Олон нийтийн хэвлэл мэдээллийн хэрэгсэл болон цахим сүлжээгээр орон нутагт үйл ажиллагаа явуулж буй шатахуун түгээх станцууд шатахуун дутуу шахаж иргэд хэрэглэгчдийг хохироож байгаа тухай мэдээлэл цацагдаж байгаа юм.
Тэр бичлэгт 10литр бензин авахад нэг литр гаруй дутуу шахагдсан байх бөгөөд иргэд ч энэ тал дээр гомдолтой байгаагаа илэрхийлж байна. Үүнийг түгээх газрын ажилтан дутуу шахагдсан бензинийг шатахуун дамжуулах хоолойд үлдсэн хэмээн тайлбарлаж байв. Бухимдсан иргэд түгээгч нарыг хоолойд үлдсэн бензинийг хэзээ ч банк руу шавхдаггүй хэмээн шүүмжилжээ.
Тэгвэл уг мэдээллийн дагуу Шударга өрсөлдөөн, хэрэглэгчийн төлөө газраас Хэрэглэгчийн эрхийг хамгаалах тухай хуулиар олгогдсон чиг үүрэг, эрхийнхээ дагуу Мэргэжлийн хяналтын ерөнхий газар, Стандарт, хэмжил зүйн газруудад “Шатахуун түгээх станцуудын түгээж буй Аи-92, Аи-95 автобензин болон дизель түлшний түгээгүүрийн улсын баталгаажуулалт, лац тэмдгийн бүрэн бүтэн байдалд шалгалт хийж, хяналт шалгалтынхаа дүнг олон нийтийн мэдээллийн хэрэгслээр мэдээлэх талаар албан бичиг хүргүүлсэн байна.
Түүнчлэн Шударга өрсөлдөөн, хэрэглэгчийн төлөө газрын даргаас орон нутаг дахь Улсын байцаагчид, орон тооны бус салбар зөвлөлүүдэд дээрх асуудлыг шуурхай шалгаж, хяналт тавьж ажиллахыг үүрэг болгосон аж.
Энэ хүрээнд “Автобензин, дизель түлшийг дутуу шахаж байна” гэх асуудлыг шалгуулах хүсэлт ирүүлсний дагуу Өмнөговь аймгийн Мэргэжлийн хяналтын газраас “Сод Монгол” шатахуун түгээх станцын түгээгүүрт хэмжил зүйн хяналт, шалгалт хийжээ.
Тус түгээгүүр нь 5-180 л/мин зарцуулалттай, өндөр даралтаар их хэмжээний шатахуун түгээх зориулалттай хурдны түгээгүүр учраас MNS 3015 : 2004 стандартын дагуу 50 литрийн багтаамжтай, баталгаажилт хийгдсэн хэмжүүрийг ашиглан гурван удаа магадлан тогтоох хэмжилт хийсэн байна. Хэмжилтээр түгээгүүрийн шахалт стандартын шаардлага хангаж байв гэсэн дүгнэлтийг гаргаснаа мэргэжлийн хяналтын байгууллага нь мэдээллээ.
Шатахуун түгээгүүр шатахууныг дутуу шахдаг болсон гэдэгтэй санал нийлэх хүн олон байх ба зарим нь үүнийг шатахуун түгээгүүрийн газруудыг саванд түлш өгөхөө больсонтой холбон тайлбарладаг юм.
