Айл гэрийн аз жаргал болсон үр хүүхэд, цаашлаад Монголын ирээдүйн төлөө өөрийн боломжоороо хувь нэмрээ оруулахыг хичээж яваа нэгэн сайн үйлстэн бүсгүйг танилцуулж байна. Түүний хувьд хүүхэдтэй болохыг хүссэн хүмүүст тусалж, үрийн зулай үнэрлэх хувь хайрлаж яваа аз жаргалтай хүүхэд бэлэглэгч эгэл нэгэн буянтан юм. 2018 оны наймдугаар сарын 30-ны өдрийн байдлаар 435 хүүхдийн ээж болоод буй Гэрэл Гэгээгийн сүүн сэтгэл цалгисан ярилцлагыг Та бүхэндээ хүргэж байна.
Сайн явах санааных
-Энэ өдрийн мэндийг уншигч олныхоо өмнөөс хүргэж байна. Юун түрүүнд үр хайрлах энэ буянтай үйлийг анх хаанаас мэдэж, яаж эхлүүлж байсан тухайгаа сонирхуулаач?
-Нийт уншигчдадаа энэ өдрийн мэндийг хүргэе. Яагаад ийм ажил хийх болсон бэ гэхээр, би анх жирэмслэлгүй 10 гаруй жил болсон. Энэ асуудалдаа ч их эмзэглэж шаналдаг байлаа. Тэгтэл нэг өдөр манай хадам эгч бэрүүддээ анх хүүхэлдэйн сувинер бэлэглэсэн чинь бүгдээрээ хүүхэдтэй болсон юм. Би хүүтэй болсон. Хүүхэдтэй болж чадахгүй байгаа хүмүүс их эмзэг байдаг шүү дээ. Тэгээд л би эдгээр хүмүүст жоохон ч гэсэн туслая, бас ийм боломж байж болох юм байна гэж бодоод хүүхэлдэйнүүдээ олж авч, түгээж эхэлсэн. Гэхдээ авчраад зүгээр л зарах биш, ном уншлагад оруулж, равнайлуулаад өгвөл илүү үр дүнтэй болно гэж бодсон. Нэг ёсондоо хүүхэлдэйнүүдээ амилуулж байна гэсэн үг. Үүнд миний маш их сэтгэл шингэсэн байдаг болохоор өнөөдрийн үр дүнд хүрээд явж байна гэж боддог юм. Өнөөдрийн байдлаар 435 хүүхэд мэндлээд байна. Хүүхдийн тоо өдрөөс өдөрт өсөн нэмэгдэж байгааг https://www.facebook.com/profile.php?id=100009259743569 хаягаас үзэж болно.
-435 хүүхэд гэдэг нь хүмүүс өөрсдөө мэдэгдсэн тоо юу, өөрийн тань тооцоогоор гаргасан тоо юу?
-Хүмүүс надад хүүхэдтэй боллоо, баярлалаа гэдгээ хэлдэг. Тийм байдлаар мэдэгдсэн тоо нь 435 болж байгаа юм. Гэхдээ жирэмсэн болсон эмэгтэйчүүдийн 100-ны 70 хувь нь хэлдэггүй юм билээ. Зарим хүн удаан хүлээсний дараа үртэй болохоороо янз бүрийн юмнаас хамгаалж, хэл амнаас хол байлгахыг хүсдэг шүү дээ. Тэгээд л хэлдэггүй байх. Дараа нь би яаж мэддэг вэ гэхээр, анх худалдаж авсан хүмүүс маань найз нөхөд, хамаатан садандаа бэлэглэхээр авах гэж дахиж ирэхдээ “би энэ хүүхэлдэйнээс аваад ийм хүүхэдтэй болсон шүү дээ” гээд хүүхдээ тэврээд, дагуулаад явж байдаг. Тэгээд “тоондоо орсон уу?” гэхээр “үгүй” гэдэг байхгүй юу. Зарим хүмүүс тоо бүртгэдэг гэдгийг мэдэхгүй байх. Яагаад гэвэл фэйсбүүк 5000-аас дээш найз авах боломжгүй болчихдог. Уг нь групп нээсэн. Гэхдээ тэр болгон группийг маань олж орж ирж чадахгүй л байх шиг байна.
-Эдгээр сувинерыг авсан хүн бүр хүүхэдтэй, эсвэл хостой болно гэсэн үг үү?
-Аливаа бэлгийг хүнд өгөхдөө чин сэтгэлээсээ өгөх нь хамгийн чухал байдаг шиг хүнд өгөх гэж байгаа бол сүүн цагаан сэтгэлээр өгөх хэрэгтэй. Миний хувьд ч гэсэн хүссэн ч хүүхэдтэй болохгүй байхын зовлонг мэддэг учраас худалдаж авч байгаа хүн бүрийг “хүүхэдтэй болоосой” гэж чин сэтгэлээсээ хүсч өгдөг. Ямар ч байсан хүмүүст боломж байдаг юм байна, битгий шантраарай гэж итгэл өгөхийн тулд үүнийг хийгээд явж байна. Энэ жилийн арваннэгдүгээр сард гурван жил болох гэж байна.
-Үр дүнг нь үзсэн маш олон хүмүүс байгааг дээр дурьдсан. Гэхдээ сайн мэдэхгүй хүмүүст зориулж хамгийн бахархалтай ганцхан жишээ ярьж өгч болох уу?
-Би ер нь талархалын захидал их авдаг. Тэдгээрийг хүмүүст итгэл найдвар өгөхийн тулд фэйсбүүкдээ бас тавьдаг. Гэхдээ тухайн хүмүүс өөрсдөө нэрээ нууцлахыг хүсдэг. Тиймээс би нэг жишээг нэр дурьдалгүй товчхон ярья. Манай фэйсбүүкийн найзууд нэг хүүхдэд тусалсан юм. Тэр хүүхэд уг нь хоёр ихэр байсан боловч ихэр нь төрөөд л нас барж, үлдсэн хүүхдийнх нь тархи нь усжиж, байнгын эмчилгээ, асаргаанд, ерөнхийдөө хэвтрийн дэглэмтэй байсан. Тэр хүүхдэд би эрүүл саруул, сэргэлэн цовоо хүүхдийн бэлгэдэл болох таван хүүхдээ эрүүл болохыг хүсч бэлэглэсэн. Одоо тэр охин маань 4 настай. Алхаж чаддаггүй байсан бол өөрөө явдаг болж, тоолж, дуулж сурсан байна. Цэцэрлэгт явж байгаа. Хамтарч тусалж байсан найзууддаа хандаж, бидний тусалж байсан дүү маань ийм мундаг хүүхэд болсон шүү гэдгийг дуулгамаар байна.
-Хүүхэлдэй худалдаж авсан хүн гэртээ аваачаад ямар нэгэн зан үйл хийх шаардлагатай юу?
-Элдэв янзын зан үйл хийх шаардлагагүй. Яагаад гэвэл бүх үйлийг нь хийлгээд ирдэг юм. Харин хаана яаж байрлуулах вэ гэдгийг нь хэлээд өгдөг байсан. Гэхдээ сүүлийн үед тайлбараа хэвлэмэл байдлаар дагалдуулж өгдөг болсон байгаа.
-Тухайн сувинер болгоны цаад агуулга, утга учрыг нь хаанаас яаж мэдэж авдаг юм бэ?
-Захиалгаар хийдэг газар нь тайлбар хэлж өгдөг. Бас би өөрөө нэмэлт тайлбар, материалыг нь сайтар уншиж судалж байж хүмүүст тайлбарладаг. Түүнээс биш зүгээр л үлгэр зохиож яриад хүүхэлдэй зарна гэвэл утгагүй. Гадуур зөндөө л хүүхэлдэй байгаа.
-Гадуур худалдаанд бэлэг дурсгалын маш олон төрлийн хүүхэлдэй, шувуу гэх мэт зүйлс бий. Мэдээж тэр бүгдийг амилуулаагүй нь тодорхой. Тэдгээрээс танай хүүхдүүд, шувуудыг яаж ялгах ёстой вэ?
-Манайх ялгарах тамга тэмдэгтэй болсон байгаа. Мөн тайлбар дагалдуулдаг болсон. Сүүлийн үед дуурайж худал хэлж хүүхэлдэй зардаг хүмүүс гарч ирсэн байна. Урдаас адилхан хүүхэлдэй оруулж ирээд, энергийн төв дээр зургийг нь авч баталгаажуулсан зургийг маань ашиглаад Гэрэл Гэгээгийнх гээд зардаг болсон байна. Түүнээс хамгаалах зорилгоор зургууд дээрээ утасны дугаараа давхар тавьж гаргадаг болсон байгаа. Өөрөөр хийж байгаа ажлаа хуурамч хүмүүсээс хамгаалах ямар ч арга байхгүй.
-Одоо нийт хэчнээн төрөл, загварын хүүхэлдэйг хүүхэд хүсэн хүлээсэн хүмүүсийн гарт хүргэж байна. Үнийн хувьд ямар байдаг юм бол?
-Эрэгтэй хүүхдийн, охин хүүхдийн, хүйс хамаарахгүй хүүхдийн, ихэр хүүхдийн гэсэн үндсэн дөрвөн төрлийн бэлгэдэлтэй хүүхэлдэй бий. Эдгээр нь тус бүрдээ бас олон загвартай байгаа. Үнийн хувьд 15 000-25 000 төгрөгт багтдаг. Замын зардал, байр хоол, энергийн төвд очих, амилуулах гэх мэт бүх зардал өртөгт нь шингэсэн гэсэн үг. Гол нь энэ бүхэн ашгийн бус үйл хэрэг болохоор үр дүн нь шууд харагдаж, үргэлжлэх зам нь дардан явж байгаа гэж бид боддог юм. Энэ бүхний эцэст үр дүнтэй, үнэн л байх хэрэгтэй. Хэрэв бодит биш, худал зүйл байсан бол өнөөдрийг хүртэл гурван жилийн хугацаанд байхгүй л болох байсан. Өдий болтол явахгүй шүү дээ.
-Равнайлуулах буюу амилуулахдаа ямар зан үйл хийж, ямар уншлагад оруулдаг нь сонирхолтой байна?
-Хүүхэлдэйнүүддээ хар, цагаан хэл амнаас хамгаалах ном, хүүхдийн бурхадын ном уншуулдаг. Хүмүүс магадгүй аль нэг хийдэд очоод тав арван мянган төгрөг өгөөд ном уншуулдагтай адил бодож байгаа байх. Түүнээс ч илүү сэтгэл гаргаж, хүүхэлдэйнүүдээ нэг бүрчлэн гаргаж тавьж байгаад уншлагад оруулна. Заримдаа ямар хүнээр ном уншуулдаг вэ гэж асуудаг. Хэлж болохгүй энгийн шалтгаан бий. Уншлагад оруулсан хүүхэлдэйнүүдээ энергийн төвийн энергитэй чулуунууд дээр тавьж энерги хуримтлуулна. Шууд бичлэгээр, бас зургаар энэ бүгдийгээ баталгаажуулж хүмүүст үзүүлдэг.
-Хаанаас авчирдаг нь хүмүүст бас сонин байгаа болов уу?
-Урд хөршид захиалгаар хийлгэдэг. Манайд ийм зүйл хийдэггүй юм.
-Мөнгөний гахайг монголдоо хийгээд зардаг хүмүүс байдаг. Тэр хүмүүстэй хамтраад хүүхэлдэйнүүд, өөр бусад бэлэгдлийн зүйлс хийвэл дотооддоо гэдэг утгаараа арай хямд тусахгүй юу?
-Дотоодод үйлдвэрлэвэл зардал нь бүр их тусахаар юм байна лээ. Яагаад гэвэл загвар нь өндөр үнэтэй гардаг юм байна. Дурайлгалаа гэхэд торгуульна. Би бас модоор сийлж урладаг хүнтэй ярьж үзсэн юм. Гэтэл модоор хийвэл бүр ч илүү өртөг өндөртэй гарах юм билээ. Тэгэхээр зах зээлээ сайн судалж, хүмүүсийнхээ боломжид нь тааруулаад хийлгэсэн нь дээр. Тиймээс л урдаас оруулж ирж байгаа юм. Тэгээд ч ийм боломжийн үнэтэй байгаа болохоор бас үр өгөөжтэй, арай олонд хүрч чадаж байгаа гэж бодож байна.
-Хүүхэлдэйнээс гадна бас шувуу гээд дурьдлаа л даа. Хоёр шувуу бас байсан. Шувууныхаа талаар тайлбарлаж өгөөч.
-Хүмүүс надаас маш их асуудаг байсан. Манай дүү, ах, эгч хүнтэй суухгүй байна, хань дууддаг юм байна уу гэдэг байсан юм. Гадуур бол хос хун гээд олон зүйл байсан л даа. Гэхдээ би судалж байгаад харахад бодит юм шиг, мөн чамин хийцтэй, хүн аваад маш сайхан сэтгэгдэл төрөхүйц загварыг хүүхэлдэй хийлгэдэг газартаа захиалгаар хийлгэж эхэлсэн. Хосын бэлгэдэл хос нугасаа жилийн өмнөөс оруулж ирсэн байгаа. Нугас бол хэзээ ч ганцаараа болон гурваараа амьдардаггүй шувуу. Тэр утгаараа хос нугас нь ганц бие хүнд аз жаргалтай хайрыг бэлгэддэг. Гэр бүлтэй хүмүүст бол гэр бүлийн бат бэх харилцааг бэлгэдэнэ.
-Саад бэрхшээлгүй ажил үйлс гэж юу байхав. Ийм буянтай сайн сайхан зүйл хийгээд явж байхад чухам ямар асуудал, бэрхшээл гардаг вэ?
-Саадгүй хялбар зүйл гэж байхгүй. Мэдээж хүмүүстэй шууд харьцдагийн хувьд янз бүрийн ааш араншинтай хүмүүстэй учирна. Зарим хүмүүс хүүхэлдэй аваад л болоо гэж бодоод өөрсдөө сэтгэл гаргадаггүй. Сайхан сэтгэл өвөрлөж очоод сайхан мэдээ дуулгаарай гээд л инээмсэглээд өгөхөд шүүрч аваад, хаалгаа чанга хаачих ч хүмүүс байна. Ер нь тухайн хүний өөрийн сэтгэл, хүсэл маш чухал гэдгийг ойлгох хэрэгтэй. Хүчээр авч байгаа бол үр дүн нь ямар байх нь бараг ойлгомжтой. Дараа нь үр дүнгүй байна гэж гомдоллох асуудал мэр сэр гардаг. Бас зарим хүмүүс дөнгөж сар болж байхад үр дүнгээ өгөхгүй байна гэж уурладаг. Миний хувьд бол аль болох тайлбарлаад л өгөхийг хичээдэг. Үл ойшоосон хүмүүс ч тохиолдоно. Тэр болгоныг яриад тоочъё гэвэл бэрхшээл зөндөө л бий. Гэхдээ одоо энэ бүхнийг хүндээр тусгаж авахаа больсон.
-Гэрэл Гэгээ одоо хүссэн зүйлээ хийж түүнээсээ маш сайхан мэдрэмжийг авч байгаа юм байна. Хүний хүсэл мөрөөдөл хязгааргүй. Үүнээс яг одоогоор танд харагдаад байгаа, цаашид хүрч болно гэж тооцоолсон оргил тань юу вэ?
-Хүсч байгаа зүйл их байна даа. Хүүхэдтэй болж чадахгүй байгаа маш олон хүнд туслахын тулд эмнэлэгүүдтэй хамтарч ажиллаад, эмчилгээнийх нь зардлыг тодорхой хувиар хөнгөлөх юм сан гэж боддог. Үр тогтохгүй байх янз бүрий шалтгаан бий. Үрийн суваг бөглөрөх, өндгөвч, сав гээд эмэгтэйчүүдийн маш олон асуудал байдаг. Тэднийг минь дэмжээд өгөх, хамтарч ажиллах, туслах хүмүүстэй л гар нийлж ажилламаар байна. Миний гол зорилго бол хүүхэдтэй болохгүй байгаа хүн бүрийг хүүхэдтэй болгохыг л хүсч байна.
-Гэрэл Гэгээтэй хамтран ажиллах, эсвэл хүүхэлдэйнүүдийн талаар илүү дэлгэрэнгүй мэдээллийг авахыг хүсвэл ямар сувгаар холбогдож болох уу. Ер нь ойрдоо төлөвлөсөн ямар ажил, шинэлэг санаа байна?
-Надтай Gerel Gegee гэсэн фэйсбүүк хаягаар, эсвэл дээр дурьдсан группэд хандаж болно. Мөн 88002095, 80002095 дугаараар холбогдож болно. Ойрын хугацаанд би Гэрэл Гэгээгийн фэйсбүүкийн найзууд долоо хоногт хоёр удаа ч юм уу уулзалт хийдэг клуб байгуулаад, хүмүүс хоорондоо чөлөөтэй ярилцдаг, туршлага, санал бодлоо солилцдог, жирэмсэн болсон эмэгтэйчүүд нь ямар эмчилгээ хийлгэж, яаж хүүхэдтэй болсон тухайгаа ярьж зөвлөдөг болохыг хүсч байна.
-Ярилцлагаа энд хүргээд өндөрлөж байна. Хүүхэдтэй болохыг хүсч байгаа хүмүүст хандаж захих, хэлэх үг байгаа байх гэж бодож байна. Тэгэхээр энэ орон зайг асуултгүйгээр танд үлдээж байна.
-Хүүхэлдэй авч байгаа хүмүүстээ хандаж нэг зүйлийг захимаар байна. Хүний эрүүл мэнд гэдэг нэн тэргүүний асуудал. Тиймээс үр тогтохгүй байгаа бол эрүүл мэндийн асуудлаа хамгийн түрүүнд шийдэх хэрэгтэй. Эмнэлгээр яваад үзэх хэрэгтэй. Өөрсдийнх нь биед ямар нэгэн байдлаар үр тогтох боломжгүй асуудал бий болсон бол эмчлүүлэх шаардлагатай шүү дээ. Тэгж байгаад харин бэлгэдэлийн дагуу хүүхдүүдээс сонгож болно. Тэрнээс биш шууд хүүхэлдэй аваад л эрүүл мэндийн асуудалтай байсан ч хүүхэдтэй болно гэж ойлгож болохгүй. Мөн эрүүл мэндийн хувьд асуудалгүй байлаа гэхэд сэтгэл маш чухал.
Ингээд миний чин сэтгэлийг ойлгож, хэрэгтэй хүнд нь хэрэгтэй мэдээлэл түгээж тусладаг, бусдад итгэл бэлэглэдэг бүх хүмүүст баярлалаа гэж хэлэхийг хүсч байна. Мөн сайн үйлсийг дэмжиж байгаа Та бүхэнд өөрийнхөө зүгээс болон уншигч олныхоо өмнөөс талархалаа илэрхийлье.
Ярилцлагын төгсгөлд сонирхуулахад, Гэрэл Гэгээгээс ихрийн бэлгэдэлтэй хүүхэлдэй авсан ихрийн удамгүй айлд ихэр хүүхэд төржээ. Гэрэл Гэгээгээс хүүхэлдэй авсан дөрвөн айл өнөөдөр ихэр хүүхдүүдтэй болсон байна.
