“Босоо Хөх Монгол” ТББ-ын Хэнтий салбар зөвлөлийн тэргүүн П.Нарантуяа сонгуулийн 42-р тойрогт иргэний нийгмийн байгууллагуудын төлөөлөл болж бие даан нэр дэвшихээр болжээ. Тэрээр УИХ-д ард түмний төлөөлөл гэж байхгүй болсон бөгөөд газар шороогоо ухуулахгүй, оролдуулахгүй, хөндүүлэхгүй гэсэн зорилгоор ийнхүү өрсөлдөхөөр болсон аж. Яагаад энгийн иргэн улс төрд оролцоотой байж болохгүй гэж, ард түмнийг дээрээс нь хараагүй, дунд нь явж, тогоонд нь буцалж байгаа хүний хувьд би ард түмний дуу хоолой болохоор ийм шийдвэр гаргасан хэмээн ярьж байна.
П.Нарантуяа “Сонгуульд нэр дэвших гэж байгаа гэж худал сайн хүний баг зүүж алтан гургалдай шиг уянгалахгүй. Хүн өөрөөрөө, үнэнээрээ үгээ хэлж, үйлээ хийж явбал бодит. Үнэнээр өлсөж, худалд живсэн ард түмэнд дахиад нэг хуурамч дүр хэрэггүй.” хэмээн айлджээ. Түүний хувьд сонгогчдыг намаас татгалзахыг уриалсан уриалгыг нэлээд түлхүү явуулж байна.
Дашрамд сонордуулахад, “Босоо хөх Монгол” ТББ нь Ноён уулыг ухуулалгүй авч үлдэхийн төлөө нэлээд тэмцэл өрнүүлж яваа. Тэгвэл Ноён уулын талаарх Монголын шүүхийн шийдвэрт Канадууд болон АМГТХЭГ гомдол гаргасны дагуу өчигдөр буюу энэ сарын 16-нд 15 цагаас Захиргааны хэргийн шүүхэд дахин шүүх хурал товлогдоод байсан нь хойшлогдоод байна.
