Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар нь 3.7 тэрбум төгрөгийг тавилгад зарцуулсан гэх шүүмжлэлд өртөөд буй. Хүүхдийн хөгжил, хамгааллын 6.4 тэрбум төгрөгийн зарцуулалтын талаар тус газрын дарга О.Алтансүх мэдээлэл хийлээ.
Тэрээр энэ талаар “УИХ-аас 2018 онд Хүүхдийн хөгжил хамгааллын зардлыг 5 тэрбум төгрөгөөр нэмэгдүүлж 6.4 тэрбум төгрөг баталсан. Үүнээс 3.7 тэрбум төгрөгөөр нь тавилга авсан мэт ойлгогдохоор мэдээллийг нийгмийн сүлжээнд бичсэн байгааг хараад олон хүн асуулаа. Уг төсвийн 2.4 тэрбум төгрөгийг 21 аймаг, нийслэл, 9 дүүргийн гэр бүлийн газар хэлтсүүдэд хуваарилсан. Хүүхэд хамгааллын мэдээллийн санг хөгжүүлж, эрсдэлт нөхцөлд байгаа хүүхдийг даатгалд хамруулахаар төрийн үйлчилгээ хүрэхгүй байгаа үйл ажиллагаанд зориулж 590.0 сая төгрөгийг төрийн болон төрийн бус байгууллагуудад зарцуулсан байна. ХНХЯ-нд 700 сая төгрөг, ГБХЗХГ-т 667 сая төгрөг, харьяа таван байгууллага болох Найрамдал, Өнөр бүл, хараа хяналтгүй хүүхдийн Нарт хангай төв, 108 хүүхдийн тусламжийн төв, Хамгаалах байрны ажилд 789 сая гээд нийтдээ 1.4 тэрбум төгрөг зарцуулсан. Ингээд 6.4 тэрбум болж байгаа.
Мөн хамтарсан багийг үйл ажиллагаанд зориулж 453.7 сая төгрөг гэх мэтээр зарцуулсан. Энэ бүгдийг нэг дор танилцуулах боломжгүй учраас дэлгэрэнгүй задаргааг олон нийтэд танилцуулж өгөх хэрэгтэй. Сошиалаар 3.7 тэрбум төгрөгийг эд хогшилд зарцуулсан гэж шүүмжлээд байна. Гэтэл үйл ажиллагаа гэдгийг нь орхиод 3.7 тэрбумыг тавилгад зарцуулсан гэх мэтээр ойлгогдохоор тарааж байна. Тавилгад бид 192.5 сая төгрөг зарцуулсан. Гэхдээ энэ нь хамгаалах байрны ор дэр, хөнжил, хогшлууд байгаа” гэв.
Тэрээр цааш ярихдаа “Шинээр байгуулагдсан сургалт судалгаа мэдээллийн төв, техник хэрэгслийн хангамж хүрэлцээгүй зарим нэг орон нутгийн залуучуудын хөгжлийн төвүүдэд 50 сая төгрөгийн тоног төхөөрөмж, тавилга, “Өнөр бүл” хүүхдийн төвд архивын тоног төхөөрөмжид 23 сая төгрөг, хөгжлийн бэрхшээлтэй хүүхдүүдэд үйлчилгээ үзүүлдэг төрийн болон төрийн бус байгууллагад нөхөн сэргээх тоног төхөөрөмжийн зардалд 75 сая, түр хамгаалах байрны хүүхдийн ор дэвсгэр, гал тогоо тоглоомын өрөөний тохижилтод зориулж 44.5 сая төгрөгийн гээд нийт 192.5 сая төгрөгийг зарцуулсан байна. Гэхдээ бид албан тасалгаандаа тавилга аваад тавьчихаагүй, хэрэгцээт газар нь авсныг анзаарсан байх.” хэмээн тайлбарлалаа.
Гэр бүл, хүүхэд, залуучуудын хөгжлийн газар нь 2018 онд 17483 хүүдэд хамгааллын үйлчилгээ, 99750 хүүхдэд хөгжлийн үйлчилгээг хүргэжээ. Үүнээс аюулгүй байдлыг хамгаалж түр хамгаалсан хүүхэд 939 хүүхэд, тэр дундаа газар дээрээс нь шуурхай тээврийн хэрэгслээр 486 хүүхдийг хамгаалж үйлчилгээ үзүүлсэн байна. Хууль зүйн туслалцааг 494 хүүхдэд, 774 хүүхдийг эрүүл мэндийн үйлчилгээнд, 170 хүүхдийг боловсролын үйлчилгээнд хамруулжээ.
