Ерөнхий боловсролын сургуулиудад 2014 оноос эхлэн эрүүл мэндийн хичээлийг сургалтын хөтөлбөрөөс хасаж. “Цөм” хөтөлбөрийн дагуу эрүүл мэндийн хичээлийг бие даасан сургалтын цагаас хасч өөр хичээлийн дэд сэдэв байдлаар орохоор болсон билээ. Ингэж хасагдсанаас хойш 15-24 насныхны үр хөндөлт бэлгийн замаар дамжих өвчин нэмэгдэж эхэлсэн. Мөн бага насны хүүхдийн хүчирхийлэлд өртөх тохиолдол ч цөөнгүй гарсан. Энэ нь эрүүл мэндийн боловсрол гэдгийг тоохгүй орхисны гор юм. Буруу бодлогын улмаас сөрөг үр дүн гарч дөрвөн жилийг үдсэний дараа эрүүл мэндийн хичээл хэрэгтэй гэдгийг мэдэрч эргэн оруулахаар болсон.
Эрүүл мэндийн хичээл 4-12 ангийн сурагчдад зургаан сэдвээр орно
Иймээс энэ жилээс эхлэн тус хичээлийг хуваарийн дагуу оруулахаар болсон юм. Эрүүл мэндийн хичээл 4-12 ангийн сурагчдад зургаан сэдвээр орох юм байна. Тодруулбал, Эрүүл мэндийн хичээлийн хөтөлбөр дараах чиглэлээр сурагчдад хичээл орохоор хөтөлбөрт тусгагджээ.
• Хувийн болон орчны эрүүл мэнд,
• Хооллолт, хөдөлгөөн
• Сэтгэцийн эрүүл мэнд
• Хорт зуршил
• Бэлгийн болон нөхөн үржихүйн эрүүл мэнд
• Жендэрт суурилсан хүчирхийлэл.
Түүнээс гадна Эрүүл мэндийн яамны зүгээс уламжлалт анагаах ухаан сэдвийг ахлах ангид орохоор нэмж оруулж өгсөн байна. Учир нь Монголчууд эрт дээр үеэс уламжлалт анагаах ухааны дагуу эмчилгээ хийж, энэ нь их үр дүнтэй байж ирсэн гэж байгаа аж. Тухайлбал, өвлийн улиралд чацаргана, аарц хэрэглэвэл ханиад томуу хүрэхгүй байж, биеийн дархлаа сайжирдаг. Тиймээс орчин үеийн хүүхдүүдийн тэр бүр мэдэхгүй учраас нэмж оруулахаар болсон тусгасан байна. Эрүүл мэндийн хичээл орох багш боловсон хүчний хувьд хувьд бүрэн хангагджээ. Сурах бичиг албан ёсоор хэвлэгдээгүй. Боловсролын хүрээлэнгээс суралцахуйн удирдамж гаргаж, эрүүл мэндийн хичээл орох багш нарт өгчээ. Энэхүү удирдамжийн дагуу 4-12 дугаар ангиудад эрүүл мэндийн хичээл орох аж. 4,5 дугаар ангиуд бага ангийн багш нар орох бол, 6-12 дугаар ангиудын хувьд биологи, эрүүл мэндийн чиглэлээр мэргэшсэн багш нар орох юм байна. Нийслэлийн хэмжээнд 2900 багш нарыг сургалтад хамруулсан бөгөөд эдгээр багш нар есдүгээр сарын 1-ээс эрүүл мэндийн хичээлээ зааж эхэлнэ
Шинээр сурах бичиг хэвлэгдэж гараагүй учраас өмнө хэрэглэж байсан 6-11 дүгээр ангийн хуучин сурах бичгийг ашиглана
Эрүүл мэндийн хичээл заах багш нар хэрхэн бэлтгэгдсэн талаар Нийслэлийн боловсролын газрын Бодлого зохицуулалтын газрын дарга Ц.Жаргалтуулаас зарим зүйлийг тодрууллаа.
-Энэ жилээс ЕБС эрүүл мэндийн хичээл орж эхэлнэ. Эрүүл мэндийн хичээл заах багш нар хэр бэлтгэгдсэн вэ?
-Энэ хичээлийн жилд эрүүл мэндийн хичээлийг 4-12 дугаар ангиудад орохоор сургалтын төлөвлөгөөнд тусгасан. Сайдын 256 дугаар тушаалаар батлагдаад явж байгаа. Үндэсний хэмжээнд эрүүл мэндийн 90 багш бэлтгэсэн. Үүнээс нийслэлд 30 багш бэлтгэсэн. Эдгээр бэлтгэсэн 30 багшаар дамжуулж нийслэлд 260 багш бэлтгэсэн байгаа. Ингээд нийслэлд нийтдээ 290 багш бэлтгэгдэж гарсан байгаа. Ерөнхийдөө эрүүл мэндийг хичээллийг хими биологийн багш нараар оруулахаар голлож бэлтгэсэн. Тэр дундаа биологийн багш эрүүл мэндийг хичээллийг бүрэн заах боломжтой.
-Сурах бичиг хэвлэгдэж гараагүй байгаа гэсэн. Ямар чиглэл барьж орох юм бол?
-Эрүүл мэндийн хичээл орж байгаатай холбогдуулан суралцахуйн удирдамж гарсан байгаа. Энэ удирдамжаа бүх багш нарт хүргүүлчихсэн. Шинээр сурах бичиг хэвлэгдэж гараагүй учраас өмнө хэрэглэж байсан 6-11 дүгээр ангийн хуучин сурах бичгийг ашиглана. Мөн суралцахуйн удирдамжийнхаа дагуу эрүүл мэндийн хичээлээ ороод явна. Ирэх жилээс сурах бичиг гараад явчих байх.
-Ер нь эрүүл мэндийн хичээл долоон хоногт хэдэн цаг орох вэ?
-Эрүүл мэндийн хичээл сургалтын төлөвлөгөөнд цагаар заагдсан байгаа учраас долоон хоног бүр хуваарийн дагуу ороод явна.
