Иргэний Зориг Ногоон Нам (ИЗНН)-аас Сонгуулийн Ерөнхий хорооны шийдвэрийг эсэргүүцэж мэдээлэл хийлээ. Тус намыг сонгуулийн тайлан ирүүлээгүй үндэслэлээр УИХ-ын 42 дугаар тойргийн нөхөн сонгуульд оролцуулахгүй гэсэн шийдвэр гаргажээ. Үүнийг тус намынхан сонгох, сонгогдох эрхэд халдаж, Үндсэн хууль зөрчиж байна хэмээн үзэж байгаа аж.
Нэг талд давуу эрх олгож байгаа нь ИЗНН-ыг сонгох хүсэлтэй сонгогчдыг үл хүндэтгэж байгаа хэрэг гэдгийг энэ үеэр илэрхийлж, СЕХ энэ удаагийн сонгуулийг зөв удирдан зохион байгуулж чадахгүй, үр дүн нь шударга бус болно гэж хардаж байгаагаа ч хэлж байв.
Энэ талаар ИЗНН-ын дарга Ц.Ганхуяг хэлэхдээ “42 дугаар тойрогт нөхөн сонгууль явуулахаар шийдвэрлэснээс хойш тус тойрогт аливаа сурталчилгаа уралдаан тэмцээн зохион байгуулах нь хуулиар хориглогдсон атал МАН, АН хууль зөрчсөн үйл ажиллагаа явуулж байна.” гэсэн бол ИЗНН-ын ерөнхий нарийн бичгийн дарга н.Батбаатар “Манай намайг 2016 оны сонгуульд оролцуулахгүй байх шийдвэрийг гаргаж байсан. Сая нөхөн сонгуульд оролцуулахгүй гэснээр үйл явдал давтагдлаа. Энэ нь цаанаа улс төрийн том зорилготой. 2010 онд ИЗНН-ыг АН-тай нэгдүүлэх байр суурийг намын удирдлагууд илэрхийлж байсан. Гэвч манай намын бүх шатны дэмжигч, сонгогчид 100 хувь эсэргүүцсэн байр суурийг илэрхийлж байсан. Хоёр том нам өөрсөдтэй нь өрсөлдөх улс төрийн хүчнийг байлгахгүй байх үндсэн зорилготой байгаа.” гэлээ.
