УИХ-ын гишүүн Ё.Отгонбаяр, Л.Болд нарт холбогдох хэргийг прокурорт шилжүүлсэн

Зэвсэгт хүчний жанжин штабын Агаарын довтолгооноос хамгаалах
цэргийн командлагч асан, баригадын генерал Т.Дашдэлэг нарын гурван хүнд 2011 онд цэргийн ангид ашиглаж
байсан байлдааны сөнөөгч бөмбөгдөгч \”Миг-21” онгоцыг хуваан, их биеийг нь төмөр
хайлуулах үйлдвэрт тушаасан, мөн моторыг нь БНАСАУ-д худалдахыг завдсан байж
болзошгүй хэрэгт буруутгасан юм. Ингээд
хэргийг АТГ-т шалгаж байгаад ТЕГ-т шилжүүлсэн байдаг. ТЕГ-аас хэргийг шалгаж
дуусаад Нийслэлийн прокурорын газарт хянуулж, прокурор яллах дүгнэлт үйлдэн
шүүхэд шилжүүлсэн юм. Улмаар шүүхээс
тэднийг буруутай хэмээн ял оноосон байдаг.

 

Тэгвэл энэ хэрэгт
УИХ-ын гишүүн Л.Болд татагдсан тухай мэдээлэл цацагдах болсон. Тиймээс УИХ-ын
гишүүн Л.Болд 2013 оны дөрөвдүгээр сард Т.Дашдэлэг нарын холбогдсон хэрэгт
хамааралтай эсэх асуудлыг тодруулахаар АТГ-т хандсан. Түүний хариуд АТГ-аас \”Авлигатай тэмцэх газрын Мөрдөн шалгах хэлтэст
шалгагдаж байгаа Т.Дашдэлэг нарт холбогдох эрүүгийн хэрэгт холбогдуулан таныг
Батлан хамгаалахын сайд байх үедээ хууль бус ажилд оролцсон, албаны эрх мэдэл
албан тушаалаа ашигласан үндэслэлээр шалгасан, шалгаж байгаа зүйлийг байхгүй
болохыг мэдэгдье” гэсэн хариултыг өгсөн хэмээн тухайн үед мэдээлж байв.

 

Тэгвэл саяхан УИХ-ын Хууль зүйн байнгын хорооны хурал дээр УИХ-ын гишүүн Л.Болдыг
АТГ-аас авлига, албан тушаалын хэрэгт холбогдуулан шалгаж дуусаад, хэргийг
яллах дүгнэлт үйлдүүлэхээр прокурорт шилжүүлсэн тухай мэдээлэл хийгдэв.

 

Үүний дараа УИХ-ын гишүүн Л.Болд \”Тухайн
үед АТГ-аас \”Батлан хамгаалах яаман дээр өмнөх сайдтай холбоотой
тодорхой асуудлыг шалгаж байна. Таниас тайлбар авах шаардлага байна” гэсэн. Би гэрчээр очиж, тайлбар өгсөн. Гэтэл өнөөдөр
миний тайлбар өгч байсан хэрэг надад хамаатай болоод бүртгэгдчихсэн байж байна” гэсэн тайлбарыг өгсөн
байна.

 

Ё.Отгонбаярын хүн дарамталж
авлига өгөхийг шаардсан хэрэг прокурорт шилжсэн

 

УИХ-ын Хууль зүйн байнгын хорооны хурлын үеэр АТГ-аас УИХ-ын гишүүн
Л.Болдоос гадна Ё.Отгонбаярт холбогдох хэргийг прокурорт шилжүүлсэн тухай
мэдээлэл өгсөн юм.

УИХ-ын гишүүн Ё.Отгонбаяр холбогдсон
бусдаас авлига авахыг шаардсан хэргийн талаарх мэдээлэл мөн л 2013 онд идэвхтэй
цацагдаж байлаа. Тодруулбал, Ё.Отгонбаярын эхнэр Б.Эрдэнэсолонгын арилжааны
долоон банкаар дамжсан гүйлгээг шалгаж, тодрхой хэмжээний мөнгийг битүүмжилж,
улмаар цагдан хорьсон талаар Нийслэлийн прокурорын газраас мэдээлсэн. Харин
Ё.Отгонбаярыг иргэн Ч – г дарамталж, авлига өгөхийг шаардсан гэх хэрэгт
буруутган шалгасан бөгөөд мөрдөн шалгах явцад тогтоогдсон хэмээн тухайн үед
мэдээлж байв.

Харин АТГ-аас хийсэн мэдээллийн дараа
УИХ-ын гишүүн Ё.Отгонбаяр \”Манай хууль,
хяналтын байгууллага хүний эрхэд яаж бүдүүлгээр халдаж, гэмгүй хүнийг гэмтэн
болгодог жишээг өнөөдөр байнгын хорооны гишүүд бид тодорхой харлаа. Шалгагдаж
байгаа гэчихээд, түдгэлзүүлсэн гэдгийг нь яагаад хэлэхгүй байгаа юм. Улсын
ерөнхий прокуророос ирсэн бичиг нь надад байна. Хохирогч байхгүй гэсэн
үндэслэлээр хэргийг түдгэлзүүлсэн байна. Эдгээр хэрэгт Ё.Отгонбаярыг сэжигтнээр
тооцоогүй байна гээд прокурор бичсэн байна. Үүнийг хэлэх хэрэгтэй шүү дээ.
Тэгэхгүйгээр сэжигтэн, гэмт хэрэгтэн юм шиг яриад байх юм” гэсэн тайлбарыг өгчээ.

 

Амар