Энэ сарын 19-ний өдрийн 16:00 цагийн үед Дархан-Уул аймгийн Дархан сумын гуравдугаар багийн харъяат, таван настай Э охин гэрийнхээ гадаа тоглож байгаад сураггүй алга болсон. Гэр бүлийнхэн нь түүнийг “Хараа” голын усанд живсэн байж болзошгүй тухай дуудлагыг орон нутгийн Онцгой байдлын Эрэн хайх, аврах ангийнханд өгсөн байдаг бөгөөд эрэн хайх, аврах ангийн зургаан алба хаагч, Цагдаагийн байгууллагын 82 алба хаагч, орон нутгийн 24 иргэн, нийт 112 хүн, 11 техник хэрэгсэлтэйгээр хайсан. Улмаар тус багийн “Ширээ нурууны нутаг”, Орхон сумын “Бүрэн толгой”, Сэлэнгэ аймгийн Хушаат сумын “Хараа” голын гүүр хүртэл 52 км-т эрэн хайх ажиллагааг зохион байгуулжээ.
Эрэн хайх ажиллагааг зохион байгуулах явцад Цагдаагийн ерөнхий газрын Эрүүгийн гэмт хэрэгтэй тэмцэх тасгийн алба хаагчид уржигдар буюу наймдугаар сарын 21-ний оройн 21:00 цагт охиныг Улаанбаатар хотоос эсэн мэнд олсон билээ.
Охин хулгайлагдсан байсан бөгөөд уг хэргийг Хан-Уул дүүргийн нутаг дэвсгэрт оршин суух “Б” гэх эмэгтэй үйлдсэн болох нь тогтоогдсон. Одоогийн байдлаар сэжигтэн Б-г саатуулан шалгаж байгаа. Харин Сэжигтэн Б цагдаагийн албан хаагчдад мэдүүлэг өгөхдөө “Охины гэрийн гадаа бид хоёр жаахан юм ярьсан. Тэгээд охиныг зайрмаг идье гэхээр нь зайрмаг авч өгөх гээд эцсийн буудлын дэлгүүр орсон. Дэлгүүр тэнд байдаг гэж өөрөө хуруугаараа зааж өгсөн. Дэлгүүрээс нэг зайрмаг, нэг чихэр аваад гэр лүү нь явсан. Би энэ охинтой зүгээр л хоёр, гурав хоног хамт байхыг хүссэн. Тэгээд би найзуудтайгаа уулзсан. Дагуулж явах үед охин аав унтаж байгаа уурлахгүй, ээж “Хүдэр”-т байгаа гэртээ байхгүй гэж хэлсэн. Тэгж хэлэхээр нь дагуулаад автобусанд 10 мянган төгрөг төлж суугаад хот руу явсан.
Охин ерөөсөө дургүйцээгүй надтай тоглоод, эрхлээд явж байсныг автобусны жолооч болон зорчигч ч харсан. Камерын бичлэг ч байгаа байх” хэмээн ярьжээ. Мөн тэрээр өөрийнхөө хийсэн үйлдлийг гэмт хэрэг гэж үзэхгүй байгаагаа хэлсэн юм.
ЦЕГ-ын Хэвлэлийн төлөөлөгч, мэргэжилтэн М.Мөнхшүрийн мэдээлснээр, сэжигтэн Б-д Монгол Улсын Эрүүгийн хуулийн 13 дугаар бүлэг: “Хүний халдашгүй, чөлөөтэй байхын эрхийн эсрэг гэмт хэрэг”, 13 дугаар бүлгийн 13.2-т “Хүн хулгайлах”, 13.2.2.1 дэх хэсэг буюу хүүхэд, жирэмсэн эмэгтэйг мэдсээр байж… гэсэн хоёр зүйл ангиар эрүүгийн хариуцлага хүлээлгэх юм байна. Энэ зүйл анги нь 1-5 жилийн хугацаагаар хорих хуулийн заалттай.
