэр бүлийн бүх гишүүдэд зориулсан инээдмийн кино. Хоёр хүүхэдтэй, нэг том нохойтой Польш гэр бүл. Гэтэл бага хүүхэд нь сургуулийнхаа нэг хүүхэдтэй дотно найзалдаг. Тэр найз нь асрамжийн газрын хүүхэд. Тэр хүүхдийг нөгөө гэр бүл өргөж авсан чинь түүнд сайн гэх хоёр охин байдаг. Түүний нэг нь би буюу Зоша. Биднийг ихэр гэдэг. Гэтэл Зоша Ази, нөгөө охин маань болох Элиса хар арьстан. Тэд багаасаа асрахад хамт өссөн. Ижил хувцас өмсөж, адилхан үсээ самнаж, ихэр гэж нэрлэсээр байгаад ихэр гэгддэг болчихсон хоёр юм. Сүүлдээ тэр гэр бүл нэг хүүхэд өргөж авах байсан бол гурван хүүхэд аваад таван хүүхэдтэй, нэг том нохойтой гэр бүл болдог. Энэ л гэр бүлийн амьдралын тухай өгүүлдэг кино юм.
Зошаг ах нь олоод Канадад сургахаар авч явсан. Үнэндээ бол Ж.Мишээл Варшавт Анагаахын чиглэлээр сурч байгаа
-Манайд өмнө нь польш, чехословакын гээд олон ангит хүүхдийн кинонууд их гардаг байлаа л даа. Харин одоо бол ихэвчлэн солонгос олон ангит кино хэтэрхий их гардаг болсон. Польшийн олон ангит тэр сургамжтай, хөгжилтэй киног авчирж монголчууддаа үзүүлэх боломж бий юу?
-Өмнө нь ийм санаа байсан боловч жоохон үнэ нь өндөр байсан. Гэхдээ бас би Монголд л ирэхээрээ өөрийнхөөрөө байж чаддаг болохоор жоохон байхдаа Монголд гаргах хэрэггүй гэж аав ээждээ хэлдэг байсан. Тэгээд нэг хэсэг энэ тухай ярихаа больсон юм. Харин одоо бол энэ санааг хэрэгжүүлье гэж бодож байгаа.
-Дээд сургуульд ороод киногоо дуусгаагүй гэсэн. Ямар мэргэжлээр сурсан бэ?
-Анагаахын мэргэжлээр сурч байгаа. Миний ээж үлгэр жишээ эмч хүн. Би ээж шигээ тийм мундаг эмч болъё гэж дандаа боддог байсан учраас энэ мэргэжлээр суралцаж байгаа. Би оюутан болж киноноосоо түр гарахаар болсон учраас зохиолд өөрчлөлт оруулах болсон. Сонирхуулаад ярихад, миний дүр Зошаг төрсөн ах нь олж ирээд Канад руу сургуульд сургахаар аваад явсан гэж зохиолоо бичсэн. Миний ахад тоглосон хүн бас монгол залуу байгаа. Яг үнэндээ бол Ж.Мишээл Варшав хотод очоод Анагаахын чиглэлээр сурч байгаа юм. /сурв: инээв./ Зошагийн анхны дүр нь бол вьетнам охин гэж байсан юм. Сүүлдээ найруулагч, продюсер нь монгол охин болгоё гэж өөрчилсөн. Зоша бол вьетнам биш монгол охин байсан болж байгаа юм. Үүнд нь би маш их баярладаг. Би багаасаа ярилцлага болгондоо Монголоос ирсэн Польшийн жүжигчин гэсэн тодотголтой болсон. Монгол жүжигчин л гэхээр Жаргалсайханы Мишээл гэж мэддэг. Тэгээд ч би ярилцлага бүхэндээ эх орноо хүмүүст танилцуулахыг хичээдэг.
-Өөр ямар кинонд тоглосон бэ?
-Бас нэг олон ангит кинонд тоглосон. “Friday weather” гэдэг энэ кино инээдмийн биш, арай серёзный төрлийн кино. Үүнд би вьетнам охины дүрд тоглосон. Утга санаа нь арьс өнгөний үзлийн асуудлыг хөндсөн бүтээл. Вьетнам охин Ким Польш сургуульд ороод найз залуутай болсон чинь танхай найзууд нь Кимийг гадуурхаад хорлож байгаа үйл явдлууд гардаг. Бас ресторануудын эздийн өрсөлдөөний тухай инээдмийн кино байна.
-Яриаг нь тасласанд уучлаарай. Бүгдийг нь дурьдвал нэлээд хугацаа орох бололтой. Монголдоо кинонд тоглоё гэж боддог уу?
-Энэ бол миний урьд нь хийж үзээгүй шинэ зүйл болохоор өөрийгөө сорьж үзье гэж бодож байна. Монголд киног өндөр түвшинд хийдэг болсон байгаа. Сэдвийн хувьд ч үнэхээр гоё зохиолууд бичсэн байдаг юм байна лээ. Надад нэг продюсер эгч санал тавьсан юм. Энэ талаар одоо ярилцаж байгаа. Ойрын хугацаанд биелүүлэх төлөвлөгөөнд багтсан байгаа.
-Польшийн “Ододтой бүжиглэе” шоунд оролцсон байна билээ. Ямар амжилт үзүүлэв. Мөн өөр реалити шоунуудад хэр их ордог вэ?
-Ер нь улс орнуудад янз бүрийн том том телевизийн шоу хийдэг. Польшийн шоу ч гэсэн маш их үзэгчтэй. Гурван жилийн өмнө би Celebrity Splash гэдэг шоунд уригдаж оролцсон. Энэ нь трамполинаас ус руу үсэрдэг шоу нэвтрүүлэг. Нэг ёсондоо оддыг өндрөөс үсрэлтэд сургаж өрсөлдүүлнэ гэсэн үг. Үүнд 24 хүн оролцсоны дунд олимпийн аварга, өөр бусад олон төрлийн спортын аваргууд хүртэл оролцож байсан. Мэдээж алдартай сэтгүүлчид, урлагийнхан оролцсон. Би анх орохдоо бараг сэлж чаддаггүй хүн орсон. Тэгээд би эндээс маш их зүйлийг сурч авсан. Мессеж санал хураалтаар дүн гаргадаг. Финалын шатанд параолимпийн аварга тэргүүлж, би удаалсан. Энэ нэвтрүүлгийн шүүгчид миний үсрэлтийг “хараацай” гэж онцолж нэрлэх болсон. Миний хувьд эмэгтэйчүүд дундаа хамгийн өндрөөс буюу 10 метрийн өндрөөс үсэрч олон санал авч чадсан байх гэж боддог юм. Мөн дараа нь өнгөрсөн жил би “Ододтой бүжиглэе” шоунд оролцоод гуравдугаар байрт орсон. Би эндээс бүжгийн гайхамшгийг мэдэрч чадсан. Ер нь оролцсон шоу тэмцээн бүрээсээ би маш их зүйлийг сурч, мэдэж, таашаал авч чадсан.
Үргэлжлэлийг ЭНДЭЭС…
