Насанд хүрээгүй болон бага насны хүүхдүүд сураггүй алга болсоор байна. Энэ нь эцэг эх, асран хамгаалагчийн хараа хяналт сул байгаатай холбоотой хэмээн албаныхан тайлбарладаг. Үүнтэй холбоотой сэрэмжлүүлэг мэдээллийг холбогдох байгууллагаас болон хэвлэл мэдээллийн хэрэгслүүдээр хангалттай хүргэж байгаа ч ард иргэдийн хайхрамжгүй байдлаас болж хүүхэд амь насаа алдах хүртэл эрсдэлүүд тасралтгүй гарсаар байна.
Сэлэнгэ аймгийн Шаамар сумын Дэлгэрхаан багийн “Ундрагч үр тариа бригад”-ын урд талд энэ сарын 12-ны өдрийн 22:00 цагт 2 хүүхэд нарсан ойд төөрсөн байна. Хүүхдүүд алга болсон тухай дуудлагыг 13-ны 03:30 цагт хүлээн авч тус аймгийн Онцгой байдлын газрын Эрэн хайх, аврах ангийн алба хаагчид, аймгийн Цагдаагийн газрын алба хаагчид, ар гэрийнхний хамт нийт 12 хүн Сүхбаатар сумын харьяат 17 настай Б /эрэгтэй/, 15 настай охин М нарыг “Ундрагч үр тариа бригад”-аас 4 км-ийн тойрогт эрэн хайх ажиллагааг зохион байгуулж байна.
Хөвсгөл аймгийн Рэнчинлхүмбэ сумын Далайн зах багийн “Товог-Уул” гэдэг газар тус сумын харьяат иргэн Б-гийн 13 настай охин М энэ сарын 7-ны өглөө 08:00 цагийн орчим мал хариулж яваад сураггүй болсон. Түүнийг сураггүй болсон талаар 8-ны өдрийн 11:27 цагт мэдэгдсэний дагуу тус аймгийн Онцгой байдлын газрын Эрэн хайх, аврах салбарын алба хаагчид, аймгийн Цагдаагийн газрын алба хаагчид, орон нутгийнхан болон ар гэрийнхний хамт нийт 61 хүн энэ сарын 12-ны өдөр эрэн хайсан боловч үр дүнд хүрээгүй байна. Эрлийг ”Хулстайн нуур”, “Түрүүний нуур”, “Түрүүн шугуй” гэдэг газруудаар 90 км-ийн тойрогт зохион байгуулсан бөгөөд мөн өдрийн 21:30 цагт түр зогсоон, 13-ны өглөө 09:00 цагт эрэн хайх ажиллагааг дахин эхлүүлсэн байна.
Завхан аймгийн Отгон сумын Соёл багийн “Хэцийн давааны-Ам” гэдэг газар тус сумын харьяат 2 настай охин А Буянт голын усанд живсэн байж болзошгүй тухай дуудлагыг энэ сарын 10-ны өдрийн 11:50 цагт өгчээ. Дуудлагын дагуу тус аймгийн Онцгой байдлын газрын болон Цагдаагийн газрын алба хаагчид, сумын нутгийн захиргааны байгууллагын 33 хүн, ар гэрийн 33 хүн, нийт 74 хүн 12-ны өдөр “Хэцийн давааны-Ам”-аас “Бор хавцал” хүртэл 32 км урсаж, 8 удаа шумбалт хийж, мөн өдөр нэмэлтээр Говь-Алтай аймгийн Онцгой байдлын газрын алба хаагчид Говь-Алтай аймгийн Дэлгэр сумын Гуулин тосгоны “Толгойн барилга” гэдэг газраас Завхан голын ай сав газруудаар эрэн хайх ажиллагааг 30 км урсаж зохион байгуулж, үзэгдэх орчин хязгаарлагдсан тул 20:36 цагт түр зогсоосон аж. Улмаар 13-ны 08:00 цагт эрэн хайх ажиллагааг дахин эхлүүлсэн бөгөөд нэмэлтээр Завхан аймгийн Онцгой байдлын газрын алба хаагчид 20:30 цагт хөдөлсөн байна.
Хэнтий аймгийн Баянмөнх сумын Баянбулаг багийн “Баруун улаан-Эрэг” гэдэг газар тус сумын харьяат 17 настай иргэн С /эрэгтэй/ Хэрлэн голын усанд живжээ. Энэ талаар өнгөрсөн 11-ний өдрийн 17:45 цагт хүлээн мэдэгдсэн бөгөөд дуудлагын дагуу тус аймгийн Онцгой байдлын газрын алба хаагчид, орон нутгийн иргэд, ар гэрийнхний хамт нийт 63 хүн осолдсон газраас нь эрлийг эхлүүлсэн байна. Голын хоёр захаар 18 км завьтай самнаж, 2 удаа шумбалт хийж, усны мотоцикльтой усны мандалд эрлийн ажиллагааг явуулжээ. Мөн хуурай газраар мотоцикльтой иргэд 35 км-ийн тойрогт эрэн хайх ажиллагааг зохион байгуулж үзэгдэх орчин хязгаарлагдсан тул 20:50 цагт түр зогсоож, 13-ны өглөө 06:00 цагт эрэн хайх ажиллагааг дахин эхлүүллээ.
Хийлдэг завьтай явж байгаад нууранд осолджээ
Насанд хүрэгчид ч мөн гол усанд осолдсон тухай дуудлага тасрахгүй байна.
Архангай аймгийн Өгийнуур сумын Өгий багийн “Урд мэргэн шанаа” гэдэг газар Өгий нууранд Нийслэлийн Баянгол дүүргийн харьяат 34 настай А /эрэгтэй/, 31 настай Э /эмэгтэй/ нар хийлдэг завьтай явж байгаад живсэн байна. Энэ тухай дуудлага энэ сарын 11-ний 22:11 цагт ирж, тус аймгийн Онцгой байдлын газрын алба хаагчид 12-ны өдрийн 04:07 цагт очиж, мөн өдрийн 07:07 цагт иргэн А-гийн цогцсыг эргээс 200 метр, 6-7 метрийн гүнээс гаргаж Цагдаагийн байгууллагад шилжүүлэн өгчээ. Иргэн Э-г осолдсон газраас 20 метрийн тойрогт эрлийн ажиллагааг зохион байгуулж, үзэгдэх орчин хязгаарлагдсан тул 20:40 цагт түр зогсоогоод 13-ны 08:00 цагт эрэн хайх ажиллагааг дахин эхлүүлсэн байгаа юм. Нэмэлтээр тус аймгийн Онцгой байдлын газрын Гал түймэр унтраах, аврах 51 дүгээр ангийн 4 алба хаагч 21:40 цагт явсан байна.
Баян-Өлгий аймгийн Баяннуур сумын Баяннуур багийн “Аукей-Арал” гэдэг газар тус сумын харьяат 46 настай Ж /эрэгтэй/ өнгөрсөн зургадугаар сарын 14-ний өдрийн 13:00 цагийн орчим гэрээсээ гараад сураггүй алга болсон тухай мэдээлж байсан. Хэд хэдэн удаагийн эрлийн ажиллагаа үр дүнд хүрээгүй тул ар гэрийнхэнтэй нь зөвшилцөж зогсоогоод байсан юм. Харин ар гэрээс нь энэ сарын 10-ны 08:00 цагт эрлийг дахин эхлүүлэх тухай хүсэлтийг ирүүлжээ. Хүсэлтийн дагуу тус аймгийн Онцгой байдлын газрын Эрэн хайх, аврах бүлгийн алба хаагчид ар гэрийнхний хамт 8 хүн энэ сарын 12-ны 09:00 цагт Ховд голын “Аукей-Арал”-аас эрлийг дахин эхлүүлж, “Краз тохой” хүртэл 8 км урсаж, 3 удаа шумбалт хийсэн байна. Ингээд мөн өдрийн 17:55 цагт эрэн хайх ажиллагааг ар гэрийн гаргасан хүсэлтийг үндэслэн тус аймгийн Онцгой байдлын газрын даргын шийдвэрээр зогсоолоо.
Дорноговь аймгийн Айраг сумын Сайн-Ус багийн “Улаан толгой’’ гэдэг газар уруйн үерт 2 хүн урсаж осолджээ. Ослын тухай дуудлагыг энэ сарын 12-ны 14:28 цагт хүлээн авч тус аймгийн Онцгой байдлын газрын Эрэн хайх, аврах бүлгийн алба хаагчид 16:40 цагт очиж, Айраг сум дахь Гал түймэр унтраах, аврах 23 дугаар ангийн болон Цагдаагийн байгууллагын алба хаагчдын нийт 15 хүний бүрэлдэхүүнтэйгээр очиж ажилласан байна. Ажиллагаагаар Хэнтий аймгийн Хэрлэн сумын 8 дугаар багийн харьяат 37 настай Э /эмэгтэй/, 50 настай Н /эмэгтэй/ нарын цогцсыг голын уснаас гаргаж Цагдаагийн байгууллагад шилжүүлэн өгсөн байна.
